Nyamenle hyehyɛle tete selɛ Ebileham abozoamra yɛle bɛ maanle na ɔmaanle bɛ mɛla. Ɔvɛlɛle maanle ne ‘Yizilayɛ’ na ɔvale ye nɔhalɛ ɛzonlenlɛ nee ye edwɛkɛ ne ɔmaanle bɛ. (Edwɛne 147:19, 20) Yemɔti ɛnee maanle kɔsɔɔti anu amra bahola alua Yizilayɛma anwo zo anyia nvasoɛ.​—Kenga Gyɛnɛsese 22:18.

Nyamenle kpale Yizilayɛma kɛ ye alasevolɛ. Bɛ tetedwɛkɛ ne maa yɛnwu kɛzi menli di Nyamenle mɛla zo a ɔboa bɛ la. (Ditilɔnomi 4:6) Ɛhye ati, ɛnee menli gyɛne bahola alua Yizilayɛma anwo azo anwu nɔhalɛ Nyamenle ne.​—Kenga Ayezaya 43:10, 12.

Nzinlii, Nyamenle anye anlie Yizilayɛma anwo bieko, yemɔti Gyihova vale Kilisiene asafo ne ziele maanle zɔhane agyakɛ anu. (Mateyu 21:43; 23:37, 38) Ɛnɛ, nɔhalɛ Kilisienema ɛragyinla Yizilayɛma agyakɛ anu na bɛsonle kɛ Gyihova alasevolɛ.​—Kenga Gyima ne 15:14, 17.

Gyisɛse hyehyɛle ye ɛdoavolɛma kɛ bɛha edwɛkɛ ne wɔ maanle kɔsɔɔti anu na bɛyɛ menli ɛdoavolɛma. (Mateyu 10:7, 11; 24:14; 28:19, 20) Kɛkala gyima ɛhye ɛlɛba ye awieleɛ wɔ mekɛ ɛhye awieleɛ ne anu. Ɛhye a le mekɛ mɔɔ limoa mɔɔ Gyihova ɛha menli mgbe dɔɔnwo mɔɔ vi maanle ngakyile nu la ɛbɔ nu wɔ nɔhalɛ ɛzonlenlɛ nu a. (Yekile 7:9, 10) Bɛhyehyɛ nɔhalɛ Kilisienema amaa bɛaboa bɛ nwo na bɛamaa bɛ nwo anwosesebɛ ngoko. Bɛdi Baebolo ngilehilelɛ nwo ngyehyɛleɛ ko ne ala azo wɔ bɛ debiezukoalɛ bo wɔ ewiade amuala.​—Kenga Hibuluma 10:24, 25.

Wɔ ɛvolɛ 1870 ne anu, Baebolo sukoavoma ekpunli ekyi bie bɔle ɔ bo kɛ bɛkpondɛ Baebolo ne anu nɔhalɛ edwɛkɛ mɔɔ azo ɛheda la. Ɛnee bɛze kɛ Gyisɛse hyehyɛle Kilisiene asafo ne kɛ ɔbɔ edwɛkpa ne nolo, yemɔti bɛbɔle ɔ bo kɛ bɛbɔ Belemgbunlililɛ ne nolo wɔ ewiade amuala. Bɛvale duma Gyihova Alasevolɛ bɛdole bɛ nwo zo wɔ ɛvolɛ 1931.​—Kenga Gyima ne 1:8; 2:1, 4; 5:42.

Wɔ ɛvoya ne mɔɔ limoa la anu, Kilisiene asafo ne mɔ mɔɔ wɔ maanle ngakyile nu la nyianle nvasoɛ vile neazo eku bie mɔɔ liele Gyisɛse dole nu kɛ asafo ne Ati la ɛkɛ. (Gyima ne 16:4, 5) Ɛnɛ noko, Gyihova Alasevolɛ mɔɔ wɔ ewiade amuala la nyia nvasoɛ fi Neazo Eku bie mɔɔ mgbanyima mɔɔ bɛlɛ anwubielɛ a wɔ nu la ɛkɛ. Ɔnea Gyihova Alasevolɛ ɔfese ne mɔ mɔɔ bɛkile mbuluku mɔɔ bɛfa bɛsukoa Baebolo ne abo wɔ aneɛ mɔɔ bo 600 la anu, bɛpelente na bɛkyehyɛ la azo. Ɛhye ati Neazo Eku ne kola fa Ngɛlɛlera ne anu anwosesebɛmaanlɛ nee adehilelɛ maa asafo mɔɔ bo 100,000 wɔ ewiade amuala la. Mrenyia mɔɔ bɔ mɔdenle la sonle kɛ mgbanyima anzɛɛ neavolɛma wɔ asafo biala anu. Mrenyia ɛhye mɔ fi ɛlɔlɛ nu nea Nyamenle mboane ne.​—Kenga 1 Pita 5:2, 3.

Bɛhyehyɛ Gyihova Alasevolɛ amaa bɛabɔ edwɛkpa ne nolo na bɛayɛ menli ɛdoavolɛma. Yɛka edwɛkɛ ne wɔ azua nu kɛ mɔɔ ɛzoanvolɛma ne yɛle la. (Gyima ne 20:20) Eza yɛ nee menli mɔɔ kulo nɔhalɛ ne la sukoa Baebolo ne. Noko Gyihova Alasevolɛ ɛnle ahyehyɛdeɛ ala. Yɛle abusua mɔɔ yɛlɛ Selɛ mɔɔ lɛ ɛlɔlɛ la. Yɛle mediema mrenyia nee mraalɛ mɔɔ yɛdwenle yɛ gɔnwo mɔ anwo a. (2 Tɛsalonaekama 1:3) Kɛmɔ bɛhyehyɛ Gyihova menli amaa bɛayɛ mɔɔ sɔ Nyamenle anye na bɛaboa awie mɔ la ati, bɛmɛ a bɛle abusua mɔɔ lɛ anyelielɛ kpalɛ wɔ azɛlɛ ye azo a.​—Kenga Edwɛne 33:12; Gyima ne 20:35.