ƐZUKOALƐDEƐ 7
Nyamenle Belemgbunlililɛ Ne A Le Duzu?
1. Nyamenle Belemgbunlililɛ ne a le duzu?
Duzu a maa Gyisɛse yɛ Belemgbunli mɔɔ fɛta a?—MAAKE 1:40-42.
Nyamenle Belemgbunlililɛ ne le arane mɔɔ wɔ anwuma. Ɔbaye arane gyɛne kɔsɔɔti yeavi ɛkɛ na yeamaa Nyamenle ɛhulolɛdeɛ ayɛ ɛkɛ wɔ anwuma nee aze. Mɔɔ Nyamenle Belemgbunlililɛ ne bayɛ la le edwɛkɛ kpalɛ. Ɔnrɛhyɛ Nyamenle Belemgbunlililɛ ne bamaa alesama anyia arane kpalɛ. Ɔbaha menli mɔɔ de azɛlɛ ye azo la yeabɔ nu.—Kenga Daneɛle 2:44; Mateyu 6:9, 10; 24:14.
Belemgbunlililɛ biala lɛ ye belemgbunli. Gyihova ɛkpa ɔ Ra Gyisɛse Kelaese kɛ Ye Belemgbunlililɛ ne azo Belemgbunli.—Kenga Yekile 11:15.
Nea Duzu A Le Nyamenle Belemgbunlililɛ Ne? vidio ne.
2. Duzu ati a Gyisɛse a le Belemgbunli mɔɔ fɛta a?
Nyamenle Ara ne a le Belemgbunli mɔɔ fɛta a ɔluakɛ ɔyɛ nyele yɛɛ ɔkulo mɔɔ le kpalɛ la. (Mateyu 11:28-30) Eza ɔlɛ tumi mɔɔ ɔkola ɔfa ɔboa menli a, ɔluakɛ ɔbadɛnla anwuma a yeali tumi wɔ azɛlɛ ye azo a. Mɔɔ bɛdwazole ye la, ɔhɔdɛnlanle Gyihova asa fema zo wɔ anwuma ɔhendɛle. (Hibuluma 10:12, 13) Akee Nyamenle maanle ye tumi kɛ ɔli ebia.—Kenga Daneɛle 7:13, 14.
3. Nwane mɔ a nee Gyisɛse bali tumi a?
Menli ekpunli bie mɔɔ bɛfɛlɛ bɛ “nwuanzanwuanzama” la nee Gyisɛse bali tumi wɔ anwuma.“ (Daneɛle 7:27) Nwuanzanwuanzama mɔɔ bɛlimoale bɛkpale bɛ la a le Gyisɛse ɛzoanvolɛ nɔhavoma ne. Gyihova ɛhɔ zo ɛkpa mrenyia nee mraalɛ nɔhavoma kɛ nwuanzanwuanzama too yeradwu ɛnɛ. Saa bɛdwazo bɛ a bɛmaa bɛ sunsum nu sonlabaka kɛ Gyisɛse la.—Kenga Dwɔn 14:1-3; 1 Kɔlentema 15:42-44.
Menli nyɛ a bahɔ anwuma a? Gyisɛse vɛlɛle bɛ “mboane ekpunli ekyi.” (Luku 12:32) Bɛ dodo bayɛ 144,000. Bɛ nee Gyisɛse bɛali tumi wɔ azɛlɛ ye azo.—Kenga Yekile 14:1.
4. Gyisɛse bɔle ɔ bo kɛ ɔdi tumi la duzu a zile a?
Nyamenle Belemgbunlililɛ ne bɔle ɔ bo kɛ ɔdi tumi wɔ ɛvolɛ 1914. * Debie mɔɔ Gyisɛse limoale yɛle kɛ Belemgbunli la a le kɛ ɔvuandinle Seetan nee ye sunsum ɛtane ne mɔ ɔguale azɛlɛ ye azo. Seetan vale ɛya kpole na ɔbɔle ɔ bo kɛ ɔfa ngyegyelɛ yeara azɛlɛ ye azo ɛleka biala. (Yekile 12:7-10, 12) Ɔvi mekɛ zɔhane, alesama ngyegyelɛ ɛyɛ kpole. Konle, ɛhɔne, ewulenzane yɛɛ azɛlɛkpusulɛ boka “sɛkɛlɛneɛ” mɔɔ kile kɛ ɔnrɛhyɛ Belemgbunlililɛ ne bali tumi wɔ azɛlɛ ye azo la anwo.—Kenga Luku 21:7, 10, 11, 31.
5. Duzu a Nyamenle Belemgbunlililɛ ne ɛlɛyɛ a?
Ɔlua ewiade amuala edwɛkɛhanlɛ gyima ne azo, Nyamenle Belemgbunlililɛ ne ɛlɛka menli ekpunli kpole bie mɔɔ vi maanle ngakyile nu la abɔ nu. Bɛlɛvoma mgbe dɔɔnwo ɛlɛyɛ Belemgbunlililɛ ne mɔɔ wɔ Gyisɛse tumi bo la maanlema. Nyamenle Belemgbunlililɛ ne babɔ bɛ nwo bane wɔ mekɛ mɔɔ ɔlɛsɛkye ewiade ɛtane ɛhye la. Ɔti ɔwɔ kɛ menli mɔɔ kulo kɛ bɛnyia Nyamenle Belemgbunlililɛ ne anu nyilalɛ ne bie la kɔsɔɔti sukoa kɛ bɛbabɛlɛ bɛ nwo aze bɛamaa Gyisɛse.—Kenga Yekile 7:9, 14, 16, 17.
Wɔ ɛvolɛ 1,000 ne anu, Belemgbunlililɛ ne bamaa Nyamenle bodane mɔɔ ɔlɛ ɔmaa alesama la ara nu. Azɛlɛ ye amuala bayɛ paladaese. Akee Gyisɛse bazia ava Belemgbunlililɛ ne amaa ɔ Ze. (1 Kɔlentema 15:24-26) Ɛlɛ awie mɔɔ ɛkulo kɛ ɛka Nyamenle Belemgbunlililɛ ne anwo edwɛkɛ ɛkile ye ɔ?—Kenga Edwɛne 37:10, 11, 29.
^ ɛden. 6 Saa ɛkulo kɛ ɛnwu kɛzi Baebolo ngapezo hanle ɛvolɛ 1914 anwo edwɛkɛ dole ɛkɛ la a, nea Duzu A Baebolo Ne Kola Kilehile Yɛ A? buluku ne mukelɛ 217-220.
