1. Mekɛ boni a Pita arɛle bɔle kpole a?

PITA arɛle ɛnrɛvi mekɛ mɔɔ ɔ nee Gyisɛse anye yiale la ɛlɛ. Mɔɔ ɛnee Gyisɛse ɛlɛnea ye la, asoo Pita nwunle kɛ ɔ rɛle ɛbɔ anzɛɛ yeva ɛya? Yɛngola yɛnzi ye pi; mɔɔ ngɛlɛlera ne hanle la a le kɛ “Awulae hakyile ɔ nye nleanle Pita.” (Luku 22:61) Ɛkɛ ne ala, Pita nwunle kɛzi yevo la. Ɔnwunle kɛ yeyɛ deɛ ko ne mɔɔ Gyisɛse hanle nwolɛ edwɛkɛ mɔɔ ɔhanle kɛ ɔnrɛyɛ la—yekpo ɔ Menle ne mɔɔ ɔkulo ye la. Pita arɛle bɔle kpole wɔ zɛhae mekɛ ɛhye anu.

2. Duzu a ɛnee ɔhyia kɛ Pita sukoa a, na nvasoɛ boni a yɛbanyia yɛavi ye edwɛkɛ ne anu a?

² Noko akee ɛnee Pita anyelazo ɛtɛwiele. Kɛmɔ ɛnee Pita lɛ diedi kpole la ati, ɛnee ɔlɛ adenle kɛ ɔbahakyi yeavi ye nvonleɛ nwo na yeazukoa debie bie mɔɔ ɔhyia kpalɛ la yeavi Gyisɛse ɛkɛ. Yemɔ a le ɛtanefakyɛ. Ɔhyia kɛ yɛ nuhua ko biala sukoa deɛ ɛhye, yemɔti bɛmaa yɛnlea mɔɔ Pita yɛle wɔ ɛhye anwo la.

3, 4. (a) Duzu kpuyia a Pita bizale Gyisɛse a, na duzu a ɔbayɛ kɛ ɛnee wɔ Pita adwenle nu a? (b) Kɛzi Gyisɛse manle ɔlale ali kɛ Pita ɛlɛsukoa menli mɔɔ ɛnva ɛtane ɛngyɛ wɔ zɔhane mekɛ ne anu la ɛ?

³ Kɛyɛ siane nsia mɔɔ zenle hɔle wɔ ye sua zo Kapɛnayɛm la, Pita hɔbizale Gyisɛse kɛ: “Awulae, fane nyɛ yɛɛ me diema fo me a menva mengyɛ ye a? Fane nsuu, anzɛɛ . . . ?” Ɔbayɛ kɛ Pita dwenlenle kɛ ɔlɛda ahunlunyele ali. Ɛnee ɛzonlenlɛ nu mgbanyima mɔɔ wɔ ɛkɛ zɔhane mekɛ ne la kilehile kɛ ɔwɔ kɛ bɛfa ɛtane bɛkyɛ fane nsa ala! Gyisɛse buale ye kɛ: “Kyɛkyɛ, tɛ fane nsuu, na abulasuu [nee] nsuu.”—Mat. 18:21, 22.

⁴ Asoo ɛnee Gyisɛse ɛlɛkile kɛ ɔwɔ kɛ Pita bu awie ɛtane nwo mgbonda? Kyɛkyɛ; emomu, mekɛ mɔɔ ɔhakyile Pita 7 ne ɔyɛle ye 77 la, ɛnee ɔlɛka kɛ ɛlɔlɛ ɛmmaa yɛngyakyi kɛ yɛbava ɛtane yɛahyɛ. (1 Kɔl. 13:4, 5) Gyisɛse manle ɔlale ali kɛ Pita ɛlɛsukoa menli mɔɔ ɛbɔ ye ɛyia na bɛnla ahunlunyele nee fakyɛ ali la. Noko akee, ɔwɔ  kɛ menli mɔɔ kulo kɛ bɛsukoa Nyamenle la fi bɛ ɛhulolɛ nu fa awie mɔ ɛtane kyɛ bɛ.—Bɛgenga 1 Dwɔn 1:7-9.

5. Mekɛ boni a yɛnwu kɛ ɔhyia kɛ yɛfa ɛtane yɛkyɛ a?

⁵ Pita nee Gyisɛse anzu kpolera. Noko asoo Gyisɛse edwɛkɛ ne hanle ye ahonle? Ɔdwu mekɛ ne bie na yɛdayɛ mumua ne yɛhyia fakyɛ nwo kpole a yɛɛ yɛnwu kɛzi nvasoɛ wɔ zo kɛ yɛbava ɛtane yɛahyɛ a. Ɛhye ati bɛmaa yɛzia yɛhɔ ninyɛne mɔɔ sisile kolaa na Gyisɛse awu la azo. Wɔ zɔhane mekɛ ne mɔɔ anu yɛ se la anu, Pita yɛle nvonleɛ dɔɔnwo mɔɔ ɛnee ɔhyia kɛ ɔ Menle ne fa kyɛ ye a.

6. Gyisɛse kilehile ye ɛzoanvolɛ ne mɔ mɛlɛbɛnwoaze nwo debie la, duzu a Pita yɛle a, noko kɛzi Gyisɛse nee ye lile ɛ?

⁶ Ɛnee ɔle nɔsolɛ mɔɔ hyia—nɔsolɛ mɔɔ li awieleɛ wɔ Gyisɛse azɛlɛ ye azo asetɛnla nu. Ɛnee ɔwɔ kɛ Gyisɛse kilehile ye ɛzoanvolɛ ne mɔ ninyɛne dɔɔnwo—titile, mɛlɛbɛnwoaze. Gyisɛse yɛle mɛlɛbɛnwoaze nwo neazo manle bɛ ɔlua bɛ gyakɛ anwo mɔɔ ɔnrinzinle, gyima mɔɔ sonvolɛ mɔɔ ba aze kolaa a yɛ la. Mɔlebɛbo ne, Pita bizale Gyisɛse saa ɔbanrinzi ɔ gyakɛ anwo a. Yeangulo kɛ Gyisɛse banrinzi ɔ gyakɛ anwo. Akee ɔhanle kɛ ɔmmanrinzi ɔ gyakɛ anwo ala na ɔnrinzi ɔ sa anwo nee ɔ ti zo amuala noko! Gyisɛse anva ɛya, emomu ɔhilehilele deɛmɔti ɔlɛyɛ zɔ la anu.—Dwɔn 13:1-17.

7, 8. (a) Ndenle boni mɔ azo a Pita zɔle Gyisɛse abotane nleanle a? (b) Kɛzi Gyisɛse hɔle zo lale fakyɛ subane ali ɛ?

⁷ Ɛhye anzi mekɛ ekyi bie, Pita zɔle Gyisɛse abotane nleanle bieko. Ɛzoanvolɛ ne mɔ zule kpolera wɔ mɔɔ le kpole wɔ bɛ nu la anwo, na ɛnee Pita boka anwomemaazo debie ɛhye anwo. Noko akee, Gyisɛse vile ahunlunyele nu denrɛdenrɛle bɛ na ɔhanle debie kpalɛ mɔɔ bɛyɛ la anwo edwɛkɛ; nɔhalɛlilɛ mɔɔ bɛvale bɛ nee bɛ Menle ne luale la. Ɔhanle kɛ bɛbakpo ye. Na Pita buale kɛ ɔnrɛgyakyi ye, saa bɔbɔ ɔwɔ kɛ ɔwu a. Gyisɛse hanle hilele Pita kɛ, ɔbakpo ɔ Menle ne fane nsa wɔ nɔe zɔhane kolaa na akɔlɛ abɔ fane nwiɔ. Pita anzu Gyisɛse edwɛkɛ ne anwo kpolera ala, emomu ɔmemanle ɔ nwo zo ɔhanle kɛ ɔbali nɔhalɛ yeamaa ye yeadɛla ɛzoanvolɛma mɔɔ ɛha la amuala!—Mat. 26:31-35; Mak. 14:27-31; Luku 22:24-28; Dwɔn 13:36-38.

⁸ Asoo Gyisɛse vale Pita anwo ɛya? Nɔhalɛ nu, wɔ mekɛ ɛhye mɔɔ ɛnee nuhua yɛ se la anu, Gyisɛse hɔle zolɛ nleanle ninyɛne mgbalɛ mɔɔ wɔ ye ɛzoanvolɛma mɔɔ bɛnli munli la anu la. Ɛnee ɔze kɛ Pita bakpo ye, noko ɔhanle kɛ: “Mezɛlɛ memaa wɔmɔ Saemɔn,  amaa wɔ diedi amkpo aze. Na saa ɛsia ɛba me nwo bieko a, si ɛ mediema ne mɔ ahonle.” (Luku 22:32) Gyisɛse nyianle anwodozo kɛ Pita bahakyi avi ye nvonleɛ nwo na yeazonle Nyamenle nɔhalɛ nu. Nea kɛzi Gyisɛse lale fakyɛ subane ali a!

9, 10. (a) Ɛdenrɛdenrɛlɛ boni a ɛnee Pita hyia nwo wɔ Gɛtesɛmani tola ne anu a? (b) Duzu a Pita nvonleɛ ne maa yɛkakye a?

⁹ Nzinlii wɔ Gɛtesɛmani tola ne anu, ɛnee Pita hyia ɛdenrɛdenrɛlɛ bieko. Gyisɛse hanle hilele ɔ nee Gyemise yɛɛ Dwɔn kɛ bɛhɔ zo bɛzinza na Ɔkazɛlɛ. Ɛnee Gyisɛse ɛlɛnwu nyane kpole na ɔhyia moalɛ, noko Pita nee ɛzoanvolɛma mɔɔ ɛha la lafele fane dɔɔnwo. Gyisɛse dele deɛmɔti ye ɛzoanvolɛ ne mɔ yɛle zɔhane la abo na ɔvale ɔhyɛle bɛ, yemɔti ɔhanle kɛ: “Sunsum ne kulo na nwonane ne ɛngola.”—Mak. 14:32-41.

¹⁰ Yeangyɛ, menli dɔɔnwo bie mɔɔ bɛdedɛ dadeɛ, ahoholombaka nee ahanlaneɛ la rale. Ɛnee ɔwɔ kɛ Pita nea boɛ na ɔmaa ɔ nye da ɛkɛ wɔ mekɛ ɛhye anu. Noko ɔpelele ɔ nwo na ɔhwenle dadeɛ ɔpɛle ɛsɔfo kpanyinli ne akɛlɛ Malekɛse anzo ko. Gyisɛse denrɛdenrɛle Pita wɔ adenle kɛnlɛma zo, ɔyɛle hanlɛ ne ayile na ɔhilehilele deɛmɔti ɔnle kɛ Ye ɛzoanvolɛma ne yɛ basabasa la anu ɔhilele ye. (Mat. 26:47-55; Luku 22:47-51; Dwɔn 18:10, 11) Ɛnee Pita ɛyɛ nvonleɛ dɔɔnwo mɔɔ ɔwɔ kɛ ɔ Menle ne fa kyɛ ye. Ye edwɛkɛ ne maa yɛnwu kɛ yɛ muala yɛyɛ ɛtane dahuu. (Bɛgenga Gyemise 3:2.) Yɛ nuhua boni a ɛngyia Nyamenle fakyɛ alehyenlɛ biala a? Wɔ zɔhane nɔe ne, ɛnee Pita bayɛ nvonleɛ mgbole dɔɔnwo.

11, 12. (a) Kɛzi Pita lale akɛnrasesebɛ ali wɔ mekɛ mɔɔ bɛhyele Gyisɛse la ɛ? (b) Kɛzi Pita vonle wɔ mɔɔ ɔhanle kɛ ɔbayɛ la anwo ɛ?

¹¹ Gyisɛse zele ɛlɔne ne kɛ, saa ɔdaye a bɛkpondɛ ye a ɛnee bɛmaa ye ɛzoanvolɛma ne ɛhɔ. Ɛlɔne ne hyele Gyisɛse la, Pita angola anyɛ nwolɛ ɛhwee. Akee ɔnriandile kɛmɔ ɛzoanvolɛma mɔɔ ɛha la yɛle la.

¹² Pita nee Dwɔn gyinlanle, bie a mekɛ mɔɔ bɛdwule Anase mɔɔ ɛnee le Ɛsɔfo Kpanyinli la sua ne anwo, ɛleka mɔɔ bɛlumuale bɛvale Gyisɛse bɛhɔle la. Bɛvale Gyisɛse bɛvile ɛkɛ ne la, Pita nee Dwɔn doale ye “nanamogya.” (Mat. 26:58; Dwɔn 18:12, 13) Ɛnee Pita ɛnle foanvoanle. Ɔhyia akɛnrasesebɛ na awie ahola ali menli ne anzi anlea ɛleka mɔɔ bɛ nee Gyisɛse ɛlɛkɔ la. Ɛnee ɛlɔne ne dedɛ konle ninyɛne na Pita ɛlumua ɛboda bɛ nuhua ko. Ɔnva nwo kɛ ɛnee Pita ɛnle foanvoanle la, yeannyia akɛnrasesebɛ yeanli nɔhalɛ yeammaa Gyisɛse kɛmɔ ɔhanle la.—Mak. 14:31.

13. Adenle kpalɛ boni azo a yɛbahola yɛadoa Kelaese a?

 ¹³ Ɛnɛ, menli dɔɔnwo doa Kelaese “nanamogya,” kɛmɔ Pita yɛle la na bɛngulo kɛ awie banwu bɛ. Noko kɛmɔ Pita hɛlɛle ye nzinlii la, adenle mɔɔ awie bahola alua zo abeta Kelaese kpalɛ la a le kɛ ɔbabikye Ye, na yeazukoa Ye neazo ne wɔ debie biala anu ɔnva nwo kɛzi ye tɛnlabelɛ ne de la.—Bɛgenga 1 Pita 2:21.

14. Nienwu a Pita dɛnlanle wɔ nɔe ne mɔɔ ɛnee bɛlɛdi Gyisɛse edwɛkɛ la ɛ?

¹⁴ Pita doale Gyisɛse rale sua kpole mɔɔ wɔ Gyɛlusalɛm la anu. Ɛsɔfo kpanyinli Kayafase mɔɔ ɔlɛ ezukoa nee tumi la sua ɔ. Ɛnee bɛta bɛsi azua ɛhye mɔ mɔɔ lɛ alie nwo la na bɛkye nwolɛ bɛfa anlenkɛ bɛto ɔ nyunlu. Pita dwule anuhɔlɛ ne la, bɛammaa yeangɔ nuhua. Dwɔn mɔɔ ɛnee yelumua yewolo na ɔze ɛsɔfo kpanyinli ne la rahanle hilele sinzavolɛ ne kɛ ɔmaa Pita adenle. Ɔbayɛ kɛ Pita nee Dwɔn anlua; anzɛɛ yeambɔ mɔdenle kɛ ɔwolo yeahɔgyinla ɔ Menle ne afoa. Ɔdɛnlanle alie nwo ɛkɛ, ɛleka mɔɔ ngɛkɛlɛ nee sonvolɛma ɛlɛte senle nɔe ne la na ɔlɛnea alasevolɛ adalɛma mɔɔ bɛlɛba bɛarali daselɛ bɛatia Gyisɛse la.—Mak. 14:54-57; Dwɔn 18:15, 16, 18.

15, 16. Kilehile kɛzi Gyisɛse edwɛkɛ ne mɔɔ se Pita bakpo ye fane nsa rale nu la anu.

¹⁵ Pita de senle ne anwo la, sonvolɛ raalɛ ne mɔɔ manle Pita adenle la nwunle ye kpalɛ. Ɔhakyele ye. Na ɔzele ye kɛ: “Ɛdawɔ noko ɛ nee Gyisɛse mɔɔ vi Galeli la a lua a!” Ɔzinle Pita anwo na ɔbɔle adalɛ kɛ ɔnze Gyisɛse anzɛɛ ɔnze mɔɔ ɔlɛka la anwo bie. Ɔvindele ɔhɔgyinlanle anlenkɛ ne anloa kpɔda bie abo amaa awie annwu ye, noko bɛlɛra ko noko nwunle ye na ɔhanle edwɛkɛ ko ne ala kɛ: “Nrenya ɛhye nee Gyisɛse mɔɔ vi Nazalɛte la a lua a.” Pita hanle ndane kɛ: “Menze nrenya ne hweledede!” (Mat. 26:69-72; Mak. 14:66-68) Ɔbayɛ kɛ mekɛ mɔɔ Pita kpole ye fane nwiɔ ne azo la yɛɛ ɔdele kɛ akɔlɛ ɛbɔ a, noko yeangakye Gyisɛse edwɛkɛ ne mɔɔ ɔhanle kɛyɛ dɔnehwele ekyi mɔɔ ɛze ɛhɔ la ɔluakɛ ɛnee ninyɛne dɔɔnwo ɛlɛgyegye ye.

¹⁶ Mekɛ ekyii guale nu la, Pita bɔle mɔdenle biala kɛ ɔnrɛmaa awie ɛnrɛnwu ye. Noko menli ekpunli bie mɔɔ ɛnee gyi ɔ nwo ɛkɛ wɔ alie ne anwo la bikyele ye. Bɛ nuhua ko le Malekɛse, sonvolɛ ne mɔɔ Pita bodale ye la busuanli. Ɔzele Pita kɛ: “Tɛ wɔmɔ a menwunle wɔ kɛ ɛ nee ye wɔ tola ne anu la ɔ?” Pita dele nganeɛ kɛ ɔwɔ kɛ ɔmaa bɛnwu kɛ bɛvo. Yemɔti ɔhanle ndane ɔlile amonle kɛ ɔnze nrenya ne mɔɔ ɔlɛka ɔ nwo edwɛkɛ la. Ye fane nsa azo mɔɔ Pita kpole Gyisɛse la ɛne. Ɔhanle ɔwiele la yɛɛ akɔlɛ bɔle a—fane nwiɔ mɔɔ Pita dele kɛ akɔlɛ ɛbɔ wɔ nɔe ne la ɛne.—Dwɔn 18:26, 27; Mak. 14:71, 72.

17, 18. (a) Pita nwunle kɛ yeangola yeanli nɔhalɛ yeammaa ɔ Menle ne la, duzu a ɔyɛle a? (b) Duzu a Pita dwenlenle nwolɛ a?

 ¹⁷ Ɛnee bɛ nee Gyisɛse ɛra abenlana ne anu. Zɛhae mekɛ ye anu a ɔ nye yiale Pita kɛmɔ yɛlumua yɛha ye wɔ tile ɛhye mɔlebɛbo la. Pita hakyele kɛzi yeangola yeanli nɔhalɛ yeammaa ɔ Menle ne la. Alɔbɔlɛ ngome hunle ye manle ɔvindele. Ɔhɔle sua ne awɔdenle ne mɔ azo nehane mɔɔ ɛnee aleɛ ɛtɛkyenle kpalɛ la. Ɔ nye gyinlegyinlanle monle. Na ɔzunle alɔbɔlɛ ɛzunlɛ.—Mak. 14:72; Luku 22:61, 62.

¹⁸ Saa awie nwu ye kɛ yeyɛ ɛtane kpole a, ɔte nganeɛ kɛ bɛnrɛva bɛnrɛhyɛ ye. Bie a Pita dwenlenle kɛ Gyisɛse ɛnrɛva ye ɛtane kpole ɛhye ɛnrɛhyɛ ye. Asoo ɔle zɔ?

19. Duzu nganeɛ a ɔbayɛ kɛ Pita dele wɔ ye nvonleɛ ne anwo a, na kɛzi yɛkola yɛnwu kɛ ɔ sa nu ando ɛ?

¹⁹ Bie a aleɛ hyenle na Pita nwunle mɔɔ ɛdo Gyisɛse la ɔlile alɔbɔlɛ kpole. Nea kɛzi ɔdwenlenle nwolɛ wɔ mekɛ mɔɔ bɛbodɛbodale Gyisɛse na bɛhunle ye nzinlii la! Ɔbayɛ kɛ Pita hakyele kɛ yemaa ɔ Menle ɛli nyane wɔ Ye azɛlɛ ye azo ngoane mekɛ mɔɔ li awieleɛ la anu la, ɔlile nyane dɔɔnwo. Ɔnva nwo kɛzi ɛnee Pita ɛlɛdi nyane la, yeammaa ɔ sa nu ando. Yɛze ɛhye ɔluakɛ, kɛlɛtokɛ ne ka kɛ ɔdoale ye sunsum nu mediema ne mɔ mɔɔ ɛha la bieko. (Luku 24:33) Nɔhalɛ nu, mɔɔ ɛzoanvolɛma ne yɛle wɔ zɔhane nɔe ne la yɛle bɛ nyane, na bɛmanle bɛ nwo anwosesebɛ.

20. Duzu a yɛbahola yɛazukoa yɛavi Pita kpɔkɛ kpalɛ ne mɔɔ ɔzile la anu a?

²⁰ Yɛnwu Pita wɔ adenle bie azo kɛ ɔlɛsi kpɔkɛ mɔɔ nrɛlɛbɛ wɔ nu wɔ zɛhae mekɛ ye anu. Saa Nyamenle sonvolɛ bie tɔ aze a, mɔɔ hyia kpalɛ la a le kɛ ɔbabɔ mɔdenle kɛ ɔbadwazo na ɔnrɛnlea kɛzi ye ɛtane ne de la. (Bɛgenga Mrɛlɛbulɛ 24:16.) Pita lale nɔhalɛ diedi ali wɔ mekɛ mɔɔ ɔdoale ɔ mediema ne mɔ la ɔnva nwo kɛ ɛnee ɔlɛdi alɔbɔlɛ la. Saa awie ɛlɛdi alɔbɔlɛ anzɛɛ ɔ sa nu to a, bie a ɔbadwenle kɛ ɔwɔ kɛ ɔte ɔ nwo, noko zɔhane mɔɔ ɔbayɛ la bahola ayɛ ngyegyelɛ kpole. (Mrɛ. 18:1) Debie mɔɔ nrɛlɛbɛ wɔ nu mɔɔ ɔbahola yeayɛ la a le kɛ ɔ nee ɔ mediema diedima badɛnla na yeanyia anwosesebɛ mɔɔ baboa ye yeamaa yeazonle Nyamenle la.—Hib. 10:24, 25.

21. Ɔluakɛ ɛnee Pita nee ɛdoavolɛma ne bɔ nu yia la ati, duzu edwɛkɛ a ɔdele a?

 ²¹ Ɔluakɛ ɛnee Pita nee ɛdoavolɛma ne bɔ nu yia la ati, ɔdele edwɛkɛ azibɛnwo mɔɔ le kɛ Gyisɛse funli ne ɛnle nla ne anu. Pita nee Dwɔn nriandile hɔle nla ne azo ɛleka mɔɔ bɛziele Gyisɛse na bɛnyinle ɔ nloa la. Dwɔn mɔɔ ɔbayɛ kɛ ɛnee ɔle kpavolɛ la a lumuale dwule a. Ɔnwunle kɛ bɛdukue nla ne anloa la, yeanwolo nu. Noko Pita anyɛ zɔ. Ɔnva nwo kɛ ɛnee yevɛ la, ɔwolole nuhua. Ɔnwunle kɛ ɔnla ɛkɛ!—Dwɔn 20:3-9.

22. Duzu a manle Pita nyane nee ye alɔbɔlɛ ne vile ɛkɛ a?

²² Asoo Pita liele lile kɛ Gyisɛse ɛdwazo? Mɔlebɛbo ne yeanlie yeanli, ɔnva nwo kɛ ɛnee anwumabɔvolɛma ɛye bɛ nwo ɛhile mraalɛ nɔhavoma bie mɔ na bɛha kɛ bɛdwazo Gyisɛse la. (Luku 23:55–24:11) Noko, alɔbɔlɛ nee nyane mɔɔ ɛnee Pita ɛlɛdi la vile ɛkɛ wɔ ye aledwolɛ nu. Kɛkala, Gyisɛse de aze wɔ sunsum nu! Ɔyele ɔ nwo ɔhilele ye ɛzoanvolɛma ne amuala. Noko, ɔlumuale ɔyele ɔ nwo ɔhilele Pita. Ɛzoanvolɛma ne hanle wɔ zɔhane kenle ne kɛ: “Amgba, Awulae ɛdwazo! Yeye ɔ nwo yehile Saemɔn.” (Luku 24:34) Nzinlii ɛzoanvolɛ Pɔɔlo hɛlɛle kenle titile zɔhane anwo edwɛkɛ kɛ, Gyisɛse ‘yele ɔ nwo hilele Sifase na nzinlii ɔyele ɔ nwo ɔhilele ɛzoanvolɛma bulu nee nwiɔ ne.’ (1 Kɔl. 15:5) Sifase nee Saemɔn le Pita aluma bieko. Gyisɛse yele ɔ nwo hilele Pita wɔ kenle zɔhane wɔ mekɛ mɔɔ ɔhale ɔ ngome la.

23. Duzu ati a ɔhyia kɛ Keleseɛnema mɔɔ kɛyɛ ɛtane la kakye Pita edwɛkɛ ne ɛ?

²³ Baebolo ne anga mɔɔ zile wɔ mekɛ mɔɔ Gyisɛse nee Pita yiale bieko la. Nea kɛzi Pita anye liele kɛ ye Awulae de ngoane nu na yenyia adenle kɛ ɔbaha ye nyane nee ɔ nwo mɔɔ yenlu la anwo edwɛkɛ yeahile ye a. Ɛnee Pita hyia fakyɛ tɛla debie biala mɔɔ wɔ ewiade la. Nwane a bahola aha kɛ Gyisɛse anva Pita ɛtane angyɛ ye a? Ɔwɔ kɛ Keleseɛnema mɔɔ wɔ ɛkɛ ɛnɛ mɔɔ kɛyɛ ɛtane la kakye Pita edwɛkɛ ne. Ɔnle kɛ yɛdwenle kɛ Nyamenle ɛnrɛva yɛ ɛtane ɛnrɛhyɛ yɛ. Gyisɛse lale ɔ Ze mɔɔ ‘ɔbava ɛtane yeahyɛ’ la subane ali.—Aye. 55:7.

24, 25. (a) Ka fɛlɛ mɔɔ Pita hɔhyele ye nɔe ne wɔ Galeli Nyevile ne anu la anwo edwɛkɛ. (b) Kɛzi Pita yɛle ye nyɛleɛ wɔ Gyisɛse nwanwane debie mɔɔ ɔyɛle ye wɔ aleɛbahye ne la anwo ɛ?

²⁴ Gyisɛse hanle hilele ye ɛzoanvolɛma ne kɛ bɛyia ye wɔ Galeli. Bɛdwule la, Pita yɛle ye adwenle kɛ ɔkahye fɛlɛ wɔ Galeli Nyevile ne anu. Bɛ nuhua dɔɔnwo nee ye hɔle. Pita hɔle azule ne mɔɔ ɔvale ye ngoane mekɛ dɔɔnwo ɔyɛle gyima wɔ zo wɔ mekɛ bie mɔɔ ɛze ɛhɔ la azo. Ɔluakɛ ɛnee Pita le fɛlɛkyevo dɛba la ati, ɛnee anwoma  ne mɔɔ ɛlɛbɔ ɛlɛne ne, azɛlɛkye ne mɔɔ ɛlɛbu nee avonle ne mɔɔ bɛbahwe ye bɛ sa nu la ɛnle fofolɛ wɔ ɔ nye zo. Mrenya ne mɔ angye fɛlɛ wɔ zɔhane nɔe ne.—Mat. 26:32; Dwɔn 21:1-3.

²⁵ Aleɛbahye ne, awie vɛlɛle bɛ wɔ ɛnwea ne anloa na ɔhanle kɛ bɛdo bɛ avonle ne wɔ ɛlɛne ne anzi nehane. Bɛdiele na bɛhwenle la, bɛhyele fɛlɛ 153! Ɛnee Pita ze sonla zɔhane. Ɔwulule ɔdɔle azule ne anu ɔweɛle ɔrale file zo. Gyisɛse dondonle fɛlɛ manle ye ɛzoanvolɛ nɔhavoma ne mɔ. Ɔvale ye adwenle ɔziele Pita anwo zo ɛsesebɛ.—Dwɔn 21:4-14.

26, 27. (a) Nwolɛ adenle boni a Gyisɛse vale manle Pita fane nsa ɛ? (b) Kɛzi Gyisɛse hilele kɛ yeva Pita ɛtane yehyɛ ye kolaa ɛ?

 ²⁶ Gyisɛse bizale Pita saa ɔkulo ye Awulae kpalɛ ‘ɔtɛla ɛhye mɔ’ a—ɛnee ɔlɛka fɛlɛ dɔɔnwo ne mɔɔ ɔhyele la anwo edwɛkɛ. Wɔ Pita ahonle nu, asoo ɔbamaa fɛlɛhyelɛ ne anwo ɛlɔlɛ avo Gyisɛse anwo ɛlɔlɛ mɔɔ ɔlɛ la azo? Kɛmɔ ɛnee Pita ɛkpo ye Awulae ne fane nsa la ati, Gyisɛse manle ye adenle kɛ ɔzi ɛlɔlɛ mɔɔ ɔlɛ ɔmaa ye la azo fane nsa wɔ ɔ gɔnwo mɔ anyunlu ɔhile ye. Kɛmɔ Pita yɛle la, Gyisɛse hanle kɛzi ɔwɔ kɛ ɔda zɔhane ɛlɔlɛ ne ali la ɔhilele ye: yemɔ a le kɛ ɔbava sunsum nu ninyɛne yealumua, yeamaa bɛ sunsum nu aleɛ, anwosesebɛ, na yeanlea Kelaese mboane ne mɔ, Ye ɛdoavolɛ nɔhavoma ne kpalɛ.—Luku 22:32; Dwɔn 21:15-17.

²⁷ Gyisɛse hilele kɛ Pita anwo hyia ye nee ɔ Ze. Pita bayɛ gyima titile bie wɔ asafo ne anu wɔ Kelaese adehilelɛ bo. Nea kɛzi ɛhye kile kɛ ɔvale ɔhyɛle ye kolaa a! Pita anye liele kɛ Gyisɛse ɛva ye ɛtane ɛhyɛ ye na ɔzukoale debie ɔvile ye nvonleɛ ne anu.

28. Adenle boni azo a Pita rayɛle kɛ bodane kɛmɔ ye duma ne kile la ɛ?

²⁸ Pita vale nɔhalɛlilɛ yɛle ye gyima ne wɔ ɛvolɛ dɔɔnwo anu. Ɔmanle ɔ mediema ne mɔ anwosesebɛ kɛmɔ Gyisɛse hanle hilele ye wɔ kenle mɔɔ aleɛ kye a ɔbawu la. Pita nleanle Kelaese mboane ne mɔ na ɔmanle bɛ aleɛ wɔ abotane nee atiakunlukɛnlɛma nu. Pita nyianle diedi mɔɔ ɔyɛ se kɛ bodane na ɔrayɛle neazo kpalɛ ɔmanle menli mɔɔ wɔ asafo ne anu la, kɛmɔ duma mɔɔ Gyisɛse vale manle ye kile la—Bodane. Yɛnwu ɛhye anwo neazo dɔɔnwo wɔ kɛlata nwiɔ ne mɔɔ Pita hɛlɛle mɔɔ ɔrayɛle mbuluku mɔɔ anwo hyia wɔ Baebolo ne anu la anu. Zɔhane ngɛlata nwiɔ ne maa yɛnwu kɛ Pita arɛle anvi fakyɛ nwo debie mɔɔ ɔzukoale wɔ Gyisɛse ɛkɛ la.—Bɛgenga 1 Pita 3:8, 9; 4:8.

29. Kɛzi yɛbahola yɛazukoa Pita diedi ne nee ɔ Menle ne anwunvɔnezelɛ ne ɛ?

²⁹ Bɛmaa yɛdayɛ noko yɛzukoa zɔhane neazo ne. Asoo yɛsɛlɛ Nyamenle ɛkɛ ɛtanefakyɛ wɔ nvonleɛ mɔɔ yɛyɛ ye dahuu la anwo? Asoo yɛdie fakyɛ zɔhane yɛto nu na yɛdie yɛdi kɛ tumi mɔɔ wɔ nu la bade yɛ nwo ɔ? Asoo yɛfa menli mɔɔ ɛbɔ yɛ ɛyia la ɛtane yɛkyɛ bɛ? Saa yɛyɛ ye zɔ a, yɛbazukoa Pita diedi ne nee ɔ Menle ne anwunvɔnezelɛ ne.