1-3. (a) Kɛzi Ɛseta dele nganeɛ wɔ mekɛ mɔɔ ɔlɛkɔ ɔ hu anyunlu la ɛ? (b) Kɛzi belemgbunli ne liele Ɛseta ɛ?

ƐSETA ɛlɛbikye belemgbunli ebia ne la, ɛnee ye ahonle ɛlɛsi kpalɛ. Pɛ kɛzi Pɛhyea suakunlu ɛhye mɔɔ wɔ Susa la anu ɛyɛ koonwu na Ɛseta kola te ɔ gyakɛ abo nee ye belemgbunli tɛladeɛ ne mɔɔ ɔlɛtwili aze ane la anwo nvoninli nea. Yeanva ye adwenle yeanzie suakunlu ɛkɛ ne kpole, Lɛbanɔn sida mbaka mɔɔ bɛva bɛsili sua ne, nee kɛzi sua ne le kɛnlɛma la azo. Ɔvale ye adwenle ɔziele ahenle mɔɔ de belemgbunli ebia ne anu, kɛ ɔbalie anzɛɛ ɔnrɛlie ye ngoane la anwo zo.

² Ɛseta ɛlɛbikye belemgbunli ne la, ɔnleanle ye koonwu na ɔkpogyale ye ezukoa nvutuke kpɔma ne zo ɔhilele ye. Ɛnee ɔle debie ekyi bie ala, noko yemɔ a liele Ɛseta ngoane a, ɔluakɛ belemgbunli ne luale zo liele ye vile nvonleɛ mɔɔ ɔyɛle kɛ yeanvɛlɛ ye na ɔlɛba ɔ nyunlu ɛkɛ la anu. Ɛseta dudule agyakɛ hɔle ɔ nyunlu na ɔvale ɔ sa ɔhɔhanle belemgbunli tumi kpɔma ne ati.—Ɛst. 5:1, 2.

³ Debie biala mɔɔ wɔ Belemgbunli Ahazelɔse anwo la kile kɛ ɔlɛ ezukoa nee tumi. Pɛhyea arelemgbunli ne mɔ adɛladeɛ mɔɔ ɛnee bɛwula la bolɛ bayɛ dɔla mgbe ɛya ɛya dɔɔnwo wɔ ɛnɛ. Noko Ɛseta nwunle ye wɔ ɔ hu anyunlu kɛ yenyia ɔ nwo ɛhulolɛ. Ɔhanle kɛ: “Belemgbunli Raalɛ Ɛseta, duzu ɔ? Duzu a ɛkpondɛ a? Saa ɛkpondɛ me maanle ye foa ko bɔbɔ a, ɛ sa baha ye.”—Ɛst. 5:3.

4. Ngyegyelɛ boni mɔ a ɛnee la Ɛseta anyunlu a?

⁴ Ɛnee Ɛseta ɛlumua ɛla diedi nee akɛnrasesebɛ mɔɔ le ngakyile la ali; ɔrale belemgbunli ne ɛkɛ kɛ ɔbalie ye menli ne yeavi adwenle ɛtane mɔɔ bɛbɔ kɛ bɛku bɛ la anu. Ɔnva nwo kɛ ɛnee belemgbunli ne ɛlie ye ɛdo nu la, ɛnee ngyegyelɛ mgbole la ɔ nyunlu. Ɛnee ɔwɔ kɛ ɔbɔ mɔdenle ɔmaa belemgbunli ne mɔɔ memaa ɔ nwo zo la die di kɛ ye folɛtuvolɛ ne mɔɔ ɔdie ye ɔdi la le amumuyɛ na yebɛlɛbɛla ye kɛ ɔhu Ɛseta menli ne. Kɛzi ɔbahola yeamaa belemgbunli  ne alie edwɛkɛ ne ali ɛ, na duzu a yɛbahola yɛazukoa yɛavi ye diedi ne anu a?

5, 6. (a) Kɛzi Ɛseta vale ngyinlazo mɔɔ wɔ Nolobɔvo ne 3:1, 7 la lile gyima ɛ? (b) Kɛzi adenle mɔɔ Ɛseta luale zo dendɛle hilele ɔ hu la kile kɛ ɔle nrɛlɛbɛvolɛ ɛ?

⁵ Asoo ɛnee ɔwɔ kɛ Ɛseta ka edwɛkɛ ne kile belemgbunli ne wɔ menli dɔɔnwo ne anyunlu? Bie a ɔyɛ ye zɔ a, ɔbagua belemgbunli ne anyunlu aze na ɔbamaa Heeman anyia adenle aye ɔ nwo ɔ nloa. Yemɔti, duzu a Ɛseta yɛle a? Kolaa na edwɛkɛ ɛhye azi wɔ ɛvoya dɔɔnwo anzi la, sunsum ne manle Belemgbunli Sɔlɔmɔn nrɛlɛbɛvolɛ hɛlɛle edwɛkɛ ɛhye: “Debie biala lɛ ye ɛlobɔ, . . . mekɛ mɔɔ bɛyɛ koonwu, yɛɛ mekɛ mɔɔ bɛtendɛ.” (Nolo. 3:1, 7) Ɔbahola yeara ye kɛ diedinli Mɔdekae, Ɛseta ɔ ze mɔɔ nleanle ye la hilehilele ye ngyinlazo ɛhye mɔ wɔ mekɛ mɔɔ ɔlɛnyi la. Ɛseta dele deɛmɔti ɔwɔ kɛ bɛkpa “mekɛ mɔɔ bɛtendɛ” la abo kpalɛ.

⁶ Ɛseta buale ye kɛ: “Nana, mesɛlɛ wɔ, saa mekola ye ka a anrɛɛ  mese saa ɛkulo a ɛ nee Heeman bɛrɛla me ɛkɛ ɛnɛ nɔsolɛ na meyɛ debie mezie wɔ na bɛrakpula bɛ sa.” (Ɛst. 5:4) Belemgbunli ne liele dole nu na ɔbɔle Heeman amaneɛ. Wɔnwu kɛzi Ɛseta dendɛle nrɛlɛbɛ nu la? Ɔhilele kɛ ɔbu ɔ hu, na ɔyɛle ngyehyɛleɛ mɔɔ ɔbamaa yeanyia mekɛ nee ɛleka kpalɛ yeaha mɔɔ gyegye ye la.—Bɛgenga Mrɛlɛbulɛ 10:19.

7, 8. Kɛzi ɛnee Ɛseta ɛkponledolɛ ne mɔɔ lumua la de ɛ, na duzu ati a ɔdule ye edwɛkɛ ne mɔɔ ɔka yeahile belemgbunli ne la ɔziele ɛ?

⁷ Nɔhalɛ nu, Ɛseta zieziele zɔhane aleɛ ne kpalɛ na ɔnleanle kɛ ɔbava debie biala mɔɔ ɔ hu kulo la bie yeaboka nwo. Ɔvale nwanye kpalɛ mɔɔ maa sonla nye die la ɔbokale ɛkponledolɛ ne anwo. (Edw. 104:15) Ahazelɔse liele ɔ nye, na ɔbizale Ɛseta bieko debie mɔɔ ɔyɛ ɔmaa ye la. Asoo mekɛ ɛhye le kpalɛ maa ye kɛ ɔbadendɛ ɔ?

⁸ Ɛseta annwu ye zɔ. Emomu, ɔdole ɛsalɛ ɔvɛlɛle belemgbunli ne nee Heeman kɛ bɛrakpula bɛ sa bieko wɔ ye alehyenlɛ nu. (Ɛst. 5:7, 8) Duzu ati a ɔdule ɔziele a? Kakye kɛ ɛnee belemgbunli ne ɛli  mɛla kɛ bɛhu Ɛseta menli ne amuala. Saa Ɛseta amkpa mekɛ kpalɛ mɔɔ ɔbadendɛ la a, menli dɔɔnwo bawu. Yemɔti, ɔhendɛle, ɔkpondɛle nwolɛ adenle fofolɛ ɔhilele kɛzi ɔbu ɔ hu kpalɛ la.

9. Nvasoɛ boni a wɔ abotanezilɛ zo a, na kɛzi yɛbahola yɛazukoa Ɛseta neazo ne wɔ ɛhye anu ɛ?

⁹ Abotane le subane mɔɔ anwo hyia na ɔsonle bolɛ. Ɔnva nwo kɛ ɛnee Ɛseta arɛle ɛbɔ na ɔkulo kɛ ɔka mɔɔ ɛlɛsisi la ɔkile belemgbunli ne la, ɔhendɛle mekɛ kpalɛ nu. Yɛbahola yɛazukoa ye neazo ne ɔluakɛ yɛ muala yɛnwu ninyɛndane bie mɔ mɔɔ ɔwɔ kɛ bɛdi nwolɛ gyima la. Saa ɔba ye kɛ ɔwɔ kɛ yɛka ngyegyelɛ bie anwo edwɛkɛ yɛkile awie mɔɔ lɛ tumi la yɛmaa ɔdi nwolɛ gyima a, yɛbahola yɛazukoa Ɛseta abotane ne. Mrɛlɛbulɛ 25:15 ka kɛ: “Sonla mɔɔ lɛ abotane la kola ka edwɛkɛ toonwo maa belemgbunli fa; ɛdendɛlɛ bɛtɛɛ bubu mbowule nu.” Saa yɛkendɛ mekɛ kpalɛ na yɛfa mɛlɛbɛnwoaze yɛtendɛ kɛmɔ Ɛseta yɛle la a, yɛbahola yɛabubu dwazotia mɔɔ yɛ se kɛ bowule la. Asoo Ɛseta Nyamenle Gyihova ne yilale ye abotane nee ye nrɛlɛbɛ ne azo?

10, 11. Heeman vile ɛkponledolɛ mɔɔ lumua la abo la, duzu ati a ye nganeɛdele hakyile ɛ, na duzu a ɔ ye nee ɔ gɔnwo mɔ hanle kɛ ɔyɛ a?

¹⁰ Ɛseta abotane ne bukele adenle manle ninyɛne titile bie mɔ mɔɔ ɛnee ɛlɛba arasisi la. Heeman vile ɛkponledolɛ ne mɔɔ lumua la abo na ɔvale “anyelielɛ nee fɛlɛko” ɔhɔle, ɔluakɛ ɔnwunle kɛ belemgbunli ne nee belemgbunli raalɛ ne ɛbu ye ɛdɛla sonvolɛ biala. Mekɛ mɔɔ ɔdwule suakunlu ne anuhɔlɛ ne la, ɔnwunle Mɔdekae, Dwuunli ne mɔɔ ɛkpo kɛ ɔbabɔ ɔ ti aze yeamaa ye la. Kɛmɔ yɛnwunle ye wɔ tile ne mɔɔ li ɛhye anyunlu anu la, tɛ kɛ asɛɛ Mɔdekae ɛmbu ye, emomu ye adwenle nee abusuabɔlɛ mɔɔ ɔ nee Gyihova lɛ la ati ɔ. Noko Heeman vale “Mɔdekae anwo ɛya kpole.”—Ɛst. 5:9.

¹¹ Heeman hanle ɛbulɛ mɔɔ Mɔdekae ɛmbu ye la hilele ɔ ye nee ɔ gɔnwo mɔ, na bɛzuzule bɛhilele ye kɛ ɔmaa bɛziezie ɛzinzelɛ baka mɔɔ ye anwumahɔlɛ bayɛ mita 22 la, na ɔzɛlɛ adenle ɔvi belemgbunli ne ɛkɛ ɔmaa bɛzinze Mɔdekae wɔ zolɛ. Heeman liele dole nuhua, na amgba noko ɔmanle bɛzieziele ɛzinzelɛ baka ne.—Ɛst. 5:12-14.

12. Duzu ati a belemgbunli ne manle bɛgengale Maanle ne kɛlɛtokɛ bɛhilele ye a, na duzu a ɛhye manle ɔnwunle ye a?

¹² Belemgbunli ne noko anye solole nɔe ne. Baebolo ne ka kɛ, “belemgbunli ne angola da,” yemɔti ɔmanle bɛvale Maanle ne kɛlɛtokɛ ne bɛrɛlɛle ye na bɛgengale bɛhilele ye. Bɛgengale adwenle ɛtane mɔɔ bɛbɔle kɛ bɛku Ahazelɔse la bɛbokale nwo. Ɔhakyele zɔhane edwɛkɛ ne; bɛhyele amumuyɛma ne na bɛhunle bɛ. Na Mɔdekae mɔɔ yele amumuyɛma ne ɔmanle la noko ɛ? Ndɛndɛ ne ala, belemgbunli ne bizale mɔɔ bɛyɛle bɛmanle Mɔdekae la. Bɛhanle kɛ, bɛtɛyɛle ɛhwee bɛtɛmanle ye.—Bɛgenga Ɛseta 6:1-3.

13, 14. (a) Kɛzi ninyɛne angɔ boɛ ammaa Heeman ɛ? (b) Duzu a Heeman aye nee ɔ gɔnwo mɔ hanle hilele ye a?

¹³ Ɛnee belemgbunli ne kpondɛ kɛ ɔsiezie edwɛkɛ ne yemɔti ɔbizale kɛ sonvolɛ boni a wɔ ɛkɛ a. Bɛhanle kɛ Heeman a wɔ suakunlu ɛkɛ ne nwonlomɔ ne a, ɔbayɛ kɛ ɛnee yera kɛ ɔbazɛlɛ adenle yeahu Mɔdekae. Noko kolaa na Heeman aha ye edwɛkɛ ne la belemgbunli ne bizale ye kɛzi ɔwɔ kɛ bɛyɛ awie mɔɔ belemgbunli ne anye ɛlie ɔ nwo la. Heeman dwenlenle kɛ ɔdaye a belemgbunli ne ɛlɛka ɔ nwo edwɛkɛ a. Yemɔti Heeman hilele adenle kɛnlɛma bie: Bɛva belemgbunli adɛladeɛ bɛwula ye, na bɛva ye bɛdɛnla belemgbunli ne ɛkpɔnwɔ zo, na kpanyinli bie ɛva ye ɛdudu gua wɔ Susa azo ɔhanvo ye ɔmaa awie biala ɛde. Nea kɛzi Heeman anyunlu yɛle wɔ mekɛ mɔɔ ɔnwunle kɛ Mɔdekae a ɔwɔ kɛ bɛdi ye eni la! Na nwane a belemgbunli ne hanle kɛ ɔyeyɛ Mɔdekae a? Heeman!—Ɛst. 6:4-10.

 ¹⁴ Ɛnee ɔyɛ Heeman nyane noko ɔyɛle gyima ɛsesebɛ ne na ɔvale abodelɛ ɔnriandile ɔhɔle sua nu. Ɔ ye nee ɔ gɔnwo mɔ hanle kɛ saa yeli Mɔdekae eni ɛdeɛ a ɛnee ɔnrɛhola Dwuunli ne.—Ɛst. 6:12, 13.

15. (a) Nvasoɛ boni a rale abotane mɔɔ Ɛseta zile la zo a? (b) Duzu ati a nrɛlɛbɛ wɔ nu kɛ yɛbanyia ‘ɛhendɛlɛ’ subane ɛ?

¹⁵ Ɔluakɛ Ɛseta nyianle abotane, ɔhendɛle ɔmanle kenle ko radɔle zo kolaa na yeaha ye ngyegyelɛ ne yeahile belemgbunli ne la ati, ɔmanle Heeman nyianle adenle pɛle kuma mɔɔ ɔbadɔ nu la. Asoo ɛnee tɛ Gyihova a ammaa belemgbunli ne angola da la ɔ? (Mrɛ. 21:1) Ɔnyɛ nwanwane kɛ Nyamenle Edwɛkɛ ne maa yɛ anwosesebɛ kɛ yɛnyia ‘ɛhendɛlɛ’ subane la! (Bɛgenga Maeka 7:7.) Saa yɛnyia anwodozo wɔ Nyamenle anu na yɛkendɛ ye a, yɛbanwu kɛ kɛzi ɔdi yɛ ngyegyelɛ nwo gyima la le kpalɛ tɛla mɔɔ yɛdayɛ yɛsuzu la.

16, 17. (a) Mekɛ boni a ɛnee ɔwɔ kɛ Ɛseta ‘tendɛ’ a? (b) Kɛzi ɛnee Ɛseta le ngakyile fi Vahyetae, belemgbunli aye dɛba ne anwo ɛ?

¹⁶ Ɛnee ɔwɔ kɛ Ɛseta nea boɛ na yeanzɔ belemgbunli ne abotane yeannea bieko; wɔ ɛkponledolɛ mɔɔ tɔ zo nwiɔ la abo ɛnee ɔwɔ kɛ ɔka debie biala. Noko mekɛ boni a ɔbayɛ ɛhye a? Kɛmɔ ɔde la, belemgbunli ne manle ye adenle kɛ ɔha debie mɔɔ ɔyɛ ɔmaa ye la. (Ɛst. 7:2) Ɛnee akee mekɛ ɛdwu kɛ Ɛseta ‘tendɛ.’

¹⁷ Yɛbahola yɛadwenle kɛzi Ɛseta yɛle asɔne wɔ ɔ ti anu kolaa na yeaha edwɛkɛ ɛhye mɔ la anwo: “Nana, saa mezɔ ɛ nye na ɔyɛ Nana ɛhulolɛ kɛ ɔkɛyɛ mɔɔ mekpondɛ la amgba a ɛnee Nana, mesɛlɛ wɔ, die me nee me menli ne fi ewule nu.” (Ɛst. 7:3) Yɛ ye nzonlɛ  kɛ ɔmanle belemgbunli ne nwunle kɛ ɔ nye die ye ndɛnebualɛ kpalɛ ne anwo. Nea kɛzi Ɛseta le ngakyile fi Vahyetae, belemgbunli ne aye dɛba ne mɔɔ ɔguale ɔ hu anyunlu aze la anwo a! (Ɛst. 1:10-12) Bieko, Ɛseta andendɛ antia belemgbunli ne kɛ ɔliele Heeman ɔlile la. Emomu, ɔzɛlɛle belemgbunli ne kɛ ɔlie ye ɔvi munzule nu.

18. Kɛzi Ɛseta hanle ngyegyelɛ ne anwo edwɛkɛ hilele belemgbunli ne ɛ?

¹⁸ Zɔhane edwɛkɛ ne zinle belemgbunli ne anwo. Nwane a bava ye belemgbunli raalɛ ne ado esiane nu a? Ɛseta doale zolɛ kɛ: “Bɛdɔne me nee me menli ne bɛmaa kɛ bɛhu yɛ bɛbɔ yɛ bo zo bɔkɔɔ. Saa bɛdɔnenle yɛ kɛ ahanra mrenya nee mraalɛ ala a, anrɛɛ ɔnvane me nwo. Ɔluakɛ yɛ kpɔvolɛ ne ɛhunlɛ mɔɔ ɔbamaa bɛahu yɛ la ɛnrɛhola ɛnrɛzie mɔɔ belemgbunli ne baminli ye la abo zo.” (Ɛst. 7:4) Yɛ ye nzonlɛ kɛ Ɛseta hanle ye ngyegyelɛ ne na ɔvale ɔdoale zo kɛ, saa bɛdɔne bɛ kɛ ahanra a anrɛɛ ɔnvane ɔ nwo. Noko menli dɔɔnwo ne mɔɔ bɛbahu bɛ la baha belemgbunli ne.

19. Duzu a yɛbahola yɛazukoa yɛavi Ɛseta ɛkɛ wɔ kɛzi bɛka edwɛkɛ bɛkile awie la anu a?

¹⁹ Ɛseta neazo ne kile yɛ kɛzi bɛka edwɛkɛ bɛkile awie bɛmaa ɔdie ɔto nu la. Saa yɛka ngyegyelɛ kpole bie anwo edwɛkɛ yɛahile awie mɔɔ yɛkulo ye edwɛkɛ anzɛɛ awie mɔɔ lɛ tumi la a, abotane, ɛbulɛ nee nɔhalɛlilɛ anwo hyia.—Mrɛ. 16:21, 23.

20, 21. (a) Kɛzi Ɛseta kpale Heeman anwo ɛdanlɛ ɛ, na duzu a belemgbunli ne yɛle a? (b) Mekɛ mɔɔ bɛkpale Heeman adwenle ɛtane ne anwo ɛdanlɛ la, duzu a ɔyɛle a?

²⁰ Ahazelɔse bizale kɛ: “Ɛnee nwane a ɔdaye yehola yeyɛ debie zɛhae a, yɛɛ ahenle wɔ nienwu?” Nea kɛ Ɛseta ɛlɛtende ɔ sa abua kɛ: “Kpɔvolɛ ne mɔɔ ɛwie yɛ yɛ la a le Heeman amumuyɛ ɛhye.”  Duzu a ɔbayɛ ye wɔ somolɛ kpole ɛhye anwo a? Heeman ahonle dule. Pɛ kɛzi belemgbunli ne vale ɛya wɔ mekɛ mɔɔ ɔnwunle kɛ ye folɛtuvolɛ ne mɔɔ ɔdie ye ɔdi la ɛmaa yeva ɔ sa yewula mɛla mɔɔ ɔbamaa bɛahu ɔ ye ne mɔɔ ɔkulo ye la abo la anwo nvoninli nea! Ndɛndɛ ne ala belemgbunli ne hɔle tola nu lɔ amaa yeahola yeahomo ɔ nwo zo.—Ɛst. 7:5-7.

²¹ Bɛkpale Heeman adwenle ɛtane ne anwo ɛdanlɛ, na ɔhotole belemgbunli raalɛ ne agyakɛ anu. Mekɛ mɔɔ belemgbunli ne ziale rale na ɔranwunle kɛ Heeman wɔ ɛkpa ne azo ɔlɛsɛlɛ Ɛseta la, ɔvale ɛya ɔhanle kɛ Heeman ɛlɛkulo ɔ ye ne wɔ ɔdaye ye sua nu. Ɛnee ɛhye le ewule edwɛkɛ maa Heeman. Bɛhedale ɔ nyunlu na bɛ nee ye hɔle. Belemgbunli ne suakunlu sonvolɛ ne mɔ ko hanle ɛzinzelɛ baka ne mɔɔ Heeman ɛziezie kɛ ɔfa yeahu Mɔdekae la anwo edwɛkɛ hilele ye. Ndɛndɛ ne ala Ahazelɔse manle bɛhendanle Heeman wɔ baka ne azo.—Ɛst. 7:8-10.

22. Kɛzi Ɛseta neazo ne kile yɛ kɛ ɔnle kɛ yɛmaa yɛ sa nu to, yɛ anyelazo wie na yɛ diedi ka aze ɛ?

²² Wɔ ɛnɛ ewiade mɔɔ amumuyɛ ɛyi nuhua la anu, ɔnyɛ se kɛ ɛbanwu kɛ menli ɛnli pɛlepɛle. Asoo wɔde zɔhane nganeɛ ne bie ɛlɛ? Ɛseta asa nu ando, ye anyelazo anwie, yɛɛ ye diedi ne anga aze. Ɔvale akɛnrasesebɛ ɔhanle mɔɔ le kpalɛ la anwo edwɛkɛ na ɔnyianle anwodozo wɔ Gyihova anu. Bɛmaa yɛyɛ ye zɔhane ala! Gyihova ɛtɛkakyile ɔvi Ɛseta mekɛ zo. Ɔmaa amumuyɛma tɔ kuma ne mɔɔ bɛkɛvu la anu, kɛmɔ ɔyɛle Heeman la.—Bɛgenga Edwɛndolɛ 7:11-16.

23. (a) Ahatualɛ boni a belemgbunli ne vale manle Mɔdekae nee Ɛseta a? (b) Kɛzi Gyekɔbo ngapezo ne mɔɔ fane Bɛngyaman anwo la rale nu ɛ? (Nea ɛlɛka “ Ngapezo Bie Rale Nu.”)

²³ Awieleɛ kolaa ne, belemgbunli ne nwunle Mɔdekae kpalɛ—tɛ kɛ awie mɔɔ ɔbɔ ɔ nwo bane ɔfi maamɔvoma asa nu ala, na emomu awie mɔɔ ɔtetele Ɛseta. Ahazelɔse vale Heeman sonvolɛ kpanyinli dibilɛ ne manle Mɔdekae. Belemgbunli ne vale Heeman sua, nee ye anwonyia kɔsɔɔti manle Ɛseta na ɔdaye ɔmanle Mɔdekae nleanle zolɛ.—Ɛst. 8:1, 2.

24, 25. (a) Duzu ati a bɛkpale Heeman adwenle ɛtane ne anwo ɛdanlɛ la Ɛseta ando ye adwenle nu ɛ? (b) Kɛzi Ɛseta vale ye ngoane dole esiane nu bieko ɛ?

 ²⁴ Kɛkala mɔɔ Ɛseta nee Mɔdekae anwo ɛdɔ bɛ la, asoo ɛnee belemgbunli raalɛ ne ɛnrɛli alɔbɔlɛ bieko ɔ? Kyesɛ ɔle angomedi. Wɔ zɔhane mekɛ ne Heeman mɛla mɔɔ ɔlile kɛ bɛhu Dwuuma amuala la ɛdwu maanle ne ɛleka biala. Ɛnee Heeman ɛhwe adunyi anzɛɛ Pulu—sunsum nu nyɛleɛ bie—amaa yeanwu mekɛ kpalɛ mɔɔ bɛbava bɛahu menli ne la. (Ɛst. 9:24-26) Ɔnva nwo kɛ ɛnee mekɛ ne wale la ɛnee ɔlɛbikye ndɛndɛ. Asoo bɛbahola bɛazi ngyegyelɛ ne adenle?

²⁵ Ɛseta vale ye ngoane dole esiane nu bieko ɔhɔle belemgbunli ne ɛkɛ wɔ mekɛ mɔɔ ɔtɛfɛlɛle ye la. Wɔ mekɛ ɛhye anu, ɔzunle na ɔzɛlɛle ɔ hu kɛ ɔlie ye menli ne ɔvi ewule ɛhye anu. Noko, ɛnee bɛntulu mɛla mɔɔ bɛkɛli ye wɔ Pɛhyea belemgbunli ne duma nu la. (Dan. 6:12, 15) Yemɔti belemgbunli ne manle Ɛseta nee Mɔdekae tumi kɛ bɛli mɛla fofolɛ. Bɛvale edwɛkɛ bieko bɛhɔmanle Dwuuma ne mɔɔ bamaa bɛanyia adenle bɛabɔ bɛ nwo bane a. Menli mɔɔ ka mgbɔnwɔ la vale edwɛkɛ fɛlɛko ne hɔmanle Dwuuma mɔɔ wɔ maanle ne anu ɛleka biala la. Akee Dwuuma ne mɔ nyianle anyelazo. (Ɛst. 8:3-16) Yɛbahola yɛapɛ Dwuuma mɔɔ ɛlɛsiezie bɛ nwo ahɔ konle mɔɔ saa tɛ mɛla fofolɛ ne a anrɛɛ bɛnrɛhola la anwo nvoninli wɔ yɛ adwenle nu. Noko mɔɔ hyia la a le kɛ, asoo “ɛlɔnema Nyamenle” ne baboa ye menli ne ɔ?—1 Sam. 17:45.

26, 27. (a) Kɛzi konim mɔɔ Gyihova manle ye menli ne lile wɔ bɛ agbɔvolɛ nwo zo la ɛnee le kpole ɛ? (b) Ngapezo boni a Heeman amra ne mɔ mɔɔ bɛhunle bɛ la manle ɔrale nu a?

 ²⁶ Mekɛ ne dwule la, ɛnee Nyamenle menli ne ɛziezie bɛ nwo. Pɛhyea mgbanyima dɔɔnwo bɔbɔ boale bɛ wɔ mekɛ mɔɔ bɛdele ye wɔ maanle ne ɛleka biala kɛ Dwuunli Mɔdekae a le sonvolɛ kpanyinli fofolɛ la. Gyihova manle ye menli ne mɔ lile konim kpole. Ɔda ali kɛ ɔbɔle ye menli ne anwo bane amaa bɛangyegye bɛ ɔlua bɛ agbɔvolɛ ne mɔ mɔɔ ɔmanle bɛhonle bɛdɔle la azo. *—Ɛst. 9:1-6.

²⁷ Bieko, ɛnee Mɔdekae anwo ɛnrɛdɔ ye kɛ ɔbava Heeman sua ne wɔ mekɛ mɔɔ ɔ mra mrenya bulu ne de aze la. Yemɔti bɛhunle bɛ muala. (Ɛst. 9:7-10) Baebolo ngapezo bie rale nu, ɔluakɛ ɛnee Nyamenle ɛlumua ɛha Amalɛkema mɔɔ ɛnee bɛle ye menli ne agbɔvolɛ mɔɔ bɛbahu bɛ muala la anwo edwɛkɛ. (Mɛla 25:17-19) Ɔbayɛ kɛ ɛnee Heeman amra ne mɔ boka maanle zɔhane anu menli mɔɔ li awieleɛ mɔɔ bɛzɛkyele bɛ la anwo.

28, 29. (a) Duzu ati a ɛnee ɔle Gyihova ɛhulolɛdeɛ kɛ Ɛseta nee ye menli ne mɔ bahɔ konle a? (b) Duzu ati a Ɛseta neazo ne le nyilalɛ maa yɛ ɛnɛ a?

²⁸ Ɔnva nwo kɛ ɛnee Ɛseta ɛtɛnyinle biala la, ɛzonlelilɛ kpole ralale ɔ nwo zo—bie a le mɛla mɔɔ bɛlile bɛvanenle konle ne nee menli ne ɛhunlɛ nwo la. Ɛnee ɔnla aze. Noko ɛnee Gyihova ɛhulolɛdeɛ a le kɛ ɔbabɔ ye menli ne anwo bane yeavi ɛzɛkyelɛ nu; ɛnee Yizilayɛ maanle ne anu a Mɛzaya ne mɔɔ bɛbɔ ɔ nwo ɛwɔkɛ mɔɔ ɔlua ɔ nwo zo a alesama banyia anyelazo la bavinde a! (Mɔl. 22:18) Nyamenle azonvolɛ mɔɔ bɛwɔ ɛkɛ ne ɛnɛ la anye die nwolɛ kɛ Mɛzaya ne, Gyisɛse rale azɛlɛ ye azo la ɔduale ye ɛdoavolɛma kɛ bɛmmakɔ konle la.—Mat. 26:52.

²⁹ Noko akee, Keleseɛnema ko sunsum nu konle; Seetan anye ɛbolo kɛ ɔsɛkye diedi mɔɔ yɛlɛ wɔ Gyihova Nyamenle anu la. (Bɛgenga 2 Kɔlentema 10:3, 4.) Nea kɛzi Ɛseta neazo ne le nyilalɛ kpole maa yɛ a! Bɛmaa yɛla diedi ali ɔlua nrɛlɛbɛ nee abotane mɔɔ yɛbava yɛaha edwɛkɛ wɔ adenle mɔɔ bamaa menli alie ado nu, yɛanyia akɛnrasesebɛ, na yɛavi ahonle nu yɛagyinla Nyamenle menli ne anzi la azo.