1, 2. Ka Mɛle adendulɛ ne anwo edwɛkɛ na kilehile deɛmɔti ɛnee ɔnla aze ɔmmaa ye la anu.

MƐLE yɛle ye bɔlɛ ne mɔɔ la asoaso ne azo la boɛ. Ɛnee yedɛnla zolɛ dɔnehwele dɔɔnwo. Ɛnee Dwosefi li ɔ nyunlu ɛkɛ ne ala, na ɔlɛyɛ ye ngyikyi ngyikyi ɔ nee ye apɛ adenle tendenle ne ahɔ Bɛtelɛhɛm. Eza Mɛle dele kɛ kakula ne ɛlɛkeha ɔ nwo wɔ ɔ kunlu.

² Ɛnee Mɛle ɛnrenzɛlɛ ne ɛli siane dɔɔnwo; Baebolo ne vale ɛdendɛfoa bie hanle ɔ nwo edwɛkɛ kɛ “ɛnee Mɛle ɛva ɛkolɛ” anzɛɛ ɔka ekyii ɔwo. (Luku 2:5) Ɔbayɛ kɛ mekɛ mɔɔ agyalɛma ɛhye mɔ ɛlɛpɛ nu wɔ awie mɔ ɛya nloa la, ɔyɛle ɛyazonlɛma bie mɔ mɔɔ ɛnee bɛlɛfudu bɛ azɛlɛ ne anzɛɛ bɛlɛdua bɛ ma la azibɛnwo, na ɛnee bɛnnwu deɛmɔti raalɛ ɛhye mɔɔ ɔka ekyii ɔwo la ɛlɛtu adenle tendenle ɛhye la. Duzu a manle Mɛle vile Nazalɛte na ɔlɛtu adenle ɛhye a?

3. Duzu gyima a bɛvale bɛmanle Mɛle a, na duzu a yɛbazukoa wɔ ɔ nwo a?

³ Ɔ muala bɔle ɔ bo wɔ siane dɔɔnwo anu kolaa wɔ mekɛ mɔɔ bɛvale gyima mɔɔ ɔle ngakyile wɔ alasama tetedwɛkɛ nu la bɛmanle Dwuunli bɛlɛra ɛhye la. Ɛnee ɔbawo kakula mɔɔ ɔbarayɛ Mɛzaya, Nyamenle Ara ne! (Luku 1:35) Mɔɔ ye awolɛ kenle ne ɛlɛbikye la, ɛnee ɔhyia kɛ ɔtu adenle ɛhye. Wɔ adendulɛ ne anu, Mɛle yiale ninyɛne mɔɔ zɔle ye diedi ne nleanle la. Bɛmaa yɛnlea mɔɔ ɔboale ye ɔmanle ye diedi ne anu mianle la.

4, 5. (a) Duzu ati a ɛnee Dwosefi nee Mɛle ɛlɛkɔ Bɛtelɛhɛm a? (b) Ngapezo boni a Siza mɛla ne manle ɔrale nu a?

⁴ Tɛ Dwosefi nee Mɛle angome a ɛnee bɛlɛtu adenle ne a. Siza Ɔgɛsetɛse lile mɛla kɛ awie biala ɛhɔ ye sua zo ɛmaa bɛdia ye. Duzu a Dwosefi yɛle a? Kɛlɛtokɛ ne ka kɛ: “Dwosefi vi Nazalɛte mɔɔ wɔ Galeli maanzinli nu la hɔle Belemgbunli Devidi sua zo Bɛtelɛhɛm mɔɔ wɔ Dwudiya maanzinli nu la. Ɔhɔle ɛkɛ ne, ɔluakɛ ɔvi Devidi abusua nu.”—Luku 2:1-4.

 ⁵ Siza mɛla ne nee ɛhye anyia nu ala. Ngapezo mɔɔ bɛlumuale bɛhɛlɛle ye ɛvoya nsuu anu la hanle kɛ bɛbawo Mɛzaya ne wɔ Bɛtelɛhɛm. Ɛnee sua bie mɔɔ bɛfɛlɛ ye Bɛtelɛhɛm mɔɔ ɔvi Nazalɛte mɔɔ kɔ ɛkɛ la le mayɛlɛ nsuu la wɔ ɛkɛ. Noko akee, ngapezo ne hanle ye wienyi kɛ bɛbawo Mɛzaya ne wɔ “Bɛtelɛhɛm Ɛfelata.” (Bɛgenga Maeka 5:2.) Noko saa adenduvoma fi Nazalɛte ahɔ zɔhane namule ekyi ne azo a, ɔwɔ kɛ bɛfa Samɛlea na bɛtia adenle mayɛlɛ 80 mɔɔ la awoka zo la. Bɛtelɛhɛm a bɛhanle kɛ Dwosefi ɛhɔ a, ɔluakɛ ɛnee ɔle Belemgbunli Devidi abusua ne sua zo—abusua mɔɔ Dwosefi nee ɔ ye vi nu la.

6, 7. (a) Duzu ati a Bɛtelɛhɛm adendulɛ ne manle Mɛle yiale ngyegyele ɛ? (b) Kɛzi Dwosefi mɔɔ ɔrayɛle ɔ hu la hanle Mɛle kpɔkɛzilɛ ɛ? (Eza nea ɔ bo ɛkɛ edwɛkɛ ne.)

⁶ Asoo ɛnee Mɛle balie Dwosefi kpɔkɛbɔlɛ ne ado nu? Ye biala anu, ɛnee adendulɛ ne bayɛ se amaa Mɛle. Ɔbayɛ kɛ ɛnee bokile ezule ne ɛlɛbɔ ɔ bo adɔ ngyikyi ngyikyi, ɔluakɛ ɛnee wawaa ne ɛlɛba awieleɛ. Bieko, ɛnee Bɛtelɛhɛm wɔ boka mɔɔ ye anwumahɔlɛ bayɛ mita 760 la azo—yemɔti ɛnee bɛpɛ adenle tendenle ne bɛwie a, ɔwɔ kɛ bɛfo kolaa na bɛadwu sua ne azo. Ɔbayɛ kɛ bɛvale kenle dɔɔnwo a bɛdiale a, ɔluakɛ ɛnee Mɛle tɛnlabelɛ ne bahyia kɛ bɛdie bɛ menle fane dɔɔnwo. Bɛlɛra biala mɔɔ ye awolɛ mekɛ kɛbikye la bahulo kɛ ɔbadɛnla yeabikye sua nu, ɛleka mɔɔ ye abusua ne nee agɔnwolɛma bahola aboa wɔ ye awolɛ nu la. Kpolerazulɛ  biala ɛnle nwolɛ kɛ ɛnee Mɛle hyia akɛnrasesebɛ na yeahola yeadu adenle ɛhye.

⁷ Noko akee, Luku hɛlɛle kɛ “Dwosefi hɔle kɛ ɔkɔ yeamaa bɛadia ye nee Mɛle.” Eza ɔhanle kɛ bɛmanle Dwosefi gyale Mɛle “mɔɔ ɛnee yeyia ye la.” (Luku 2:4, 5) Mɛle rayɛle Dwosefi aye na ɛhye hanle Mɛle kpɔkɛzilɛ. Mɛle nwunle kɛ ɔ hu a le abusua tile mɔɔ ɔbaboa ye yeamaa yeayɛ Nyamenle gyima mɔɔ yeva yemaa ye la, na ɔwɔ kɛ ɔdie ye kpɔkɛzilɛ ɔto nu. * Mɛle hilele kɛ ɔlɛ diedi ɔlua ɔ hu mɔɔ ɔvile ahonle nu ɔdiele ye la azo.

8. (a) Duzu bieko a boale Mɛle manle ɔ nee Dwosefi hɔle Bɛtelɛhɛm a? (b) Kɛzi Mɛle neazo ne le kɛnlɛma maa nɔhavoma ɛ?

⁸ Duzu bieko a manle Mɛle yɛle tieyɛ a? Asoo ɛnee ɔze ngapezo ne mɔɔ se bɛbawo Mɛzaya ne wɔ Bɛtelɛhɛm la? Baebolo ne anga. Noko ɔbahola yeara ye kɛ ɛnee Mɛle ze ye ɔluakɛ ɛnee menli dɔɔnwo ze zɔhane edwɛkɛ ne. (Mat. 2:1-7; Dwɔn 7:40-42) Ɛnee Mɛle ze Ngɛlɛlera ne anu edwɛkɛ kpalɛ. (Luku 1:46-55) Kɛ ɔde ye biala la, saa ɔ hu mɔɔ ɔtie ye, anzɛɛ mɛla bie mɔɔ ɔdi zo anzɛɛ Gyihova ngapezo mɔɔ ɔmaa yeara nu, anzɛɛ edwɛkɛ bie mɔ ati a Mɛle zile kpɔkɛ kɛ ɔtu adenle ne bɔbɔ a, ɔyɛle neazo kɛnlɛma. Gyihova  anye die mrenya nee mraalɛ mɔɔ bɛlɛ bɛ nwo aze bɛyɛ tieyɛ la anwo kpalɛ. Ɛnɛ, Mɛle neazo ne maa yɛ anwosesebɛ kɛ yɛbɛlɛ yɛ nwo aze ɔluakɛ menli dɔɔnwo ɛngulo kɛ bɛyɛ zɔ.

9, 10. (a) Duzu a ɔbayɛ kɛ Mɛle nee Dwosefi dwenlenle nwo wɔ mekɛ mɔɔ ɛnee bɛlɛbikye Bɛtelɛhɛm la ɛ? (b) Nienwu a Dwosefi nee Mɛle lale a, na duzu ati ɔ?

⁹ Ɔbayɛ kɛ Mɛle nwunle Bɛtelɛhɛm wɔ moa ekyi la, ɔgule ɛnwomenle mɔɔ kile kɛ ye ahonle ɛdɔ ye azule nu a. Mekɛ mɔɔ bɛvole awoka ne na bɛlɛpɛ nu wɔ ɔlivi mbaka ne mɔɔ boka ma mɔɔ li awieleɛ mɔɔ bɛbade la abo la, bie a Mɛle nee Dwosefi dwenlenle sua ekyi ɛhye tetedwɛkɛ nwo. Ɛnee ɔle sua ekyi mɔɔ ɔnle kɛ bɛtia bɛboka Dwuda maanle ne anwo kɛmɔ ngapezonli Maeka hanle la; noko ɛkɛ ne a bɛwole Bowaze, Nawome na nzinlii bɛwole Devidi wɔ ɛvolɛ apenle dɔɔnwo mɔɔ zenle hɔle la anu a.

¹⁰ Mɛle nee Dwosefi nwunle kɛ menli dɔɔnwo ɛyi sua ne azo. Menli bie mɔ lumuale rale kɛ bɛdia bɛ, ɛhye ati ɛnee bɛnnyia ɛleka wɔ nyɛvolɛ sua ne anu. * Nɔe ne ɛnee bɛnlɛ ɛleka biala mɔɔ bɛbala a, kyesɛ nane tunli nu. Yɛbahola yɛapɛ mɔɔ Dwosefi yɛle, wɔ mekɛ mɔɔ ɔnwunle kɛ ɔ ye ɛlɛnwu amaneɛ mɔɔ ɛnee ɔtɛnwunle bie ɛlɛ na nuhua ɛlɛyɛ se la anwo nvoninli wɔ yɛ adwenle nu. Ɛleka ɛhye mɔɔ ɛnle kpalɛ la yɛɛ ɔ ko hanle ye a.

11. (a) Duzu ati a mraalɛ mɔɔ wɔ ɛleka biala la bade Mɛle nyane ne abo ɛ? (b) Ndenle boni mɔ azo a ɛnee Gyisɛse le “belamunli ralɛ” a?

¹¹ Mraalɛ mɔɔ wɔ ɛleka biala la bahola ade Mɛle nyane ne abo. Kɛyɛ ɛvolɛ 4,000 mɔɔ lumua la anu, Gyihova hanle dole ɛkɛ ne kɛ mraalɛ muala bade nyane kpalɛ wɔ bɛ awolɛ nu ɔlua ɛtane mɔɔ bɛnyianle bɛvile awolɛ nu la ati. (Mɔl. 3:16) Daselɛ biala ɛnle kɛ mɔɔ kile kɛ Mɛle ande nyane wɔ ye awolɛ nu a. Luku kɛlɛtokɛ ne anga nyane mɔɔ ɔnwunle ye la, na ɔhanle ye sikalɛ kɛ: “Ɔwole ye belamunli ralɛ ne nrenya.” (Luku 2:7) Ɛhɛe, Mɛle wole ye “belamunli” ralɛ ne, na yeanyɛ boɛ fee la ɔwole mralɛ nsuu. (Mak. 6:3) Ɛnee kakula ɛhye bayɛ ngakyile. Ɛnee tɛ ɔngome ye belamunli ralɛ ɔ, emomu Gyihova mumua ne ‘belamunli ralɛ wɔ abɔdeɛ muala anu,’ Nyamenle Ara kokye ne!—Kɔl. 1:15.

12. Nienwu a Mɛle dole ɔ ra ne a, na kɛzi nɔhalɛ ne le ngakyile fi edwɛkɛ mɔɔ ɔnfɛta mɔɔ menli da ye ali wɔ ɔ nwo la anwo ɛ?

¹² Mekɛ ɛhye anu a kɛlɛtokɛ ne ka edwɛkɛ ɛhye mɔɔ menli dɔɔnwo ze ye la a: ‘Ɔvale avuazinli ɔkyekyele ɔ nwo na ɔdole ye nane  adidi ɛlɛka nu wɔ nane tunli bie anu.’ (Luku 2:7) Menli bie mɔ ɛwudu Gyisɛse awolɛ nwo edwɛkɛ ne anu. Akee nea nɔhalɛ mɔɔ wɔ nu la. Adidi ɛlɛka le kyɛnze anzɛɛ debie mɔɔ bɛfa nyɛmoa aleɛ bɛgua nu. Kakye kɛ abusua ne lale nane tunli nu, ɛnee anwoma ɛmbɔ ɛkɛ na ɛkɛ ne le evinli kɛmɔ nane tunli biala anu de ɛnɛ la. Nɔhalɛ nu, awovolɛ boni a bahulo kɛ saa ɛleka fofolɛ wɔ ɛkɛ a ɔbawo ɔ ra wɔ tunli nu a? Awovolɛ dɔɔnwo kpondɛ debie kpalɛ amaa bɛ mra. Ɛnee fane nyɛ a Mɛle nee Dwosefi ɛngulo kɛ bɛfa debie kpalɛ bɛmaa Nyamenle Ara ne ɛ!

13. (a) Adenle boni azo a Mɛle nee Dwosefi vale mɔɔ ɛnee bɛlɛ la yɛle biala mɔɔ bɛbahola la ɛ? (b) Duzu a awovolɛ mɔɔ ze nrɛlɛbɛ la fa dumua kɛmɔ Dwosefi nee Mɛle yɛle la ɛ?

¹³ Noko akee, bɛanva bɛ adwenle bɛanzie tɛnlabelɛ ne mɔɔ ɛnle kpalɛ la azo; bɛvale mɔɔ ɛnee bɛlɛ la bɛyɛle biala mɔɔ bɛbahola la. Kɛ neazo la, Mɛle mumua ne a vale avuazinli kyekyele kakula ne anwo na ɔdole ye adidi ɛlɛka ne anu kɛ ɔla a, ɔnleanle ɔnwunle kɛ ɛyɛlɛ ɛnrɛhu ye na ɔlɛ banebɔlɛ. Ɔnva nwo kɛ ɛnee tɛnlabelɛ ne ɛnle kpalɛ la, Mɛle bɔle mɔdenle nleanle ɔ ra ne. Ɛnee Mɛle nee Dwosefi ze kɛ kakula ne mɔɔ bɛkilehile ye bɛamaa yeahulo Gyihova la a le debie mɔɔ hyia kpalɛ mɔɔ bɛbahola bɛayɛ a. (Bɛgenga Mɛla ne 6:6-8.) Ɛnɛ, awovolɛ mɔɔ ze nrɛlɛbɛ la fa ninyɛne mɔɔ hyia kpalɛ la tete bɛ mra wɔ ewiade mɔɔ ɛmbu Nyamenle ɛzonlenlɛ la anu.

14, 15. (a) Duzu ati a ɛnee mboaneneavolɛ ne mɔ kulo kɛ bɛnwu kakula ne ɛ? (b) Duzu a mboaneneavolɛma ne yɛle wɔ mekɛ mɔɔ bɛnwunle kakula ne wɔ tunli ne anu la ɛ?

¹⁴ Dede bie razɛkyele anzondwolɛ tɛnlabelɛ ne mɔɔ ɛnee bɛwɔ nu la arɛlevilɛ nu. Mboaneneavolɛma rale tunli ne anu, na ɛnee bɛkulo kɛ bɛnwu abusua ne, titile kakula ne. Ɛnee menli ɛhye mɔ anye ɛlie ɛbo zolɛ, na ɛnwu ye wɔ bɛ nyunlu kɛ bɛlɛdi fɛlɛko. Bɛvi awoka ne mɔ azo lɔ, ɛleka mɔɔ ɛnee bɛlɛnea bɛ mboane la a bɛyɛ ye ndɛ bɛra a. * Bɛhanle nwanwane debie mɔɔ bɛnwunle ye la bɛhilele awovolɛ ɛhye mɔ. Wɔ nɔe ne mɔɔ ɛnee bɛlɛnea bɛ mboane wɔ awoka ne mɔ azo la, bɛnwunle anwumabɔvolɛ bie. Gyihova anyunlunyia ne dale bɛ nwo zo na anwumabɔvolɛ ne hanle hilele bɛ kɛ bɛwo Kelaese anzɛɛ Mɛzaya ne kɛkala wɔ Bɛtelɛhɛm. Bɛbanwu kakula ne kɛ bɛva avuazinli bɛkyekye ye na ɔla nyɛmoa  adidi ɛlɛka nu. Akee debie nwanwane bieko zile—anwumabɔvolɛma dɔɔnwo rabokale ko ne na bɛyele Nyamenle ayɛlɛ!—Luku 2:8-14.

¹⁵ Ɔnyɛ nwanwane kɛ menli ɛhye mɔ mɔɔ bɛbɛlɛ bɛ nwo aze la yɛle ye ndɛ hɔle Bɛtelɛhɛm a!Ɔyɛle bɛ azibɛnwo kɛ bɛnwunle kakula ne mɔɔ bɛwo ye fofolɛ na ɔla ye kɛmɔ anwumabɔvolɛ ne hilele la. Bɛanva edwɛkpa ɛhye bɛanvea. “Bɛhanle . . . Na ɔyɛle bɛdabɛ mɔɔ bɛdele mɔɔ mboaneneavolɛma ne mɔ hanle la azibɛnwo.” (Luku 2:17, 18) Ɛnee zɔhane mekɛ ne anu ɛzonlenlɛ nu mgbanyima ne mɔ ɛmbu mboaneneavolɛma. Noko ɛnee menli ɛhye mɔɔ bɛlɛ bɛ nwo aze na bɛlɛ diedi la sonle bolɛ maa Gyihova. Kɛzi ɛkpɔlalɛ ɛhye hanle Mɛle ɛ?

16. Kɛzi Mɛle hilele kɛ ɛnee ɔdwenledwenle edwɛkɛ nwo ɛ, na duzu titile a bamaa ye diedi ne anu amia a?

¹⁶ Mɛle diele edwɛkɛ ne amuala ɔnva nwo kɛ ɛnee nyane mɔɔ ɔnwunle ye wɔ kakula ne ɛwolɛ nu la ɛmaa yevɛ la Na ɔyɛle dɔɔnwo: “Mɛle vale edwɛkɛ ɛhye mɔ amuala ziele ɔ ti anu na ɔdwenlenle nwolɛ kpalɛ.” (Luku 2:19) Ɛnee bɛlɛra ɛhye dwenledwenle edwɛkɛ nwo kpalɛ. Ɔnwunle kɛ anwumabɔvolɛ ne edwɛkɛ ɛhye anwo hyia. Ɛnee ye Nyamenle, Gyihova kpondɛ kɛ ɔnwu kɛzi ɔ ra ne de nee nvasoɛ mɔɔ wɔ ɔ nwo zo la. Yeandie edwɛkɛ ne ala. Ɔbɔle mɔdenle kɛ ɔbava mɔɔ ɔdele la yeazie ɔ ti anu na yeadwenledwenle nwolɛ mekɛ biala. Ɛhye a le debie titile mɔɔ bamaa Mɛle diedi ne anu amia wɔ ye ngoane mekɛ kɔsɔɔti anu a.—Bɛgenga Hibuluma 11:1.

17. Kɛzi yɛbahola yɛazukoa Mɛle neazo ne wɔ sunsum nu nɔhalɛ edwɛkɛ ne anwo ɛ?

¹⁷ Asoo ɛbali Mɛle neazo ne anzi? Nɔhalɛ edwɛkɛ mɔɔ anwo hyia la a wɔ Gyihova Edwɛkɛ ne anu a. Noko akee, kyesɛ yɛdumua yɛtie zɔhane nɔhalɛ edwɛkɛ ne mɔ kolaa na yɛanyia zolɛ nvasoɛ. Baebolo ne mɔɔ yɛkenga ye dahuu la a boa yɛ a—yɛngenga ye kɛ buluku gyɛne bie, emomu kɛ Nyamenle Edwɛkɛ mɔɔ bɛvale ye sunsum a bɛhɛlɛle a. (2 Tem. 3:16) Kɛmɔ Mɛle yɛle la, ɔwɔ kɛ yɛfa nɔhalɛ edwɛkɛ ne yɛsie yɛ ahonle nu na yɛdwenledwenle nwo. Saa yɛdwenledwenle mɔɔ yɛsukoa ye wɔ Baebolo ne anu la anwo, na yɛnwu ndenle mɔɔ yɛbalua zo yɛava Gyihova folɛdulɛ yɛali gyima la a, ɛnee yɛlɛmaa yɛ diedi ne aleɛ amaa yeanyi.

18. (a) Kɛzi Mɛle nee Dwosefi lile Mosisi Mɛla ne azo wɔ Gyisɛse ngakula nu ɛ? (b) Duzu a Dwosefi nee Mɛle afɔlebɔlɛ wɔ ɛzonlenlɛ sua ne anu manle ɔlale ali wɔ bɛ ezukoa gyinlabelɛ nwo a?

¹⁸ Kɛmɔ Mosisi Mɛla ne kile la, Mɛle nee Dwosefi yɛle kakula ne mrenyanu nzonlɛ na bɛdonle ye Gyisɛse kɛmɔ ɛnee bɛha la wɔ kenle mɔtwɛ ne azo. (Luku 1:31) Wɔ kenle 40 ne azo, bɛ nee kakula ne vile Bɛtelɛhɛm diale mayɛlɛ nsia adenle hɔle Gyɛlusalɛm ɛzonlenlɛ sua ne anu na bɛvale abubule anzɛɛ mɔlɔnoma ngyikyi nwiɔ bɛbɔle afɔle kɛmɔ Mɛla ne kile kɛ ehyiavolɛma ɛyɛ la. Saa bɔbɔ Mɛle nee Dwosefi zele nyiane a, bɛdiele mɔɔ Mɛla ne se la na bɛyɛle mɔɔ bɛbahola ye yɛ la. Kɛ ɔde ye biala la, bɛnyianle anwosesebɛmanlɛ dɔɔnwo wɔ mekɛ mɔɔ ɛnee bɛwɔ ɛkɛ la.—Luku 2:21-24.

19. (a) Kɛzi Semɛyɔn hanle edwɛkɛ dɔɔnwo hilele Mɛle manle ɔvale ɔziele ɛ? (b) Duzu a Ana yɛle wɔ mekɛ mɔɔ ɔnwunle Gyisɛse la ɛ?

¹⁹ Nrenya kpanyinli bie mɔɔ bɛfɛlɛ ye Semɛyɔn la rale bɛ nwo ɛkɛ na ɔhanle edwɛkɛ dɔɔnwo ɔhilele Mɛle ɔmanle ɔvale ɔziele ye ahonle nu. Ɛnee bɛbɔ Semɛyɔn ɛwɔkɛ kɛ ɔbanwu Mɛzaya ne kolaa na yeawu, na Gyihova sunsum nwuanzanwuanza ne manle ɔnwunle ye kɛ kakula Gyisɛse a bayɛ Ngoanedievolɛ ne mɔɔ bɛha ɔ nwo edwɛkɛ la. Semɛyɔn bɔle Mɛle kɔkɔ wɔ nyane mɔɔ ɔwɔ kɛ ɔgyinla ɔ nloa kenlebie la anwo. Ɔhanle kɛ ɔbali nyane kɛ asɛɛ dadeɛ mɔɔ yɛ nla la ɛwɔ ye ahonle ne anu. (Luku 2:25-35) Ɔnva nwo kɛ edwɛkɛ  zɔhane bɔle ye kɔkɔ wɔ debie ɛzulolɛ nwo la, bie a ɔboale Mɛle ɔmanle ɔgyinlanle mekɛ ɛsesebɛ ne anloa wɔ ɛvolɛ 33 anzi. Nzinlii, ngapezonli raalɛ Ana nwunle kakula Gyisɛse na ɔhanle kakula ne anwo edwɛkɛ ɔhilele bɛdabɛ mɔɔ bɛ nye la kɛ Nyamenle barakpɔne Gyɛlusalɛm la.—Bɛgenga Luku 2:36-38.

20. Duzu ati a ɛnee ɔle kpalɛ kɛ bɛvale Gyisɛse bɛrale ɛzonlenlɛ sua ne anu wɔ Gyɛlusalɛm ɛ?

²⁰ Nea kɛzi ɛnee ɔle kpalɛ kɛ Dwosefi nee Mɛle vale kakula ne rale Gyihova ɛzonlenlɛ sua ne anu wɔ Gyɛlusalɛm a! Bɛyɛle neazo bɛmanle kakula ne kɛ ɔwɔ kɛ ɔkɔ Gyihova ɛzonlenlɛ sua ne anu wɔ ye ngoane mekɛ muala anu. Bɛvale mɔɔ bɛlɛ ye la amuala bɛmanle Gyihova wɔ ɛzonlenlɛ sua ne anu na bɛdiele adehilelɛ nee edwɛkɛ mɔɔ maa anwosesebɛ. Mɛle vile ɛzonlenlɛ sua ne anu la ɛnee ye diedi nu ɛmia, na ɔnyianle nɔhalɛ edwɛkɛ mɔɔ hyia la dɔɔnwo mɔɔ ɔbadwenledwenle nwo na ɔ nee awie mɔ azuzu nwo a.

21. Kɛzi yɛbahola yɛamaa yɛ diedi nu amia kɛ Mɛle ɛdeɛ ne ɛ?

²¹ Ɔle kpalɛ kɛ awovolɛ bali zɔhane neazo ne anzi ɛnɛ. Gyihova Alasevolɛ awovolɛ fi diedi nu fa bɛ mra kɔ Keleseɛne nyianu. Zɛhae awovolɛ ne mɔ fa mɔɔ bɛlɛ ye biala la maa, na bɛmaa bɛ mediema diedima anwosesebɛ. Na bɛnyia anwosesebɛ, anyelielɛ nee ninyɛne mgbalɛ mɔɔ bɛ nee awie mɔ bazuzu nwo la bɛfi nyianu ne abo. Nea kɛzi yɛ nee bɛ yia a yɛ nye die a! Saa yɛyɛ zɔhane a, yɛ diedi nu bamia kpalɛ kɛ Mɛle ɛdeɛ ne la.