Ahenle mɔɔ rale Annette anwo zo la zuhunle ye dole azɛlɛ ne anwo kolaa na yeanwu ɔ nzi. Ɔka kɛ, “Membɔle mɔdenle biala kɛ mebalie me nwo. Medeɛdeanle nu noko me ne anvinde. Menzuhunle ye, mentietiale ye yɛɛ mendindinle ye. Nuhua yɛɛ mendele kɛ bɛva dadeɛ bɛwɔ me gyakɛ anwo. Mendiale mengetele.”

Saa ɛdawɔ yɛɛ edwɛkɛ ɛhye ɛdo wɔ a, anrɛɛ boni a ɛbayɛ a?

Bie a ɛnee wɔziezie ɛ nwo—ɛbamaa ɛ nye ala ɛkɛ wɔ mekɛ mɔɔ ɛlua alienwo wɔ nɔsolɛ nu la—noko debie ɛtane bahola azi. Baebolo ne ka kɛ, ‘Tɛ menli mɔɔ anwo yɛ ndɛ la a dahuu di konim wɔ ɛnriandilɛ nu a, ɔluakɛ tɛ mekɛ ne amuala a bɛdi ye moavolɛ a.’—Nolobɔvo ne 9:11.

Mgbavolɛ nee mbɛlɛra bie mɔ edwɛkɛ le kɛ Annette ɛdeɛ ne la, menli mɔɔ bɛnze bɛ la a to bɛ bɔna a. Bie mɔ noko menli mɔɔ bɛze bɛ anzɛɛ bɛ mbusuafoɔ a yɛ bɛ zɔ a. Natalie nyianle ɛvolɛ bulu la yɛɛ kpavolɛ bie mɔɔ de bikye bɛ la dole ye bɔna a. Ɔka kɛ, “Mɔlebɛbo ne ɛnee mesulo yɛɛ ɔyɛ me nyiane, yemɔti meanga meangile awie biala.”

Ɛnɛ nee ɛnɛ ala Annette adwenle tɛbua ye fɔlɛ wɔ mɔɔ zile la anwo. Ɔka kɛ, “Metɛkakye mɔɔ zile zɔhane nɔsolɛ ne la kpalɛ. Anrɛɛ ɔwɔ kɛ mebɔ mɔdenle me nee ye ko kpalɛ. Nɔhalɛ nu, ɔwɔle me dadeɛ la ɛzulolɛ hanle me. Ɛnee mengola menyɛ debie biala, noko mete nganeɛ kɛ anrɛɛ ɔwɔ kɛ meyɛ debie.”

Natalie noko adwenle tɛbua ye fɔlɛ. Ɔka kɛ, “Anrɛɛ ɔnle kɛ medie menli medi soma. Me awovolɛ hanle hilele me nee me diema raalɛ ne kɛ yɛlɛdi nwɔhoa wɔ alienwo a anrɛɛ yɛmmate yɛ nwo, noko meandie. Yemɔti menwu ye kɛ medame a memaanle ɛhye dole me a. Mɔɔ zile la gyegyele me abusua ne, mete nganeɛ kɛ medame a memaa bɛli nyane a. Dahuu ɔgyegye me.”

Saa ɛte nganeɛ kɛ Annette anzɛɛ Natalie a, kakye kɛ bɛto awie bɔna a ɔngile kɛ ɔvile ye ɛhulolɛ nu a ɔliele ɔdole nu a. Bie mɔ maa ɔyɛ kɛ asɛɛ nvonleɛ biala ɛnle bɔnadolɛ nwo, bɛka kɛ nrenyia to awie bɔna a ɔnle ɛtane anzɛɛ menli mɔɔ bɛto bɛ bɔna la die to nu. Noko awie ɛnle ɛkɛ mɔɔ ɔfɛta kɛ bɛto ye bɔna a. Saa atisesebɛ edwɛkɛ ɛhye bie ɛdo wɔ ɛlɛ a, tɛ wɔ nvonleɛ ɔ!

Nɔhalɛ nu, “ɔnle wɔ nvonleɛ” ɛgengalɛ ɛnyɛ se; noko ɔbayɛ se kɛ ɛbalie wɔado nu. Bie fa mɔɔ ɛzi la anwo nyane sie bɛ nu ɔti bɛ adwenle bua bɛ fɔlɛ yɛɛ ɔgyegye bɛ. Noko nwane a ɔwɔ kɛ ɔyɛ koonwu wɔ mɔɔ zile la anwo a—ɛdawɔ anzɛɛ ahenle mɔɔ dole wɔ bɔna la? Ɔle wɔ kpɔkɛzilɛ kɛ ɛbadwenle nwo bieko.

Baebolo ne ka kɛ mekɛ mɔɔ tenlenenli Dwobu nyanelilɛ ne yɛle kpole la ɔhanle kɛ: “Mebaha me ahonle nu nyane muala.” (Dwobu 10:1) Ɛyɛ ye zɔ a ɔbaboa wɔ kpalɛ. Ɛka edwɛkɛ ne ɛkile awie mɔɔ ɛdie ye ɛdi la a ɔbaboa wɔ yeamaa wɔanyia adwenle kpalɛ wɔ mɔɔ zile la anwo na yeade wɔ nyanelilɛ ne azo.

Annette nwunle kɛ ɛhye le nɔhalɛ. Ɔka kɛ: “Menganle edwɛkɛ ne mengilele me gɔnwo bie, na ɔhanle kɛ me nee Kilisiene mgbanyima mɔɔ wɔ me asafo ne anu la bie mɔ ɛdendɛ.” Ɔyɛ me fɛ kɛ menyɛle zɔ la. Bɛ nee me dendɛle fane dɔɔnwo na bɛhanle mɔɔ mekulo kɛ mete la bɛhilele me—kɛ, mɔɔ zile la ɛnle me nvonleɛ. Nuhua ko bɔbɔ ɛnle me nvonleɛ.”

Natalie hanle mɔɔ zile la hilele ye awovolɛ. Ɔka kɛ, “Bɛboale me. Bɛmaanle me anwosesebɛ bɛmaanle menganle nwolɛ edwɛkɛ, na yemɔ ammaa meanli nyane nee alɔbɔlɛ bieko.”

Nzɛlɛlɛ eza kyekyele Natalie arɛle. Ɔka kɛ, “Nyamenle mɔɔ me nee ye dendɛle la boale me, titili wɔ mekɛ mɔɔ meangola me nee sonla andendɛ la. Saa meyɛ asɔne a mekola meka nwolɛ edwɛkɛ kpalɛ. Ɔmaa me ahonle tɔ me azule nu na menyia anzodwolɛ.”

Ɛdawɔ noko ɛbahola wɔanwu ye kɛ bɛlɛ “mekɛ mɔɔ bɛyɛ ayile” a. (Nolobɔvo ne 3:3) Nea ɛ nwo boɛ wɔ nwonane nee nganeɛdelɛ nu. Nyia mekɛ die ɛ menle. Mɔɔ hyia kpalɛ la, fa ɛ nwo to Gyihova, arɛlekyekyelɛ Nyamenle ne anwo zo.—2 Kɔlɛntema 1:3, 4.

 Saa ɛle kakula raalɛ na bɛka kɛ ɛyɛ debie mɔɔ ɛnle kpalɛ la a, ɔnle ɛtane kɛ ɛbava anwodozo wɔaha kɛ, “Gyakyi mɔɔ ɛlɛyɛ la!” anzɛɛ “Mmasɔ me nu!” Mmasulo kɛ kpavolɛ ne bagyakyi wɔ. Saa yemɔ ati ɔgyakyi wɔ a, ɛnee noko ɔngulo wɔ! Ɛfɛta nrenyia kpalɛ, awie mɔɔ babu wɔ nee wɔ ngyinlazo ne mɔ la.

“Wɔ sukulu nu, ngakula mrenyia ne mɔ basɔ me brassier ne asa wɔ me nzi twe ye na bɛka kɛ—ɛnyia yɛ ɛ nee yɛ da a ɛ nye balie kpole.”—Coretta.

Ɛdwenle kɛ ngakula mrenyia ɛhye mɔ

1. 1. Ɛlɛbɔ ngoayɛ ɔ?

2. 2. Ɛlɛdi anye zo ɔ?

3. 3. Ɛlɛfa nla agyegye ye ɔ?

“Wɔ kale nu, kakula nrenyia bie bɔle ɔ bo kɛ ɔka edwɛkɛ mgbane mgbane na yeasosɔ me. Membɔle ɔ sa na menganle kɛ ɔvi me nwo ɛkɛ ne. Ɔnleanle me kɛ asɛɛ mele koasea bie la.”—Candice.

Ɛnea a nzɔne debie a ɛnee kakula nrenyia ne ɛlɛfa ayɛ Candice a?

1. 1. Ɔlɛbɔ ngoayɛ ɔ?

2. 2. Ɔlɛdi anye zo ɔ?

3. 3. Ɔlɛfa nla yeagyegye ye ɔ?

“Ɛkenle ɛvolɛ ne, ɛnee dahuu kakula nrenyia bie ka kile me kɛ ɔkulo me na ɔ nee me bɛavinde, menganle mengilele ye kɛ menrɛyɛ. Noko ɔyɛ a, ɔfa ɔ sa ɔduolua me nwo. Menganle mengilele ye kɛ ɔgyakyi noko yeandie. Mekɛ bie mɔɔ ɛnee melɛkyekye me mgbɔlaboa ne la, ɔbɔle me butua anwo.”—Bethany.

Ɛnea a ɛnee kakula nrenyia ɛhye:

1. 1. Ɛlɛbɔ ngoayɛ ɔ?

2. 2. Ɛlɛdi anye zo ɔ?

3. 3. Ɛlɛfa nla yeagyegye ye ɔ?

Kpuya nsa ne amuala anwo mualɛ a le 3 ne.

Boni a maa nla mɔɔ bɛfa bɛgyegye awie la yɛ ngakyile fi anyezolilɛ nee ngoayɛ nwo a?

Menli mɔɔ fa nla gyegye la ɛnze debie bieko kɛ yemɔ ala. Saa bɔbɔ ahenle mɔɔ bɛlɛfa nla bɛagyegye ye la ka kɛ ɔngulo a, bɛngyakyi.

Anyebolo wɔ nla mɔɔ bɛfa bɛgyegye awie la anu. Ɔbahola yeahɔwie bɔnadolɛ nu.