ƐZUKOALƐDEƐ 03
Ɛdie Mɔɔ Baebolo Ne Ka La Ɛdi Ɔ?
Ɛwɔkɛ ngakyile nee folɛdulɛ dɔɔnwo wɔ Baebolo ne anu. Bie a ɛkulo kɛ ɛnwu mɔɔ Baebolo ne kilehile la, noko ɛngola ɛnnwu ye saa mɔɔ ɔka la le nɔhalɛ a. Asoo ɔwɔ kɛ ɛdie ɛwɔkɛ nee folɛdulɛ mɔɔ wɔ tete buluku ɛhye anu la ɛdi? Asoo mɔɔ Baebolo ne ka la bahola aboa wɔ ɛnɛ? Asoo ɛbahola wɔalie mɔɔ ɔka kɛ ɔbara kenle bie la wɔali? Mɔɔ menli dɔɔnwo die di la ɛne. Maa yɛnlea saa ɛdawɔ noko ɛbahola wɔalie wɔali a.
1. Asoo Baebolo ne anu edwɛkɛ le nɔhalɛ anzɛɛ adalɛ?
Baebolo ne maa yɛnwu kɛ “nɔhalɛ edwɛkɛ mɔɔ le pɛpɛɛpɛ la” a wɔ nu a. (Nolobɔvo 12:10) Ɔka menli mɔɔ dɛnlanle aze la anwo edwɛkɛ mɔɔ zile la. (Kenga Luku 1:3; 3:1, 2.) Tetedwɛkɛ kɛlɛvoma nee menli mɔɔ tudu azɛlɛ nwo kpondɛ tete ninyɛne la anu dɔɔnwo ɛlie ɛdo nu kɛ mekɛ, menli, ɛleka yɛɛ ninyɛne mɔɔ Baebolo ne ka nwolɛ edwɛkɛ la le nɔhalɛ.
2. Duzu ati a yɛkola yɛka kɛ Baebolo ne ɛtɛkpale nwo a?
Baebolo ne ta ka ninyɛne bie mɔ anwo edwɛkɛ kolaa na menli anwu ye. Kɛ neazo la, ɔka abɔdeɛ nwo nrɛlɛbɛ nwo edwɛkɛ bie mɔ. Mekɛ mɔɔ Baebolo ne hanle edwɛkɛ ɛhye mɔ la, ɛnee bɛnlie nuhua dɔɔnwo bɛnli. Noko, ɛnɛ abɔdeɛ nwo nrɛlɛbɛvolɛma ɛlie ɛdo nu kɛ mɔɔ Baebolo ne ka la le nɔhalɛ. Ɔle edwɛkɛ mɔɔ “bɛkola bɛfa bɛ nwo bɛto zo mekɛ biala, ɛnɛ nee dahuu” a.—Edwɛne 111:8.
3. Duzu ati a yɛbahola yɛalie mɔɔ Baebolo ne ka kɛ ɔbara kenle bie la yɛali a?
Baebolo ne ‘ka ninyɛne mɔɔ ɛtɛsisile la to ɛkɛ.’ (Ayezaya 46:10) Ɔhanle ninyɛne dɔɔnwo mɔɔ sisile la anwo edwɛkɛ pɛpɛɛpɛ ɔdole ɛkɛ mekɛ tendenle kolaa na bara nu. Eza ɔhanle ninyɛne mɔɔ ɛlɛkɔ zo ɛnɛ la anwo edwɛkɛ dɔɔnwo. Wɔ ɛzukoalɛdeɛ ɛhye anu, yɛbazuzu Baebolo ngapezo bie mɔ anwo. Kɛzi bɛrale nu pɛpɛɛpɛ la yɛ nwanwane!
SUKOA DƆƆNWO
Sukoa kɛzi abɔdeɛ nwo nrɛlɛbɛ nee Baebolo ne yia la anwo debie, na neɛnlea Baebolo ngapezo bie mɔ mɔɔ ka ahonle la anu.
4. Abɔdeɛ nwo nrɛlɛbɛ nee Baebolo ne yia
Wɔ tete ne, ɛnee menli dɔɔnwo die di kɛ azɛlɛ ne gyi debie zo. Ye VIDIO ne.
Yɛ mɔɔ bɛhɛlɛle ye wɔ Dwobu buluku ne anu kɛyɛ ɛvolɛ 3,500 mɔɔ ɛze ɛhɔ la nzonlɛ. Kenga Dwobu 26:7, na akee bɛzuzu kpuya ɛhye anwo:
-
Duzu ati a Baebolo ne anu edwɛkɛ mɔɔ se azɛlɛ ne “debie biala ɛnlɛ nu” la yɛ azibɛnwo a?
Kɛyɛ ɛvolɛ ɛya nwiɔ mɔɔ ɛze ɛhɔ la yɛɛ bɛdele kɛzi nzule mɔɔ tɔ la sia kɔ anwuma na ɔtɔ bieko la abo kpalɛ a. Noko, yɛ mɔɔ Baebolo ne hanle ye kɛyɛ ɛvolɛ 3,500 mɔɔ ɛze ɛhɔ la nzonlɛ. Kenga Dwobu 36:27, 28, na akee bɛzuzu kpuya ɛhye mɔ anwo:
-
Duzu ati a edwɛkɛ sikalɛ ɛhye mɔɔ fale kɛzi nzule tɔ anwo la yɛ wɔ nwanwane ɛ?
-
Baebolo tɛkese ne mɔ mɔɔ wɔgenga ye kɛkala la ɛmaa wɔlie Baebolo ne wɔli kpalɛ ɔ?
5. Baebolo ne hanle ninyɛne titili bie mɔ anwo edwɛkɛ dole ɛkɛ
Kenga Ayezaya 44:27–45:2, na akee bɛzuzu kpuya ɛhye anwo:
-
Edwɛkɛ titili boni mɔ a Baebolo ne hanle dole ɛkɛ ɛvolɛ 200 kolaa na bɛazɛkye Babelɔn a?
Tetedwɛkɛ kile kɛ Pɛhyea Belemgbunli Saelɛse nee ye sogyama lile suakpole Babelɔn anwo zo konim wɔ ɛvolɛ 539 K.Y.M. a Bɛhakyile azule ne mɔɔ bɔ suakpole ne anwo bane la anye. Bɛvale ye nlenkɛ mgbole ne mɔ mɔɔ bɛantoto nu la anu bɛhɔle suakpole ne azo, na bɛzɛkyele ye mɔɔ bɛ nee bɛ ango a. Bɛzɛkyele Babelɔn la yebo ɛvolɛ 2,500 noko badwu ɛnɛ bɛtɛkolale bɛtɛkyekyele ye bieko. Yɛ mɔɔ Baebolo ne hanle dole ɛkɛ ne la nzonlɛ.
Kenga Ayezaya 13:19, 20, na akee bɛzuzu kpuya ɛhye anwo:
-
Kɛzi ngapezo ne mɔɔ fale Babelɔn anwo la rale nu ɛ?
Babelɔn mɔɔ ɛzɛkye la wɔ Iraq maanle nu
6. Baebolo ne hanle ninyɛne mɔɔ ɛlɛkɔ zo ɛnɛ la dole ɛkɛ
Baebolo ne ka kɛ yɛde “mekɛ mɔɔ li awieleɛ la” anu. (2 Timote 3:1) Yɛ mɔɔ Baebolo ne ka ye wɔ mekɛ ɛhye anwo la nzonlɛ.
Kenga Mateyu 24:6, 7, na akee bɛzuzu kpuya ɛhye anwo:
-
Ninyɛne boni mɔ a Baebolo ne hanle kɛ ɔbasisi wɔ mekɛ mɔɔ li awieleɛ la anu a?
Kenga 2 Timote 3:1-5, na akee bɛzuzu kpuya ɛhye mɔ anwo:
-
Subane boni mɔ a Baebolo ne hanle kɛ menli bala ye ali wɔ mekɛ mɔɔ li awieleɛ la anu a?
-
Subane ɛhye mɔ boni a wɔnwu ye kɛ ɔlɛkɔ zo a?
BIE MƆ KA KƐ: “Adalɛ edwɛkɛ ngome a wɔ Baebolo ne anu a.”
-
Duzu a maa ɛdie ɛdi kɛ Baebolo ne anu edwɛkɛ ne le nɔhalɛ a?
EDWƐKƐ TITILI
Tetedwɛkɛ, abɔdeɛ nwo nrɛlɛbɛ yɛɛ ngapezo kɔsɔɔti kile kɛ ɛbahola wɔalie Baebolo ne wɔali.
Ndinu
-
Asoo Baebolo ne anu edwɛkɛ ne le nɔhalɛ anzɛɛ adalɛ?
-
Ninyɛne boni mɔ a abɔdeɛ nwo nrɛlɛbɛvolɛma nee Baebolo ne yɛ adwenle wɔ nwo a?
-
Ɛnea a Baebolo ne ka mɔɔ bazi kenle bie la ɔ? Nzɔne ati ɔ?
KPONDƐ DƆƆNWO
Asoo abɔdeɛ nwo nrɛlɛbɛ edwɛkɛ mɔɔ wɔ Baebolo ne anu la bie ɛnle nɔhalɛ?
“Asoo Abɔdeɛ Nwo Nrɛlɛbɛ Nee Baebolo Ne Yia?” (Edwɛkɛ mɔɔ wɔ jw.org azo)
Nɔhalɛ edwɛkɛ boni mɔ a Baebolo ne ka ye wɔ “mekɛ mɔɔ li awieleɛ la” anwo a?
“Baebolo Nu Ngapezo 6 Mɔɔ Ɛlɛba Nu” (Ɛzinzalɛ Arane, June 1, 2011)
Sukoa kɛzi Baebolo ngapezo mɔɔ fale Giliki Tumililɛ ne anwo la rale nu la.
Sukoa kɛzi Baebolo ngapezo hakyile adwenle mɔɔ ɛnee nrenyia bie lɛ ye wɔ Baebolo ne anwo la.
“Menlie Menli Kɛ Nyamenle Wɔ Ɛkɛ” (Ɛzinzalɛ Arane No. 5 2017)
a K.Y.M. kile “Kolaa Yɛ Mekɛ Ye,” yɛɛ Y.M. kile “Yɛ Mekɛ Ye.”
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
