Michoonni dhugaan kan amanamanidha. Akkuma obbolaa haadhoo, keessumaa yeroowwan rakkisoo taʼanitti amanamoo fi kan waliif yaadanidha.

 “Michuu dhugaan yeroo hundumaa jaalala argisiisa.” Himni kun “michoonni yeroo hundumaa jaalala isaanii argisiisu” jedhamees hiikamuu dandaʼa. Jechi Afaan Ibrootaa as irratti “jaalala” argisiisuuf itti hojjetame, miira nama tokkoof qabnu qofa kan argisiisu miti. Kanaa mannaa, namni tokko nama kan biraatti gocha isaatiin jaalala ofittummaa irraa walaba taʼe akka qabus kan argisiisudha. (1 Qorontos 13:4-7) Michoonni jaalala akkasiitiin walitti hidhaman, yeroo hariiroon isaanii, tarii wal hubachuu dhabuu ykn rakkina jireenya isaanii keessatti isaan mudatuun qoramutti walitti maxxanu. Kana malees, tolaan waliif dhiisu. (Fakkeenya 10:12) Akkasumas michuun tokko yeroo namni kan biraan wanta gaarii argatu isatti hin hinaafu. Kanaa mannaa, michuu isaa wajjin gammada.—Roomaa 12:15.

 “Michuu dhugaan . . . obboleessa yeroo dhiphinaatiif dhalate dha.” Fakkeenyi kun yaada keessumaa obbolaa haadhoon baayʼee akka walitti dhihaatan kan ibsudha. Kanaafuu, michuu keenya haala rakkisaa keessa jiru gargaaruuf wanta nuuf dandaʼame hunda yommuu goonu, obboleessa ykn obboleettii dhugaa akka isaaniif taane argisiisaa jirra jechuudha. Hunda caalaammoo, hidhaan michoota akkasii walitti hidhu qorumsawwaniin hin laafu. Kanaa mannaa, yeroo rakkinni isaan mudatu jaalallii fi kabajni waliif qaban caalaatti cimaa deema.

 Kitaabni Fakkeenyaa karaa nama dubbisu sana hawwatuun ogummaa guddaa namni dubbisu sun akka irratti yaadu godhu gabaabsee ibsa. Solomoon Mootichi kitaaba kana harka caalaa isaa barreesseera. Akkaataan barreeffama isaa akkaataa walaloon Afaan Ibrootaa ittiin barreeffamuun, jechuunis sagalee wal fakkaatuun kan xumuramuu utuu hin taʼin, yaadawwan wal fakkaatanii fi yaadawwan wal ibsan ykn yaadawwan wal faallessan wal bira qabee ibsa. Fakkeenyi 17:17 walaloo yaada wal fakkaatu wal bira qabee ibsuuf fakkeenya taʼa; kutaan inni lammaffaan odeeffannoo kutaa isa jalqabaa ibsu kan qabatedha. Fakkeenyi 18:24 immoo yaada lama wal bira qabee kan ibsudha. “Hiriyoonni wal balleessuuf qophaaʼan jiru, garuu michuun obboleessa caalaa namatti maxxanu jira”

 Solomoon yaada Fakkeenya 17:17 irra jiru yommuu barreessu, michummaa cimaa abbaan isaa Daawitii fi Yonaataan ilmi Saaʼol Mootichaa qaban yaadatti qabatee taʼuu dandaʼa. (1 Saamuʼel 13:16; 18:1; 19:1-3; 20:30-34, 41, 42; 23:16-18) Daawitii fi Yonaataan firooma dhiigaa kan hin qabne taʼanis, obboloota haadhoo caalaa walitti dhihaatu turan. Yonaataan michuu isaa isa dargaggeessa tureef jecha lubbuu isaa balaadhaafillee saaxilee ture. a

 “Michuun yeroo hundumaa jaalala argisiisa, yeroo rakkinaattis obboleessa taʼa.”—Za Baayibil iin Beeziik Ingilish.

 “Michuun yoomiyyuu michuudha, obboleessa yeroo rakkinaatiif dhalatedha.”—Za Moofaat Tiraansileeshin of za Baayibil.

 “Michuun yeroo hundumaa michummaa isaa argisiisa—obboleessi [akkasii] yeroo rakkinaatiif dhalata.”—Za Koompilit Jiwish Istadii Baayibil.

 Viidiyoo qabiyyee kitaaba Fakkeenyaa gabaabsee ibsu kana ilaali.