Дӕ ниййергутӕмӕ игъосун дин алкӕддӕр ӕнцон фӕууй? ~ Ӕвӕдзи нӕ. Зонис ӕй, Йесо ӕ ниййергутӕмӕ дӕр ӕма Йеговӕмӕ дӕр ке игъуста? ~ Дӕ ниййергутӕмӕ игъосун дин ӕнцон ку нӕ уа, уӕд дин Йесой цӕветтон банхус кӕндзӕй. Гъӕйдӕ ибӕл фулдӕр базонӕн.

Йесо зӕнхӕмӕ ку нӕма ӕрцудӕй, уӕдмӕ цардӕй уӕлӕрвти, ӕ Фидӕ Йегови хӕццӕ. Фал ма ин зӕнхӕбӕл дӕр ниййергутӕ адтӕй. Хундтӕнцӕ Иосиф ӕма Марийӕ. Зонис ӕй, етӕ ӕ ниййергутӕ куд иссӕнцӕ, уой? ~

Йеговӕ Йесой цард уӕлӕрвтӕй Марийи губунмӕ рахаста. Уотемӕй Йесо райгурдӕй зӕнхӕбӕл. Е адтӕй дессаги гъуддаг! Йесо Марийи губуни ирӕзун райдӕдта, иннӕ сувӕллӕнттӕ сӕ мади губуни куд фӕййирӕзунцӕ, уотӕ. Рацудӕй фараст мӕйи, ӕма Йесо райгурдӕй. Уотемӕй Марийӕ ӕма Иосиф иссӕнцӕ Йесой ниййергутӕ.

Йесобӕл 12 анзи ку цудӕй, уӕд ӕ гъуддӕгтӕй бӕрӕг адтӕй, ӕ уӕларвон Фидӕ Йегови ке уарзуй, е. Еухатт Йесой бийнонтӕ Йерусалиммӕ Комуадзӕни бӕрӕгбонмӕ рандӕ ’нцӕ. Фӕстӕмӕ ку раздахтӕнцӕ, уӕд Иосиф ӕма Марийӕ кӕсунцӕ, ӕма Йесо сӕ хӕццӕ нӕй. Зонис ӕй, кӕми адтӕй? ~

Иосиф ӕма Марийӕ фӕстӕмӕ Йерусалиммӕ раздахтӕнцӕ ӕма Йесой агорун райдӕдтонцӕ. Етӕ ин хъӕбӕр фӕттарстӕнцӕ, уомӕн ӕма ’й некӕми ирдтонцӕ. Фал ӕй ӕртӕ боней фӕсте ба ковӕндони иссирдтонцӕ! Зонис ӕй, Йесо ковӕндони цӕмӕн адтӕй, уой? ~ Уомӕн ӕма уоми ӕ бон адтӕй ӕ уӕларвон Фиди туххӕй фулдӕр базонун. Йесо Йегови уарзта ӕма ’й фӕндадтӕй базонун, ӕ бон куд ӕй ӕ Фиди зӕрдӕ рохс кӕнун, уой. Йесо устурӕй дӕр игъуста Йеговӕмӕ, зин ин ку уидӕ ӕма гъезӕмӕрттӕ ку ӕвзаридӕ, уӕд дӕр. Цума Йесо Иосиф ӕма Марийӕмӕ дӕр уотӕ игъуста? ~ Библи куд зӕгъуй, уомӕ гӕсгӕ, гъо.

Йесой хабарӕй цӕбӕл ахур кӕнис? ~ Зин дин ку уа, уӕддӕр гъӕуама дӕ мадӕ ’ма дӕ фидӕмӕ игъосай. Ду ба уотӕ кӕндзӕнӕ? ~