Ефесӕгтӕм 3:1—21
3 Уымӕ гӕсгӕ ӕз, Павел, Йесо Чырыстийы тыххӕй ӕмӕ сымах, ӕндӕр адӕмты сӕрвӕлтау+ ахст лӕг...*+
2 Сымах, ӕвӕццӕгӕн, фехъуыстат, ахӕм хӕс мын лӕвӕрд кӕй ӕрцыд+, цӕмӕй уын баххуыс кӕнон ӕмӕ уын Хуыцауы стыр хорзӕх пайда ӕрхӕсса:
3 кӕй мын раргом йӕ фӕндоны сусӕгдзинад+ – уый тыххӕй ма уӕм уӕлдӕр цыбыртӕй ныффыстон.
4 Гъемӕ ацы фыстӕг куы кӕсат, уӕд ӕй уӕхӕдӕг фендзыстут, Чырыстийы тыххӕй сусӕгдзинад+ цӕй мидӕг ис, уый ӕцӕгдӕр кӕй ӕмбарын+.
5 Ацы сусӕгдзинад+ Хуыцауы сыгъдӕг тыхӕй йӕ сыгъдӕг апостолтӕн ӕмӕ пехуымпартӕн+ ныр куыд раргом+, афтӕ раздӕры фӕлтӕртӕн нӕ уыд ӕргом.
6 Уыцы сусӕгдзинад та уый мидӕг ис, ӕмӕ ӕндӕр адӕмтӕй чи сты, уыдон дӕр, Йесо Чырыстиимӕ иудзинады ӕмӕ хорз хабары фӕрцы, йемӕ иумӕ кӕй суыдзысты бындартӕ, уыцы иу буары уӕнгтӕ+ ӕмӕ сын немӕ иумӕ кӕй уыдзӕн хай зӕрдӕвӕрдӕй+.
7 Ӕз уыцы сусӕгдзинад хъусынгӕнӕг+ сдӕн Хуыцауы лӕвары фӕрцы, йе стыр хорзӕхы фӕрцы. Уыцы лӕвар мын кӕй радта, уымӕй равдыста йӕ тых+.
8 Мӕнӕн, сыгъдӕджытӕй се ’ппӕты къаддӕрӕй дӕр къаддӕрӕн+, уыцы стыр хорзӕх+ уый тыххӕй ӕрцыд лӕвӕрд, цӕмӕй ӕндӕр адӕмтӕн хъусын кӕнон+ Чырыстийы ӕгӕрон хъӕздыгдзинӕдты+ тыххӕй хорз хабар
9 ӕмӕ цӕмӕй адӕмӕн ӕмбарын кӕнон, ӕппӕт сфӕлдисӕг+ Хуыцау ӕнусты дӕргъы кӕй ӕмбӕхста, уыцы сусӕгдзинад+ куыд ӕргом кӕны, уый+.
10 Уый уымӕн афтӕ уыд, цӕмӕй ныр, уӕлӕрвты хицауад ӕмӕ хицаудзинадӕй+ цы ис, уыдонӕн ӕмбырды уылты раргом уа+, алы ӕмӕ алыхуызӕтты чи зыны, Хуыцауы уыцы зонд+.
11 Уый у, фидарӕй кӕй аскъуыддзаг кодта ӕмӕ нӕ Хицау Йесо Чырыстиимӕ+ баст чи у, йӕ уыцы ӕнусон фӕндмӕ гӕсгӕ.
12 Чырыстийы фӕрцы ӕмӕ йыл кӕй ӕууӕндӕм, уый руаджы нӕ бон у Хуыцауимӕ сӕрибарӕй ныхас кӕнын*+ ӕмӕ йӕ разы ныфсджынӕй ӕрлӕууын.
13 Ӕмӕ уӕ уымӕ гӕсгӕ курӕг дӕн: сымах сӕрвӕлтау цы зындзинӕдтӕ ӕвзарын+, уыдоны тыххӕй уӕ ныфс ма асӕттӕд, уымӕн ӕмӕ уыдон сымахӕн кад хӕссынц.
14 Ӕмӕ уымӕ гӕсгӕ ӕз мӕ зонгуытыл лӕууын+ нӕ Фыды раз+,–
15 арвыл ӕмӕ зӕххыл алы бинонтӕн+ дӕр номӕвӕрӕг+ чи у, уый раз,–
16 ӕмӕ йӕм кувын, цӕмӕй йе стыр кадмӕ+ гӕсгӕ йӕ сыгъдӕг тыхы хъаруйӕ+ сфидар кӕна, уӕ мидӕг цы адӕймаг+ ис, уый,
17 ӕмӕ уӕ уырнындзинады фӕрцы Чырысти уӕ зӕрдӕты цӕра уарзондзинадимӕ+ иумӕ, уидӕгтӕ куыд ауадзат+ ӕмӕ фидар бындурыл фидар куыд лӕууат+.
18 Афтӕмӕй ӕппӕт сыгъдӕджытимӕ иумӕ уӕ бон кӕронмӕ бамбарын уыдзӕн+, цы у рӕстдзинадӕн* йӕ уӕрх ӕмӕ йӕ дӕргъ, йӕ бӕрзӕнд ӕмӕ йӕ арф+,
19 ӕмӕ базондзыстут Чырыстийы уарзт+, цыфӕнды зонындзинӕдтӕй дӕр уӕлдӕр чи у, уый, цӕмӕй, Хуыцауӕй цыдӕриддӕр миниуджытӕ цӕуы, уыдонӕй ӕххӕстӕй хайджын уат+.
20 Хуыцау нӕ мидӕг цы тыхӕй архайы+, уый фӕрцы йӕ бон у, цы дзы курӕм йе та ӕрмӕст хъуыды дӕр цӕуыл акӕнӕм, уымӕй бирӕ фылдӕр саразын+.
21 Гъемӕ уымӕн ӕмбырды уылты ӕмӕ Йесо Чырыстийы уылты кад уӕд фӕлтӕрӕй-фӕлтӕрмӕ, ӕнустӕм!+ Аммен.
Фиппаинӕгтӕ
^ Куыд зыны, афтӕмӕй ацы хъуыды адарддӕр кодта 14 ст.
^ Кӕнӕ «адӕмимӕ сӕрибарӕй ныхас кӕнын».
^ Кӕнӕ «ӕцӕгдзинадӕн».
