ਜ਼ਬੂਰ 16:1-11
ਦਾਊਦ ਦਾ ਮਿਕਤਾਮ।*
16 ਹੇ ਪਰਮੇਸ਼ੁਰ, ਮੇਰੀ ਹਿਫਾਜ਼ਤ ਕਰ ਕਿਉਂਕਿ ਮੈਂ ਤੇਰੀ ਪਨਾਹ ਵਿਚ ਆਇਆ ਹਾਂ।+
2 ਮੈਂ ਯਹੋਵਾਹ ਨੂੰ ਕਿਹਾ ਹੈ: “ਤੂੰ ਯਹੋਵਾਹ ਹੈਂ, ਤੂੰ ਸਾਰੀਆਂ ਚੰਗੀਆਂ ਚੀਜ਼ਾਂ ਦਾ ਸੋਮਾ ਹੈਂ।
3 ਧਰਤੀ ’ਤੇ ਤੇਰੇ ਪਵਿੱਤਰ ਸੇਵਕਾਂ ਤੋਂ ਮੈਨੂੰ ਬੇਹੱਦ ਖ਼ੁਸ਼ੀ ਮਿਲਦੀ ਹੈ+ਜਿਹੜੇ ਤਾਰੀਫ਼ ਦੇ ਕਾਬਲ ਹਨ।”
4 ਹੋਰ ਦੇਵਤਿਆਂ ਪਿੱਛੇ ਭੱਜਣ ਵਾਲੇ ਲੋਕ ਆਪਣੇ ਹੀ ਗਮਾਂ ਵਿਚ ਵਾਧਾ ਕਰਦੇ ਹਨ।+
ਮੈਂ ਪੀਣ ਦੀ ਭੇਟ ਵਜੋਂ ਉਨ੍ਹਾਂ ਦੇ ਦੇਵਤਿਆਂ ਨੂੰ ਖ਼ੂਨ ਨਹੀਂ ਚੜ੍ਹਾਵਾਂਗਾ,ਨਾ ਹੀ ਉਨ੍ਹਾਂ ਦੇ ਦੇਵਤਿਆਂ ਦਾ ਨਾਂ ਮੇਰੇ ਬੁੱਲ੍ਹਾਂ ’ਤੇ ਆਵੇਗਾ।+
5 ਯਹੋਵਾਹ ਮੇਰਾ ਹਿੱਸਾ+ ਅਤੇ ਮੇਰਾ ਪਿਆਲਾ ਹੈ।+
ਤੂੰ ਮੇਰੀ ਵਿਰਾਸਤ ਦੀ ਹਿਫਾਜ਼ਤ ਕਰਦਾ ਹੈਂ।
6 ਤੂੰ ਮਿਣ ਕੇ ਮੈਨੂੰ ਮਨਭਾਉਂਦੀਆਂ ਥਾਵਾਂ ਦਿੱਤੀਆਂ ਹਨ।
ਹਾਂ, ਮੈਂ ਆਪਣੀ ਵਿਰਾਸਤ ਤੋਂ ਸੰਤੁਸ਼ਟ ਹਾਂ।+
7 ਮੈਂ ਯਹੋਵਾਹ ਦਾ ਗੁਣਗਾਨ ਕਰਾਂਗਾ ਜਿਸ ਨੇ ਮੈਨੂੰ ਸਲਾਹ ਦਿੱਤੀ ਹੈ।+
ਰਾਤ ਨੂੰ ਵੀ ਮੇਰੇ ਮਨ ਦੀਆਂ ਸੋਚਾਂ* ਮੈਨੂੰ ਸੁਧਾਰਦੀਆਂ ਹਨ।+
8 ਮੈਂ ਯਹੋਵਾਹ ਨੂੰ ਹਮੇਸ਼ਾ ਆਪਣੇ ਸਾਮ੍ਹਣੇ ਰੱਖਦਾ ਹਾਂ।+
ਉਹ ਮੇਰੇ ਸੱਜੇ ਹੱਥ ਹੈ, ਇਸ ਕਰਕੇ ਮੈਨੂੰ ਕਦੇ ਹਿਲਾਇਆ ਨਹੀਂ ਜਾ ਸਕਦਾ।*+
9 ਇਸ ਲਈ ਮੇਰਾ ਦਿਲ ਖ਼ੁਸ਼ ਹੈ ਅਤੇ ਮੇਰਾ ਤਨ-ਮਨ* ਖਿੜਿਆ ਹੋਇਆ ਹੈ।
ਅਤੇ ਮੈਂ* ਸੁਰੱਖਿਅਤ ਵੱਸਦਾ ਹਾਂ।
10 ਕਿਉਂਕਿ ਤੂੰ ਮੈਨੂੰ ਕਬਰ* ਵਿਚ ਨਹੀਂ ਛੱਡੇਂਗਾ।+
ਤੂੰ ਆਪਣੇ ਵਫ਼ਾਦਾਰ ਸੇਵਕ ਨੂੰ ਟੋਏ ਦਾ ਮੂੰਹ ਨਹੀਂ ਦੇਖਣ ਦੇਵੇਂਗਾ।*+
11 ਤੂੰ ਮੈਨੂੰ ਜ਼ਿੰਦਗੀ ਦਾ ਰਾਹ ਦਿਖਾਉਂਦਾ ਹੈਂ।+
ਤੇਰੀ ਹਜ਼ੂਰੀ ਵਿਚ ਖ਼ੁਸ਼ੀਆਂ ਹੀ ਖ਼ੁਸ਼ੀਆਂ ਹਨ;+ਤੇਰੇ ਸੱਜੇ ਹੱਥ ਰਹਿ ਕੇ ਮੈਨੂੰ ਸਦਾ ਆਨੰਦ* ਮਿਲਦਾ ਹੈ।
ਫੁਟਨੋਟ
^ ਜਾਂ, “ਡੂੰਘੀਆਂ ਭਾਵਨਾਵਾਂ।” ਇਬ, “ਮੇਰੇ ਗੁਰਦੇ।”
^ ਜਾਂ, “ਨਹੀਂ ਡੋਲਾਂਗਾ।”
^ ਇਬ, “ਮੇਰੀ ਮਹਿਮਾ।”
^ ਜਾਂ, “ਮੇਰਾ ਸਰੀਰ।”
^ ਜਾਂ ਸੰਭਵ ਹੈ, “ਟੋਏ ਵਿਚ ਗਲ਼ਣ ਨਹੀਂ ਦੇਵੇਂਗਾ।”
^ ਜਾਂ, “ਸੁੱਖ।”
