Manlapud Setyembre 26, 2018 anggad Enero 6, 2019, say Munich Documentation Centre for the History of National Socialism et angorganisa na espisyal ya exhibit pian ipaamta ed publiko so naeksperiensya na Saray Tasi nen Jehova legay impanuley na Nazi. Say Centre ya kawalaay exhibit et naromog ed mismon kawalaan na datin headquarters na partidon Nazi.

Legan na panlukas ya programa, impaliwawa nen Dr. Hans-Georg Küppers, sakey ya opisyal ed Munich, so rason no akin ya inorganisa so exhibit. Oniay imbaga to: “Importante iyan exhibit lapud abayag ya panaon ya ag-amta na totoo ya Saray Tasi nen Jehova et pinairap tan pinasegsegang na saray Nazi. . . . Say gagala na sayan exhibit et pian natalosan na publiko so katuaan nipaakar ed saray [biktima] ya Tasi nen Jehova.”

Saray naeksperiensya na agagi tayo ed Munich legay impanuley na Nazi et inkarga ed 60 ya display a napnoy istorya nipaakar ed inkakpel, katooran tan impansungdo da. Nabasa ed sakey a display so eksperiensya nen Martin tan Gertrud Pötzinger, ya inaresto tan inyakar ed nambiigan ya panamairapan a kampo pigaran bulan labat kayari impankasal da. Agda anengneng so sakey tan sakey diad loob na siameran taon. Pareho dan asungdoan so bilay ed panamairapan a kampo, tan si Brother Pötzinger et nagmaliw a membro na Mananguley ya Ulop na Saray Tasi nen Jehova.

Diad sakey nin display, insalaysay so istoryay bilay nen Therese Kühner, a nagmaliw ya sakey ed saray Tasi nen Jehova (a tatawagen nensaman ya International Bible Students) nen 1929. Nen insebel na Germany so kimey na saray Tasi, maamot ya mantitipon iray agagi diad abung to tan sikatoy masekreto ya mangiimprinta na literatura na saray Tasi panamegley na mimeograph machine ya manomanon itetelek. Nen adiskobre itan na saray Nazi, sikatoy inaresto tan inakusaan da ya “mangipa-publish na saray literaturan kontra ed gobierno tan manidismaya ed saray sundalo.” Agbalot kinmapuy so katooran nen Sister Kühner anggano pateyen da la. Sikatoy pinatey nen Oktubre 6, 1944.

Naamtaan met ed saray arum nin display so impansiansian neutral ed politika na saray agagi tayo tan say agdan balot impansaludo ed si Hitler​—a lapud satan et nagmaliw iran manunan puntirya na graben panagbusol.

Nen 1934, insamba nen Hitler ya upoten to iray Tasi nen Jehova, tan imbaga to: “Sayan grupo na totoo et naandi ed Germany!” Impasya so impansungdo na saray Tasi ed maruksan panamasegsegang nen Hitler legan ton gagawaen iray mauges ya plano to. Inatey lay Hitler tan anggapo met lay partido to, balet say bilang na agagi tayo natan ed Germany et masulok lan 165,000. Misalsalamat tayod si Jehova lapud legan ya wala tayod kairapan, iikdan to itayo na ilalon “agmansumpal ed pakadismaya.”​—Roma 5:3-5.