ENERO 10, 2019
GERMANY

Inorganisa na Memorial Site Diad Germany so Sakey ya Exhibit Nipaakar ed Impamairap ed Saray Tasi nen Jehova

I-PLAY

Inorganisa na Ravensbrück Memorial Site so sakey ya exhibit ya niyalis-alis ya say tema to et “Insebel tan Pinasegsegang—Saray Tasi nen Jehova Diad Panamairapan a Kampo na Ravensbrück tan Diad Saray Prisoan na GDR.” Impanengneng ditan iray irap ya dinalan na Saray Tasi nen Jehova ed Germany diad uley na Nazi (1933-1945) tan German Democratic Republic (GDR odino East Germany; 1949-1990), ontan met ed Weimar Republic (1918-1933). (Nengnengen so kahon ya “ Panamasegsegang tan Impamairap na Taloran Gobierno ed Germany.”) Ginmapo so exhibit nen Simba, Abril 22, 2018, diad Ravensbrück Concentration Camp Memorial Site diad Fürstenberg, Germany. Legan na 2019, say exhibit et iyalis-alis diad saray syudad na Germany, singa say Erfurt, Rostock, ontan met ed Potsdam, tan nagawa so exhibit diad parliament building na Brandenburg.

Istoryay bilay na sakey ed “saray amiduan abiktima,” si Adolf Graf, ya kaiba ed exhibit.

Kaibad saray in-display ed exhibit so nipaakar ed istoryay bilay na 12 agagi ya “amiduan abiktima,” lapud pinasegsegang ira na Nazi tan Saray Komunista na GDR. Kaiba met ed exhibit iray audio station ya walay narengel ya rekording na saray istorya tan panamatanir iran sulat na saray Tasi ya asentensiaan na patey, ontan met, wala ray nabasa ya artikulo ed dyaryo tan daan iran dokumento diad panaon na Nazi. Nanengneng ed exhibit ya aliwan singa saray nilibon akulong lapud lahi, politika, odino krimen, saray agagi tayo et akulong lapud malet ya pananisia da.

Oniay impaliwawa na historian ya si Dr. Detlef Garbe diad speech to legan na opening ceremony na exhibit: “Manlapu la nensaman, lapud malet so pananisia tan panagmatalek na Saray Tasi nen Jehova, lapud walay pankakasakey da, tan lapud agda labay so mikompromiso, kabkabusol ira na SS. . . . Matalek iray Tasi nen Jehova ed promisa na Dios ya iliktar to ira tan mantutulongan ira kanian angiter itan na biskeg ed sikara ya mansiansian matoor anggan diad saray panamairapan a kampo.”

Anggad natan, no nipaarap iray Tasi nen Jehova ed isusumpa tan pananebel na gobierno, ya singa nagagawa ed Russia, matalek ira ya tuloytuloy iran tulongan nen Jehova.—Isaias 54:17.

Panamasegsegang tan Impamairap na Taloran Gobierno ed Germany

Weimar Republic (1918-1933)

Diad interon Germany, sinali na saray lider na relihyon ya akusaan iray Tasi nen Jehova, ya say tawag ed sikara nensaman et Saray Estudyante na Biblia. Diad gapo na 1922, inakusaan iray agagi tayo ya “ilegal a manlalako na saray literatura tan agda labay so manbayar na buis,” tan ambelat so sentensia na saramay apaneknekan ya guilty. Diad baetan na 1927 tan 1930, ngalngali 5,000 ya kaso na Saray Estudyante na Biblia so insegep ed korte.

Nen 1928, diad impangisugsog na saray lider na simbaan, binawi na State Revenue Department so exemption ed pambayar na buis na Watch Tower Bible and Tract Society. Inamin lanlamang na saray lider na simbaan ya labay dan patundaen so panagpulong a kimey na Saray Estudyante na Biblia. Insegep na saray agagi tayo itan ed korte tan say desisyon et pabor ed sikatayo.

Nen Nobyembre 1931, insebel na saray autoridad ed Munich iray literatura na Saray Estudyante na Biblia ed rehyon na Bavaria. Nen Pebrero 1932, sayan impangisebel et sinuportaan na gobierno na Upper Bavaria, tan nen Marso na satan lanlamang a taon, imbasura na Bavarian Ministry of the Interior so apela na Saray Estudyante na Biblia, tan imbaga da ya “anggapoy basiyan” na satan ya apela.

National Socialism (1933-1945)

Nen Enero 30, 1933, si Adolf Hitler et nagmaliw ya manuley na Germany tan tampol ton insebel so kawayangan na totoo ya mantitipon tan mangimprinta na literatura nipaakar ed sarilin ideya da. Legan na espisyal a kampanya na pangibunog ed bokleta ya Crisis manlapud Abril 8 anggad 16, insebel so kimey na Saray Tasi nen Jehova ed Bavaria. Kayari na satan ya kampanya, insebel met la na arum ya estado iray kimey na saray Tasi.

Sinuportaan na dakel a lider na relihyon si Hitler tan say impamairap to ed Saray Tasi nen Jehova. Nen Abril 20, 1933, diad sakey a broadcast ed radyo bilang panamagalang ed birthday nen Hitler, oniay imbaga na Lutheran minister ya si Otto:

“Inawat na German Lutheran Church na Estado na Saxony so balon kipapasen tan sigpot itan ya mitulongan ed saray politikal ya lider na totoo tayo pian niwala lamet ed interon bansa so biskeg na ebanghelyo nen Jesu-Kristo. Say unonan resulta na satan ya pitutulongan et nanengneng ed impangisebel natan ed kimey na International Association of Earnest Bible Students tan saray kakaiba da diad Saxony.”

Diad tiagew na 1933, insebel so kimey na Saray Tasi nen Jehova diad saray estado na Germany (say ganggan ya isebel so kimey da et impasa nen Abril 1, 1935) tan say bilding ya inusar bilang sangan opisina na Saray Tasi nen Jehova diad saman et kinompiska na saray sundalo nen Hitler. Regular ya wala ray oonla ed abung na saray agagi pian manimbestiga, tan dakel ya Tasi so inaresto.

Diad sampot na World War II, manga 10,700 ed manga 25,000 ya Tasi nen Jehova ed Germany so pinasegsegang na Nazi, 2,800 so inawit ed saray panamairapan a kampo, tan manga 1,000 so inatey.

German Democratic Republic (1949-1990)

Kabkabat met itan bilang East Germany. Anggaman ibabaga ran aliwan diktador itan ya gobierno, say impantrato da ed saray Tasi nen Jehova et mipara ed saramay datin gobierno ya nanuley bilang diktador.

Diad baetan na 1950 tan 1985, inakusaan na saray korte so masulok ya 5,000 ya Tasi nen Jehova ya guilty ed panagrebelde ed gobierno, panagsalita diad paraan ya mameligro ed gobierno, tan pangipapaseseg ed guerra. Say average ya sentensia na pakakulong na saray agagi tayo et limara tan kapalduan taon.

Ami-amin et 62 ya Tasi so inatey diad prisoan legan na GDR.

BALITA