Maer-ermen min ipaamta ya duaran sister so inatey lapud asabogan ira na bomba diad syudad na Mariupol. Diad kaplesan, masulok ya 2,000 ya agagi tayo so agmakaalis ed syudad lapud graben bakbakan diman. Nen imbeneg iran agew, manga 150 ya Tasi so akaalis ed syudad. Sinali na saray agagi diad Disaster Relief Committee (DRC) so mangiter na saray relief diad Mariupol balet inmatras ira, pati say arum nin akabansag da ya mangiter met komon na tulong, lapud aminpiga iran pinaputokan. Walay sinmabog ya bomba diad loob na sular ya kawalaan na Kingdom Hall tan Assembly Hall. Diad saman et manga 200 ya agagi tayo so akaamot diad basement na Kingdom Hall. Anggapo met so asakitan ed sikara, balet agaygay iray luluganan da, kanian lalon nairapan ira laingen ya makaalis ed satan ya syudad.

Oniay imbaga na sakey ya elder (ya walad leksab so litrato to) ya akaalis ed Mariupol kaibay pamilya to: “Tinaynan mi abung mi, pati say trabaho mi, tan anggapo met lay kontak mid saray kakaaro mi. Say biahe mi ya datin sakey agew labat komon et nagmaliw ya anemiran agew. Sanen ontatakas kami [papaway ed syudad], walay anengneng min onaasewek ya agsinmabog a bomba diad karsada. Legan na biahe mi, tinulongan kami na saray agagi ya makalmo na natuloyan tan naakan mi. Talagan alikna mi so maaron panangasikaso nen Aman Jehova . . . Kanian mas akombinse kamin lalon mantiwala ed si Jehova.”

Nambiahe iray Tasin refugee ya nanlapud Ukraine paonlad arum ya bansa diad Europe pian naarawian da so peligro. Singa bilang, nambiahe paonlad Portugal so sakey ya ministeryal a lingkor, say asawa to, tan taloran ananak da ya manedad na 7, 11 tan 16, ta wala ray kakanayon dan Tasi nen Jehova diman. Kayari dan nanalagar na 11 ya oras diad border, apatiran agew iran nambiahe na 4,000 kilometro pian nasabi so abung na kakanayon da. Akasabi ra antis ya onggapo so aral na kongregasyon. Ag-ira makapansalita na Portuguese, balet siansia nin inmatendi ira pian nituloy day espiritual ya rotina da. Mandinayew iray agagi ed saman ya kongregasyon ta siansia nin malikeliket iman ya pamilya anggano mair-irap so situasyon da.

Oniay imbaga na sakey nin sister ya tinmakas paonlad Germany kaibay pamilya to: “Ombibiskeg kami no manbabasa kami na Biblia, tan no dadalepdepen mi ray positibon nagagawa ed bilay mi tan say balibalin ilalo tayo diad arapen. . . . Aliklikna mi so maaron panangigiya tan tulong nen Jehova panamegley na saray agagi. In-welcome da kami tan tinulongan da kamin maong manlapu lad Ukraine, diad Hungary, tan natan et diad Germany!”

Malinlinew itan ya ebidensya ya talagan tutulongan nen Jehova so amin ya inar-aron agagi tayo diad Ukraine.—Salmo 145:14.

Nia ray bilang ya inreport anggad Marso 16, 2022 manlapud Ukraine. Imbase iraya ed saray akompirman report manlapud saray agagi ed Ukraine. Balet, nayarin mas atagey ni so aktual ya bilang lapud mair-irap ya pansiansiaen so komunikasyon diad amin ya lugar diad bansa:

• 4 ya manangipalapag so inatey

• 19 ya manangipalapag so asugatan

• 29,789 ya manangipalapag so tinmaynan ed kaabungan da tan linmad mas safe iran lugar diad Ukraine lanlamang

• 45 ya abung so agaygay

• 84 ya abung so aderal ya maong

• 366 ya abung so medyo aderal

• 16 ya Kingdom Hall so aderal

• 27 ya DRC so onkikiwas ed Ukraine

• 20,981 ya manangipalapag so direktan atulongan na saray DRC pian makaanap na mas safe ya napanayaman

• 11,973 ya manangipalapag so linmad arum ya bansa tan tutulongan ira na saray agagi diman