Nen Hulyo 2019, nilukasan so sakey a balon Bible museum diad Scandinavia branch office na Saray Tasi nen Jehova, ya walad baley na Holbæk, Denmark, manga 65 kilometro so kaarawi to ed Copenhagen. Say tema na museum et “Say Biblia tan say Masanton Ngaran ed Scandinavia.”

Nanengneng ed museum iray koleksion na mataltalag tan importante iran Biblia diad lenguahen Danish, Faeroese, Greenlandic, Icelandic, Norwegian, Saami, tan Swedish. Ami-amin et masulok ya 50 Biblia so aka-display.

Sakey ed saray sankaimportantian ya aka-display et say orihinal ya 1541 Gustav Vasa Bible. Atan so sankaunaan ya kompleton Biblia ya apawala diad dinanman ya lenguahen Scandinavian. Imbase ed Gustav Vasa Bible so maslak ya grammar tan bokabularyo na lenguahen Swedish. Atan met so angaligan na arum nin Biblia ed Swedish diad tinmumbok ya 300 a taon.

Say 1550 Christian III Bible so sakey nin mataltalag ya orihinal a kopya na Biblia ya aka-display ed museum. Atan so sankaunaan ya kompleton Biblia ed Danish. Akatulong so Christian III Bible ed lenguahen Danish, tan ed interon parte lawari na Northern Europe.

Oniay imbaga nen Erik Jørgensen na Scandinavia branch office: “Ipapanengneng na sayan balon Bible museum ya nensaman ni et aralem la so respeto na Scandinavia ed Salita na Dios tan ed makapadinayew ya ngaran a Jehova.”