“Kada agew et nasusubok so inkaanos na sanasawa. Ompan aliwa itan ya tanton problema no single ka, balet no wala lay asawam, importante so pagmaliw ya maanos pian maliket so relasyon yo nen asawam.”​—John.

•  Akin et kaukolan moy magmaliw ya maanos?

•  Panon mon nipanengneng so inkaanos?

•  “Importante so anos”

•   No wala lay asawam, mas mainomay mon naimano iray lingo to.

   “No medyo abayag lan walay asawam, mas mainomay mon nanengneng iray aliwan marakep ya ugali to. No sankaimanom la iratan ya negatibon ugali, mainomay ya naandi so pasensyam.”​—Jessena.

•   No anggapoy pasensyam, nayarin makapansalita ka na agla ninonot.

   “Main-inomay kon ibaga so amin ya naliliknak​—anggan saray agla komon kaukolan ya ibaga. No maanos ak, nonoten ko nin unona no anto ray nepeg tan agnepeg kon ibaga.”​—Carmen.

   Ibabaga na Biblia: “Say aro et maanos.” (1 Corinto 13:4) Duga labat ya ipanengneng na duaran manaaroan so anos ed sakey tan sakey. Balet aliwan naynay ya mainomay itan. “Singa met ed arum ya ugali,” so imbaga nen John ya abitla ed gapo, “say anos et mainomay ya naandi. Kanian kaukolan tayoy mansagpot pian napansiansia itan.”

•   No walay ag-iilaloan ya nagawa, nasubok so inkaanos mo.

   Singa bilang: No asakitan ka ed imbaga na asawam, ompan napansalitaan mo met na aliwa.

   Prinsipyo ed Biblia: “Agka komon mainomay a nasakitan, ta say panem-em na sakit na linawa et tanda na sakey a makulangkulang.”​—Eclesiastes 7:9, paimanod leksab.

   No panon mon nipanengneng so inkaanos: Manisip ya magano. Antis kan onebat, isip mon agginagala na asawam ya sakitan odino insultoen ka ed imbaga to. “Maslak et man-react tayo base ed pakatalos tayo ed imbaga na asawa tayo nen say nonoten nin maong no anton talagay labay ton ibaga,” so inkuan na libron Fighting for Your Marriage.

   Anggano talagan papasyodoten ka na asawam, no ipanengneng moy anos, agla onloor so situasyon tan naiwasan lay kolkolan. “No anggapo lay kiew, naerep so apoy,” so ibabaga na Biblia.​—Proverbio 26:20.

   “No say pakanengneng mo lad asawam et kalaban mo, isip mon magano no akin ya inarom, tan manggawa kan tampol na maabig ed sikato.”​—Ethan.

   Isipen iraya:

  •  Antoy gawaen mo no walay imbaga odino ginawa na asawam ya agmo agustoan?

  •  Panon mon nipanengneng ya mas maanos ka no nagawa lamet itan?

•   No paulit-ulit lan nagagawa iray makapasyodot ya bengatla, nasubok so inkaanos mo.

   Singa bilang: Lanang ya atrasado so asawam, naynay to kan panalagaren ya mabayag kanian onsyodot ka la.

   Prinsipyo ed Biblia: “Itultuloy yon itepel so sakey tan sakey tan mabulos a perdonaen so sakey tan sakey.”​—Colosas 3:13.

   No panon mon nipanengneng so inkaanos: Mas iyunam so pankaabigan na relasyon yo nen asawam nen say pankaabigan mo. Tepetan moy sarilim, ‘No gawaen ko nin isyu so ginawa na asawak, kasin makatulong itan ed relasyon mi odino andi?’ Ontan met, tandaan tayo ya “amin tayo et naynay a nalilingo.” (Santiago 3:2) Labay ton ibaga, wala met so bengatlan kaukolan mon pankimeyan.

   “No maminsan et mas maanos ak ed kaarok nen say diad si asawak. Seguro lapud lanang kon nakakaiba so asawak tan nanenengneng ko iray kakapuyan to. Balet say anos et sakey ya aspekto na panangaro​—sakey itan ya panangipanengneng na respeto—​kanian importante itan ed relasyon mi nen asawak.”​—Nia.

   Isipen iraya:

  •  Kasin maanos ka ed saray lingo nen asawam?

  •  Panon kan magmaliw ya mas maanos?