Inatey si Jesus pian saray totoo et naperdona ed saray kasalanan da tan manbilay iran tuloytuloy. (Roma 6:​23; Efeso 1:7) Lapud impatey nen Jesus et apatunayan met ya sarag na too so mansiansian matoor ed Dios anggano grabe so subok.​—Hebreo 4:​15.

 Nia ray pigaran paraan no akin ya baleg so agawaan na impatey na sakey ya too.

1.   Inatey si Jesus pian ‘naperdona iray kasalanan tayo.’​—Colosas 1:​14.

    Say unonan too ya si Adan et perpekto nen ginawa na Dios kanian anggapoy kasalanan to. Pero ginagala ton ag-unoren so Dios. Say ag-impangunor o kasalanan nen Adan et baleg so epekto tod amin ya ilalak to. Ibabaga na Biblia: “Diad panamegley na ag-intulok na sakey a too et dakel so nagmaliw a makasalanan.”​—Roma 5:19.

    Perpekto met si Jesus, pero agbalot nankasalanan. Kanian nayarin sikato so iyapay ya “bagat a manakbong parad saray kasalanan tayo.” (1 Juan 2:2; paimanod leksab) Lapud ag-impangunor nen Adan, saray totoo et nankasalanan, pero lapud impatey nen Jesus, naekal so mantsa na kasalanan na siopaman ya mangipapanengneng na pananisia ed sikato.

    Singa inlako nen Adan iray ilalak to ed kasalanan. Diad mabulos ya impangiter nen Jesus na bilay to parad sikatayo, sinaliw to ray totoo pian magmaliw iran singa ananak to. Kanian “no walay mankasalanan, walay sakey a mananulong tayo a kaiba na Ama, salanti, si Jesu-Kristo, a sakey a matunong.”—1 Juan 2:1.

2.   Inatey si Jesus “pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.”​—Juan 3:16.

    Anggano ginawa na Dios si Adan ya manbilay ya tuloytuloy, sikatoy inatey ta atan so dusa na impankasalanan to. Diad panamegley nen Adan, “linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo lapud nankasalanan iran amin.”​—Roma 5:12.

    Pero lapud impatey nen Jesus, aglabat naekal so mantsa na kasalanan noagta naekal so sentensian patey ed amin ya mangipapanengneng na pananisia ed sikato. Oniay eksplinasyon na Biblia: “No panon a nan-ari so kasalanan tan patey, ontan met a say agnaparaan a kaabigan et man-ari diad panamegley na inkatunong a mangitonton ed bilay ya andi-anggaan diad panamegley nen Jesu-Kristo a Katawan tayo.”​—Roma 5:21.

    Siempre, ompapatey ni ray totoo natan. Pero impromisa na Dios ya ikdan toy bilay ya andi-anggaan iray matunong ya totoo tan bilayen to ray inatey pian minabang met irad impatey nen Jesus.​—Salmo 37:29; 1 Corinto 15:22.

3.   Si Jesus et “nagmaliw a matulok anggad ipapatey,” kanian pinaneknekan to ya sarag na too so manmatoor ed Dios diad anggan anton subok.​—Filipos 2:8.

    Anggano perpekto so nonot tan laman nen Adan, agto inunor so Dios ta inala toy bengatlan agto kanepegan lapud makasarilin pilalek to. (Genesis 2:​16, 17; 3:6) Kalabas na panaon, imbaga na manunan kabusol na Dios, si Satanas, ya anggapoy toon mansiansian maunor ed Dios, lalo la no napepeligro lay bilay to. (Job 2:4) Pero say perpekton too ya si Jesus et inunor toy Dios tan nanmatoor ed sikato anggano nanirap ya maong tan makapabaing so impatey to. (Hebreo 7:26) Lapud saya et apaneknekan ya matila si Satanas. Sarag na too so mansiansian matoor ed Dios anggan anton subok odino irap so onsabid sikato.

Saray tepet tungkol ed impatey nen Jesus

•   Akin et kaukolan ya manirap tan ompatey si Jesus pian nadondon so too? Akin et agbasta inekal na Dios so sentensian patey?

   Base ed ganggan na Dios, “say bayar na kasalanan et patey.” (Roma 6:23) Amta itan nen Adan, ta imbaga na Dios ed sikato ya say dusa no agto unorey ganggan na Dios et patey. (Genesis 3:3) Nen nankasalanan si Adan, tinoor na Dios itan ta “agto nayarian so mantila.” (Tito 1:2) Impatawir nen Adan ed saray ilalak to so kasalanan pati say bayar na kasalanan​—say patey.

   Anggano manepeg labat ya ompatey iray totoo lapud makasalanan ira, inter na Dios ed sikara so “daakan ya agnaparaan a kaabigan.” (Efeso 1:7) Say ginawa ton paraan pian nadondon so totoo​—say impangibaki tod si Jesus bilang perpekton bagat—​et talagan pakapatnagay hustisya tan agnaparaan ya panangasi to.

•   Kapigan inatey si Jesus?

   Inatey si Jesus diad “komasiam ya oras” manlapud imbutay na agew odino manga alas-tres na ngarem na Judion Paskua. (Marcos 15:33-37, paimanod leksab) Base ed saray modernon kalendaryo, satan ya petsa et mipetekan ed Biernes, Abril 1, 33 C.E.

•   Iner inatey si Jesus?

   Pinatey si Jesus diad “pasen a tatawagey Lapislapis na Ulo, a diad Hebreo et tatawagey Golgotha.” (Juan 19:17, 18) Diad panaon nen Jesus, sayan pasen et walad “paway na puerta na syudad” na Jerusalem. (Hebreo 13:12) Nayarin wala itan ed nipalandey ya lugar, ta ibabaga na Biblia ya wala ray nambantay ed impamatey ed si Jesus “diad bandad arawi.” (Marcos 15:40) Pero natan et agla amta no iner so eksakton lokasyon na Golgotha.

•   Panon ya inatey si Jesus?

   Anggano dakel so manisia ya impasak ed krus si Jesus, oniay ibabaga na Biblia: “Sikaton dili inako to so kasalanan tayo ed laman to dia ed tapew na kiew.” (1 Pedro 2:24, Say Biblia) Saray angisulat ed Biblia et angusar iray duaran Griegon salita parad samay amateyan ed si Jesus​—stau·rosʹ tan xyʹlon. Ibabaga na dakel ya scholar ya saratan a salita et ontutukoy ed lusek o poste ya saksakey ya kiew.

•   Panon so dugan pannodnonot ed impatey nen Jesus?

   Diad samay labi na tinaon ya Judion Paskua, inggapo nen Jesus so simplin okasyon kaiba iray papatumbok to tan ingganggan to ra: “Itultuloy yon gawaen iya bilang pannodnonot ed siak.” (1 Corinto 11:24) Kalabas na pigaran oras, pinatey si Jesus.

   Si Jesus et inkompara na saray angisulat ed Biblia ed kordero ya ibabagat ed Paskua. (1 Corinto 5:7) No panon ya impanonot na Paskua ed saray Israelita so inkibulos dad panangaripen, ipapanonot na Memoryal na impatey nen Jesu-Kristo ed saray Kristiano ya nibulos la rad kasalanan tan patey. Say Paskua et tinaon ya seselebraan kada Nisan 14 base ed lunar a kalendaryo; tinaon met ya sinelebraan na saray inmunan Kristiano so Memoryal.

   Kada taon, diad petsa ya mipetekan ed Nisan 14, minilyon ya totoo ed interon mundo so mannonodnonot ed impatey nen Jesus.