Diad Biblia, say salitan impatalos ya “kikioli” et nanlapud Griegon salita ya a·naʹsta·sis, ya say labay ton ibaga et “ibangon” odino “iyalagey lamet.” Say too ya pinaoli et imbangon manlapud patey tan impawil so bilay to a singa dati.—1 Corinto 15:12, 13.

 Anggaman agnabasa so salitan “kikioli” diad Hebreon Kasulatan, ya kaslakan et tatawagen ya Daan a Sipan, napatnagan ditan so bangat nipaakar ed kikioli. Singa bilang, panamegley nen propeta Oseas et oniay insipan na Dios: “Dondonen ko rad pakayari na Lubok; bawien ko rad patey.”—Oseas 13:14; Job 14:13-15; Isaias 26:19; Daniel 12:2, 13.

 Iner paolien iray totoo? Say arum et paolien diad tawen pian nakaiba na Kristo ya manuley bilang arari. (2 Corinto 5:1; Apocalipsis 5:9, 10) Tinukoy itan na Biblia ya “unonan kioli” tan ‘unonan pamaoli,’ tan ipapanengneng na saratan ya balikas ya wala ni onsublay ya kikioli. (Apocalipsis 20:6; Filipos 3:11) Saray onsublay ya paolien et manbilay diad dalin, tan satan so nagawa ed karaklan ya paolien.—Salmo 37:29.

 Panon ya paolien iray totoo? Ikdan na Dios si Jesus na pakayari ya bilayen iray inatey. (Juan 11:25) Ipawil nen Jesus so bilay na “amin a walad pakanodnonotan iran lubok,” ya kada sakey et walaan na sarilin pakabidbiran, personalidad, tan memorya. (Juan 5:28, 29) Saramay paolien ed tawen et napaoli bilang espiritu, tan saramay paolien diad dalin et napaoli ya walaay pisikal a laman ya maksil tan anggapoy sakit.—Isaias 33:24; 35:5, 6; 1 Corinto 15:42-44, 50.

 Siopa iray paolien? Ibabaga na Biblia ya “walay kioli na saray matunong tan saray agmatunong.” (Gawa 24:15) Kaiba ed saray matunong iramay matoor ya totoo ya singa si Noe, Sara, tan Abraham. (Genesis 6:9; Hebreo 11:11; Santiago 2:21) Kaiba ed saray agmatunong iramay agda inunor iray estandarte na Dios ta agda iratan naamtaan.

 Balet saramay talagan mauges ya aglan talaga manguman et agpaolien. No ompatey ira, permanente la ran naderal tan anggapo lay ilalo da ya nabilay lamet.—Mateo 23:33; Hebreo 10:26, 27.

 Kapigan nagawa so kikioli? Impasakbay na Biblia ya nagawa so kikioli ed tawen legan na kiwawala na Kristo, ya ginmapo nen 1914. (1 Corinto 15:21-23) Say kikioli ed dalin et nagawa legan na Sanlibon Taon ya Uley nen Jesu-Kristo ya diad satan et magmaliw lan paraiso so dalin.—Lucas 23:43; Apocalipsis 20:6, 12, 13.

 Akin et duga ya panisiaan tayo so kikioli? Nabasa ed Biblia so detalyadon istorya na siameran kikioli ya wala ray kompirmadon akatasi. (1 Arari 17:17-24; 2 Arari 4:32-37; 13:20, 21; Lucas 7:11-17; 8:40-56; Juan 11:38-44; Gawa 9:36-42; 20:7-12; 1 Corinto 15:3-6) Makatantanda imay impamaoli nen Jesus ed si Lazaro ta diad saman et apatiran agew lan inatey si Lazaro tan ginawa nen Jesus itan ya milagro diad arapan na dakel ya totoo. (Juan 11:39, 42) Anggan saramay onkokontra ed si Jesus et amta ra ya tua imay agawa kanian implano dan pateyen si Jesus tan si Lazaro.—Juan 11:47, 53; 12:9-11.

 Ipapanengneng na Biblia ya sarag tan labay na Dios ya paolien iray inaatey. Akasinop ed anggapoy limitasyon ya memorya to so detalyadon rekord na kada toon paolien to panamegley na mabisbiskeg ya pakapanyari to. (Job 37:23; Mateo 10:30; Lucas 20:37, 38) Sarag na Dios ya ipawil so bilay na inatey tan labalabay ton gawaen itan! Ibabaga na Biblia ya oniay liknaan na Dios nipaakar ed kikioli: “Pirawaten mo so kimey na saray limam.”—Job 14:15.

Saray lingon iisipen nipaakar ed kikioli

 Lingon iisipen: Say kikioli et pankasakey lamet na kamarerwa tan laman.

 No antoy duga: Ibabangat na Biblia ya say kamarerwa et samay mismon too, aliwa itan ya kabiangan na too ya tuloytuloy ya manbilay no ompatey so sakey. (Genesis 2:7, paimanod leksab; Ezequiel 18:4) Say too ya napaoli et agmikasakey lamet ed kamarerwa to; sikatoy palsaen lamet bilang mabilay ya kamarerwa.

 Lingon iisipen: Wala ray totoon paolien balet deralen iran tampol.

 No antoy duga: Ibabaga na Biblia ya “saramay nanggaway mauges et napaoli pian naukom.” (Juan 5:29) Balet ukomen ira base ed saray gawaen da kayari pamaolid sikara, aliwan antis na satan. Imbaga nen Jesus, “narengel na inaatey so boses na Anak na Dios, tan saramay dinmengel tan tinmulok et nabilay.” (Juan 5:25) Saray ‘ondengel tan ontulok’ ed saray naaralan da no napaoli ira et isulat iray ngaran da diad “lukot na bilay.”—Apocalipsis 20:12, 13.

 Lingon iisipen: No paolien so sakey a too, niiter ed sikato imay datin laman to antis ya inatey.

 No antoy duga: No inatey lay sakey ya too, nabulok lay laman to tan ompawil ed dabok.—Eclesiastes 3:19, 20.