Kasin Ina na Dios si Maria?

I-PLAY

Say ebat na Biblia

Andi, ag-ibabangat na Biblia ya si Maria so ina na Dios, tan agmet ibabaga na Biblia ya dayewen odino santoen si Maria. a Konsideraen:

Agbalot impasen nen Maria ya sikatoy ina na Dios. Impaliwawa na Biblia ya inyanak toy “Anak na Dios,” aliwan say mismon Dios.—Marcos 1:1; Lucas 1:32.
Agbalot imbaga nen Jesus ya si Maria et ina na Dios odino makanepegan ed espisyal ya debosyon. Diad tua, impetek nen Jesus so sakey a bii nen imbaga ton maliket kunoy Maria ta sikatoy ina nen Jesus. Say kuan nen Jesus: “Mas maliket iramay onderengel tan manusumpal ed salita na Dios!”—Lucas 11:27, 28.
Saray terminon “Ina na Dios” tan “Theotokos” (angilukon ed Dios) et anggapo ed Biblia.
Say terminon “Reyna na Tawen” diad Biblia et ag-ontutukoy ed si Maria, noagta diad sakey a palson diosa ya dinayew na saray apostatan Israelita. (Jeremias 44:15-19) Say “Reyna na Tawen” et nayarin si Ishtar (Astarte), sakey a diosa ed Babilonia.
Agdinayew na saray Kristiano nensaman si Maria, tan agda met inikdan na espisyal ya kagalangan. Imbaga na sakey ya historian ya seguradon saray Kristiano nensaman et “impulisay da ray kulto tan nayarin natatakot ira ya say sobran atension ed si Maria et panlapuay pansuspetsa ya saya et panagdayew ed diosa.”—In Quest of the Jewish Mary.
Ibabaga na Biblia ya say Dios et sipor lan wala. (Salmo 90:1, 2; Isaias 40:28) Lapud anggapoy gapo to, anggapo met sirin so ina to. Sakey ni, imposiblin ilukon nen Maria so Dios; malinew ya ibabaga na Biblia ya anggan say tawen et agto nakarga so Dios.—1 Arari 8:27.

Maria—Ina nen Jesus, aliwan “Ina na Dios”

Si Maria et sakey a Judio, tan sikatoy nanlapun mismo ed poli nen Arin David. (Lucas 3:23-31) Sikatoy apaboran a maong na Dios lapud pananisia tan debosyon to. (Lucas 1:28) Sikatoy pinili na Dios ya magmaliw ya ina nen Jesus. (Lucas 1:31, 35) Wala ni arum ya ananak da nen Jose ya asawa to.—Marcos 6:3.

Anggano ipapanengneng na Biblia ya nagmaliw ya disipulo nen Jesus si Maria, anggapo lay kaaruman nin impormasyon nipaakar ed sikato.—Gawa 1:14.

Akin et ipapasen na arum ya si Maria et ina na Dios?

Say sankaunaan ya pakanengnengan na debosyon ed si Maria et diad bandad sampot na fourth century C.E. Diad saman, say Katoliko et nagmaliw ya relihyon na Empiryo na Roma. Kanian dakel ya aliwan Kristiano so apilitan ya magmaliw a Kristiano. Inadapta met na simbaan so doktrina ya Trinidad, ya ag-ibabangat na Biblia.

Lapud doktrina ya Trinidad, inisip na dakel ya mimimisa ya no si Jesus et Dios, si Maria sirin et ina na Dios. Nen 431 C.E., improklama na sakey a grupo na konseho ed simbaan diad Efeso ya si Maria et “Ina na Dios.” Kinmayat so Mariolatry—say alabas ya debosyon ed si Maria—kayari na sayan proklamasyon diad Efeso. Insan nen akimembro ed simbaan iray datin pagano, saray imahen tan simbolo na Birhen Maria so kalkalnan sinmalat ed saray dadayewen dan diosa na pananak, a singa si Artemis (Diana, ed saray Romano) tan Isis.

Nen 432 C.E., ingganggan nen Pope Sixtus III so pampaalagey na simbaan diad Roma pian pagalangan so “Ina na Dios.” Impaalagey itan ed pasen ya asingger ed akaunan templo ya parad si Lucina, say Romanon diosa na pananak. Indeskribe na sakey ya autor iyan simbaan bilang “mantultuloy ya simbolo na impanlaok na Baleg ya Ina na saray paganon kulto tan say kulto ya mandadayew ed si Maria kayari na impagmaliw ya Kristiano na Roma.”—Mary—The Complete Resource.

a Wala ray relihyon ya ibabangat dan si Maria so ina na Dios. Nayarin ibaga dan sikato so “Reyna na Tawen” odino Theotokos, sakey a Griegon salita ya say labay ton ibaga et “angilukon ed Dios.”