Ibabaga na Biblia: “Saray mabilay amta ra a sikara ompatey ira: balet saray inaatey agda amta so bengatla.” (Eclesiastes 9:5; Salmo 146:4) Kanian no ompatey tayo, naandi tayo la. Saray inaatey et agla makapannonot, makapankimey, odino makalikna.

“Dia ed dabok ompawil ka”

 Impaliwawa na Dios so nagawa no ompatey tayo nen akitongtong ed unonan toon si Adan. Lapud ag-inmunor si Adan, inkuan na Dios ed sikato: “Lapud sika et dabok ka, dia ed dabok ompawil ka.” (Genesis 3:19) Antis ya pinalsa na Dios si Adan manlapud dabok na dalin, anggapoy Adan. (Genesis 2:7) Ontan met, no ompatey si Adan, sikatoy ompawil ed dabok tan naandi.

 Ontan met so nagagawad saray ompapatey natan. Oniay ibabaga na Biblia nipaakar ed totoo tan ayayep: “Amin nanlapu ed dabok, tan amin ompawil ed dabok.”​—Eclesiastes 3:19, 20.

Say patey et agmankabaliksan ya angangga lan amin

 Mabetbet ya ikokompara na Biblia so patey ed ugip. (Salmo 13:3; Juan 11:11-14; Gawa 7:60) Say toon aralem so ugip to et agto amtay nagagawad kaliberliber to. Ontan met, saray inatey et anggapoy amta ra. Balet ibabangat na Biblia ya bangonen na Dios iray inatey ya singa labat ira naugip tan bilayen to lamet ira. (Job 14:13-15) Diad saramay paolien na Dios, say patey et agmankabaliksan ya angangga lan amin.