Si Cain so panguloan ya anak nen Adan tan Eva, say unonan sanasawa. Inasawa toy sakey ed saray agi ton bii odino kanayon ton bii. Satan ya konklusyon et base ed ibabaga na Biblia tungkol ed si Cain tan say pamilya to.

Say ibabaga na Biblia tungkol ed si Cain tan say pamilya to

•   Amin ya too et nanlapud si Adan tan Eva. “Manlapud sakey a too [ya si Adan] et ginawa [na Dios so] amin a nasyon na totoo pian manayam diad interon dalin.” (Gawa 17:26) Say asawa nen Adan ya si Eva so nagmaliw ya “ina na amin a mabilay.” (Genesis 3:20) Kanian say inasawa nen Cain et nanlapu met ed si Adan tan Eva.

•   Si Cain tan say agi ton si Abel so inmunan ananak nen Eva pero wala ni ray arum ya agagi da. (Genesis 4:​1, 2) Nen pinalayas si Cain lapud pinatey toy agi to, nanreklamo, ya say kuan to: “Siopaman a makaromog ed siak et seguradon pateyen to ak.” (Genesis 4:14) Siopay tatakotan nen Cain ey? Ibabaga na Biblia ya si Adan et “nanilalak na lalaki tan bibii.” (Genesis 5:4) Mapatnag ya sarayan arum ya ananak nen Adan tan Eva so tatakotan nen Cain.

•   Nensaman, normal labat so panasawa na sankanayon. Singa bilang, say matoor ya si Abraham et inasawa toy agi tod ama. (Genesis 20:12) Imbawal labat so pangasawa na kanayon diad Mosaikon Ganggan ya niiter nilasus ya taon kayari panaon nen Cain. (Levitico 18:​9, 12, 13) Nensaman et dagdaiset so posibilidad ya nawalaay deperensya so ananak na saray sanasawan sankanayon, aliwan singa natan.

•   Base ed salaysay na Biblia, talagan nambilay si Adan, Eva, tan say pamilya da. Wala ray detalyadon listaan na poli manlapud si Adan ya nabasad libron Genesis ya insulat nen Moises, ontan met ed sulat na saray historian ya si Esdras tan Lucas. (Genesis 5:​3-5; 1 Awaran 1:​1-4; Lucas 3:​38) Binitla met na saray arum ya angisulat ed Biblia ya say istorya tungkol ed si Cain et tuan agawa.​—Hebreo 11:4; 1 Juan 3:​12; Judas 11.