Unonan Samuel 3:1-21
-
Atawag si Samuel pian magmaliw a propeta (1-21)
3 Say ugaw a Samuel et nantultuloy a nanlingkor+ ed si Jehova diad panangiwanwan nen Eli, balet diad saraman ya agew et mataltalag so salitan manlapud si Jehova; anggapoy pasingawey+ a nipapakabat ed karaklan.
2 Sakey ya agew et akarukol si Eli ed kuarto to, tan kinmapuy lay mata to; agto la makanengneng.+
3 Agni narep so lamparaan na Dios,+ tan mandukdukol si Samuel ed templo*+ nen Jehova, a kawalaan na Kaban na Dios.
4 Diad saman et tinawag nen Jehova si Samuel. Sikatoy inmebat: “Wadia ak.”
5 Batik si Samuel ed si Eli tan inkuan to: “Wadia ak, ta tinawag yo ak.” Balet inkuan to: “Agta ka tinawag. Dukol ka lamet.” Kanian sikatoy linman dinmukol.
6 Tinmawag lamet si Jehova: “Samuel!” Diad saman et binmangon si Samuel tan linmad si Eli tan inkuan to: “Wadia ak, ta tinawag yo ak.” Balet inkuan to: “Agta ka tinawag, ana’ko. Dukol ka lamet.”
7 (Natan et agni kabat a maong nen Samuel si Jehova, tan agni imparungtal nen Jehova ed sikato so salita to.)+
8 Kanian tinmawag lamet si Jehova ed komatlon danay: “Samuel!” Diad saman et sikatoy binmangon tan linmad si Eli tan inkuan to: “Wadia ak, ta tinawag yo ak.”
Insan la atebek nen Eli a si Jehova so manatawag ed ugaw.
9 Kanian inkuan nen Eli ed si Samuel: “La ka, dukol ka, tan no sikatoy ontawag lamet, oniay ibagam, ‘Mansalita ka, Jehova, ta ondedengel so lingkor mo.’” Tan linmay Samuel ed dukolan to.
10 Sinmabi si Jehova tan inmalagey diman tan tinmawag a singa nen inmuna: “Samuel, Samuel!” Diad saman et inkuan nen Samuel: “Mansalita ka, ta ondedengel so lingkor mo.”
11 Inkuan nen Jehova ed si Samuel: “Walay sakey a bengatlan gawaen kod Israel, a no narengelan na siopaman et onalitengteng iray layag to.+
12 Diad satan ya agew et gawaen kod si Eli so amin ya imbagak nipaakar ed sankaabungan to, manlapud gapo ya anggad sampot.+
13 Ibagam ed sikato ya ukomen koy sankaabungan to ed andi-anggaan lapud kasalanan ya amta to,+ ta iinsultoen na saray ananak to so Dios,+ balet agto ra binano.+
14 Kanian sinambaan kod sankaabungan nen Eli ya agbalot nasakbongan na saray bagat odino apay so kasalanan na sankaabungan nen Eli.”+
15 Akarukol ya anggad kabuasan si Samuel; insan nilukasan to iray puerta na abung nen Jehova. Natatakot si Samuel a mangibagad si Eli ed samay anengneng ton pasingawey.
16 Balet tinawag nen Eli si Samuel: “Samuel, ana’ko!” Sikatoy inmebat: “Wadia ak.”
17 Intepet to: “Antoy mensahen imbaga tod sika? Ipangasim, agmo iyaamot ed siak. Dusaen ka komon na ambelabelat na Dios no iyamot mod siak so anggan sakey a salita ed amin ya imbaga tod sika.”
18 Kanian imbagan amin nen Samuel ed sikato, tan anggapoy inyamot tod sikato. Inkuan nen Eli: “Nanlapu itan ed si Jehova. Gawaen to komon no antoy maabig ed pakanengneng to.”
19 Nantultuloy a binmaleg si Samuel, tan nansiansiay Jehova ed sikato+ tan agto inabuloyan ya agnagawa* so antokaman ed saray amin ya imbaga to.
20 Akabatan na interon Israel manlapud Dan anggad Beer-sheba a si Samuel et peteg a tinuro nen Jehova bilang propeta to.
21 Tan nantultuloy a nampanengneng si Jehova diad Silo, ta ditan imparungtal nen Jehova so inkasikato ed si Samuel. Agawa iyad panamegley na salita nen Jehova.+
