Komaduan Awaran 14:1-15
14 Si Abias et nampainawa la a kaiba na saray inmuunan atateng to, tan sikatoy imponpon da diad Syudad nen David;+ tan si Asa ya anak to so nagmaliw ya ari a kasalat to. Diad saray agew to, say dalin et awalaay kaligenan ed loob na samploy taon.
2 Et ginawa nen Asa no antoy maong tan duga ed pakanengneng nen Jehova a Dios to.
3 Ineekal to ray altar na sananey a dirios+ tan saray atagey a pasen, minemekmek to ray sagradon lusek,+ tan intutumba to ray sagradon poste.*+
4 Ontan met, imbaga tod saray taga Juda ya anapen day Jehova a Dios na inmuunan atateng da tan unoren da so Ganggan tan say bilin.
5 Kanian ineekal tod amin a syudad na Juda iray atagey a pasen tan saray panagpoolaan na insenso,+ tan diad uley to, say panarian et nantultuloy a walay kaligenan.
6 Sikatoy angipaalagey na saray apadiran a syudad diad Juda,+ lapud say dalin et walay kaligenan tan anggapoy akilaban ed sikato legan na sarayan taon, ta sikatoy inikdan nen Jehova na painawa.+
7 Inkuan tod Juda: “Ipaalagey tayo irayan syudad tan padiren tayo tan igawaan tayo na saray tori,+ puerta,* tan balewet. Ta say dalin et wala nin siansia ed sikatayo, lapud inanap tayoy Jehova a Dios tayo. Sikatoy inanap tayo, kanian impanpainawa to itayo manlapud amin ya akapaliber a kalaban.” Kanian asumpal iran nampaalagey.+
8 Si Asa et walaan na armada a 300,000 lalaki a nanlapud Juda a de-awit na saray angkakabaleg a panagsamper tan gayang. Tan manlapud Benjamin et walay 280,000 mabibiskeg a sundalo a de-awit na saray panagsamben* tan wala ray pana ra.*+
9 Ag-abayag et nilusob ira nen Zera ya Etiope a kaiba toy armada to a 1,000,000 a lalaki tan 300 a karwahe.+ Kasabi tod Maresa,+
10 pinmaway si Asa pian milaban ed sikato tan nandarasig ira parad guerra diad Lawak na Sefata diad Maresa.
11 Insan tinmawag si Asa ed si Jehova a Dios to+ tan inkuan to: “O Jehova, ag-importantid sika no kasin saramay tutulongan mo et dakel odino andiay pakayari.+ Tulongan mo kami, O Jehova a Dios mi, ta manmamatalek kami* ed sika,+ tan diad ngaran mo et linma kami a milaban ed sayan dakdakel a totoo.+ O Jehova, sika so Dios mi. Agmo komon aabuloyan a natalo ka na too.”+
12 Kanian tinalo nen Jehova iray Etiope diad arapan nen Asa tan diad arapan na Juda, tan batik iray Etiope.+
13 Inuusilan ira nen Asa tan saray totoon kaiba to ya anggad Gerar,+ tan mankibaktar iray Etiope ya anggad anggapoy akerad sikara a mabilay, ta dineral ira nen Jehova tan say armada to. Kayari na satan, angisempet iray dakdakel a samsam.
14 Ontan met, inataki ray amin a syudad ed paliber na Gerar, ta tinmakot iran maong ed si Jehova; tan nansamsam ira ed amin a syudad, ta amayamay so nasamsam ditan.
15 Nilusob da met iray tolda na saramay managkomponi ayayep, tan inaala ra so dakdakel a karnero tan saray kamelyo, insan la ra pinmawil ed Jerusalem.
Paimanod leksab
^ Literal, “saray doblin kapot.”
^ Literal, “tan gagatinan day bekang.”
^ Melag a panagsamper a kaslakan ya aawiten na saray managpana.
^ Literal, “onsasaral kami.”
