Komaduan Awaran 25:1-28
25 Si Amazias et mantaon na 25 sanen nagmaliw ya ari, tan 29 a taon a nanuley ed Jerusalem. Say ngaran na ina to et Jehoadan a taga Jerusalem.+
2 Sikatoy nantultuloy a nanggaway duga ed pakanengneng nen Jehova, balet ta aliwan diad interon puso.
3 Sanen binmiskeg lay uley to ed panarian, pinatey to ray lingkor to ya amatey ed ari ya ama to.+
4 Balet agto pinatey iray ananak da, ta tinumbok to imay akasulat ed Ganggan, diad libro nen Moises, a ditan et ingganggan nen Jehova: “Saray kaamaan et agnepeg ya ompatey lapud kasalanan na ananak da, tan saray ananak et agnepeg ya ompatey lapud kasalanan na kaamaan da; noagta kada sakey et nepeg ya ompatey lapud dilin kasalanan to.”+
5 Tan tinipon nen Amazias iray lalaki na Juda tan pinaalagey to ra unong ed saray pamilya na kaamaan da, unong ed papangulo na nilibo tan unong ed papangulo na nilasus parad interon Juda tan Benjamin.+ Inrehistro to ray mantaon na 20 a patagey,+ tan naamtaan to a walay 300,000 nipasal* a lalaki a nayarin mansundalo, a marunong a mangusar na gayang tan baleg a panagsamper.
6 Ontan met, sikatoy angupa ed Israel na 100,000 mabibiskeg a sundalo, a 100 a talenton* pilak so imbayar to.
7 Balet linmad sikato so sakey a too na tuan Dios, a kuan to: “O ari, agmo komon ipipila so armada na Israel, ta si Jehova et anggapo ed Israel,+ diad siopaman ya Efraimita.
8 Imbes, sika labat lay onla, tan manpakpel ka a miguerra. No andi, sarag kan ipatalo na tuan Dios ed kalaban mo, ta walay pakayari na Dios ya ontulong+ tan mangipatalo.”
9 Diad saya et inkuan nen Amazias ed too na tuan Dios: “Panon to balet may 100 a talento ya inter kod armada na Israel?” Et inmebat so too na tuan Dios: “Sarasarag kan ikdan nen Jehova na mas dakdakel nen satan.”+
10 Kanian pinaalis la nen Amazias so armadan linmad sikato a nanlapud Efraim, a pinasempet to ra. Balet sinmanok iran maong ed Juda, kanian sinmempet ira ya ampetapetang so ulo ra.
11 Insan nampakpel si Amazias tan indaulo toy armada to paonlad Lawak na Asin,+ tan pinatey toy 10,000 lalakin taga Seir.+
12 Tan walay 10,000 narel a mabilay na saray lalaki na Juda. Kanian inyakar da ra ed toktok na baleg a bato tan impepelag da ra ed kelas, tan abuybuyak so laman da ya amin.
13 Balet saramay kabiangan na armada a pinasempet nen Amazias tan agto impilad guerra+ et nilolooban da ray syudad na Juda, manlapud Samaria+ ya anggad Bet-horon;+ 3,000 so pinapatey da ditan tan angala ra na dakdakel a samsam.
14 Balet kapawil nen Amazias manlapud impamatey tod saray Edomita, awi-awit to ray dirios na saray taga Seir tan ginawa to ran dirios to,+ tan ginmapon dinmakmomod arapan da tan nampaasewek na bagat ed sikara.
15 Kanian sinmanok a maong si Jehova ed kinen Amazias, tan angibaki na propeta ya oniay inkuan tod sikato: “Akin et mandadayew ka ed dirios na saray totoo ya agda niliktar so dilin totoo ra manlapud limam?”+
16 Et legan ton mansasalita, imbaga na ari: “Kasin tinuro mi ka a mananimbawa na ari?+ Tunda ka!+ Labay mon pateyen da ka?” Et tinmunda so propeta, balet inkuan to: “Amtak a denesidi la na Dios a deralen to ka, lapud ginawam iya tan agka dinmengel ed simbawak.”+
17 Kayarin kinmonsulta si Arin Amazias na Juda ed saray mananimbawa to, oniay impaibaga tod si Jehoas ya anak nen Jehoahaz ya anak nen Jehu ya ari na Israel: “Gala, manarap ta’n dua diad guerra.”+
18 Et oniay mensahe nen Arin Jehoas na Israel ed si Arin Amazias na Juda: “Samay masabit a dika ed Lebanon et oniay mensahe tod samay sedro ed Lebanon, ‘Iter moy anak mon bii pian magmaliw ya asawa na anak kon laki.’ Balet sakey ya atap ya ayep ed Lebanon so dinmalan tan ginatin-gatinan to may masabit a dika.
19 Inkuan mo, ‘Kinabil ko* so Edom.’+ Kanian nagmaliw a malastog so pusom, a labay toy nigloria. Balet mansiansia kad abung mo.* Akin et iyan moy sarilim ed peligro tan kadederal, tan ipilanor mo ni so Juda?”
20 Balet agdinmengel si Amazias,+ ta saya et nanlapud tuan Dios pian niyawat to ira ed lima na kalaban,+ lapud nandayew ira ed dirios na Edom.+
21 Kanian tinmatdang si Arin Jehoas na Israel, tan nanarap irad guerra nen Arin Amazias na Juda diad Bet-semes+ a sakop na Juda.
22 Say Juda et tinalo na Israel, kanian balang sakey et batik ed abung* to.
23 Diad Bet-semes et inerel nen Arin Jehoas na Israel si Arin Amazias na Juda ya anak nen Jehoas ya anak nen Jehoahaz.* Insan sikatoy inyakar tod Jerusalem tan inggeba toy padir na Jerusalem manlapud Puerta na Efraim+ anggad Suyok a Puerta,+ ya 400 a kasiko.*
24 Inaala to so amin a balitok tan pilak tan amin a kagawaan ya aromog ed abung na tuan Dios a kaibay* Obed-edom tan ed saray pasen a pangiinay kayamanan ed abung* na ari,+ pati saray bihag. Insan sikatoy pinmawil ed Samaria.
25 Si Amazias+ ya anak nen Jehoas ya ari na Juda et nambilay ni na 15 taon kayari impatey nen Jehoas+ ya anak nen Jehoahaz ya ari na Israel.+
26 Tan saray arum nin agawa ed si Amazias, manlapud gapo ya anggad sampot, et akasulat ed Libro na Saray Arari na Juda tan Israel.
27 Manlapud samay panaon ya agla ontutumbok si Amazias ed si Jehova, wala ray nankokomplot+ sumpad sikato diad Jerusalem, kanian batik ed Lakis, balet angibaki ray lalaki ed sikato diad Lakis tan pinatey dad man.
28 Tan sikatoy inlugan dad karwahe tan imponpon da a kaiba na saray inmuunan atateng to diad syudad na Juda.
Paimanod leksab
^ Literal, “apili.”
^ Say sakey a talento et 34.2 kilo. Nengnengen so Apendise B14.
^ Literal, “mo.”
^ Odino “palasyom.”
^ Literal, “saray tolda.”
^ Manga 178 metro (584 piye). Nengnengen so Apendise B14.
^ Tinawag met ya Ahazias.
^ Odino “walad panangasikaso nen.”
^ Odino “palasyo.”
