Komaduan Awaran 28:1-27
28 Si Ahaz+ et mantaon na 20 sanen nagmaliw ya ari, tan 16 taon a nanuley ed Jerusalem. Agto ginawa so duga ed pakanengneng nen Jehova a singa ed ginawa nen David ya inmunan ateng to.+
2 Imbes, sikatoy nanakar ed saray dalan a nanakaran na saray arari na Israel,+ tan nanggawa ni ingen na saray metal ya estatua+ nen Baal.
3 Ontan met, sikatoy nampaasewek na bagat diad Lawak na Anak nen Hinom* tan pinoolan to ray anak ton lalaki,+ ya inalig to ray makapadimlan kagagawa na saray nasyon+ a pinataynan nen Jehova diad arapan na saray Israelita.
4 Sikatoy manbabagat met tan manpapaasewek na bagat diad saray atagey a pasen,+ diad saray pukdol, tan diad silong na kada masalompapak a kiew.+
5 Lapud saya, sikatoy inyawat nen Jehova a Dios to ed lima na ari na Sirya,+ kanian sikatoy tinalo ra tan inerel da so dakdakel a totoo to tan inyakar dad Damasco.+ Sikatoy niyawat met ed lima na ari na Israel, ya amatey ed dakdakel a totoo to.
6 Ta si Peka+ ya anak nen Remalias et amatey ed Juda na 120,000 masesebeg a lalaki diad loob na sakey agew, lapud tinaynan day Jehova a Dios na inmuunan atateng da.+
7 Tan si Zicri a sakey a sundalon Efraimita et pinatey toy Maasias ya anak na ari, si Azrikam a mangaasikaso ed palasyo,* tan si Elkana ya onkokomadua ed ari.
8 Sakey ni, saray Israelita et inaala ray 200,000 ed saray agagi ra—saray bibii, anak a lalaki, tan anak a bibii; dakdakel met a samsam so inaala ra, tan inawit da ray samsam ed Samaria.+
9 Balet walay propeta nen Jehova diman a manngaran na Oded. Sikatoy pinmaway tan inabet to so armada ya onsasabi lad Samaria tan inkuan tod sikara: “Lapud sinmanok ed Juda si Jehova a Dios na inmuunan atateng yo kanian inyawat to rad lima yo,+ tan pinapatey yo ra diad pinasyan sanok yo ya akasabi anggad tawen.
10 Tan natan et nononoten yon gawaen a lingkor yon lalaki tan bibii iray totoo ed Juda tan Jerusalem.+ Balet, agta nankasalanan kayo met ed si Jehova a Dios yo?
11 Natan dengel kayod siak tan ipawil yo ray ineerel yon totoo manlapud saray agagi yo, ta mandarlang lay sanok nen Jehova ed sikayo.”
12 Diad saman, say arum a papangulo na saray Efraimita a si Azarias ya anak nen Jehohanan, si Berekias ya anak nen Mesilemot, si Jehizkias ya anak nen Salum, tan si Amasa ya anak nen Hadlai, et kinompronta da iramay sundalon onsasabi a nanlapud guerra,
13 tan inkuan dad sikara: “Agyo iloloob dia iratay narel yo, ta mankasalanan tayod si Jehova. Satay nononoten yon gawaen et mangarum ed saray kasalanan tayo, anta dakdakel lay kasalanan tayo tan mandarlang lay sanok na Dios ed Israel.”
14 Kanian impalima na saray sundalo iramay narel tan saray samsam+ da ed saray prinsipe tan ed interon kongregasyon.
15 Diad saman, inala na saray lalakin aturo unong ed ngaran da iramay narel, tan amin a lakseb et inikdan da na kawes manlapud saray samsam. Kanian kinawesan da ra tan inikdan da ray sandalyas, naakan tan iinumen, tan larak parad saray baog da. Ontan met, saramay makapuy la et inlugan da ed saray asno tan inyakar dad saray agagi ra diad Jerico, say syudad na saray kiew a palma. Kayari na satan et pinmawil irad Samaria.
16 Diad saman, kinmerew na tulong si Arin Ahaz ed saray arari na Asirya.+
17 Tan linmusob tan inmataki lamet iray Edomita ed Juda tan wala ray inawit dan bihag.
18 Nilooban met na saray Filisteo+ iray syudad na Sefela+ tan Negeb ed Juda tan sinakop day Bet-semes,+ Aijalon,+ Gederot, Soco tan saray angkekelag* a baley na satan, say Timna+ tan saray angkekelag a baley na satan, tan say Gimzo tan saray angkekelag a baley na satan; tan nanayam ira ed saratan.
19 Inyabeba nen Jehova so Juda lapud si Arin Ahaz na Israel, ta nisengeg ed sikato et agla napatulok so Juda, a nanresulta ed alablabas ya ag-inkamatoor ed si Jehova.
20 Ag-abayag, si Arin Tilgat-pilneser*+ na Asirya et inmatakid sikato tan ginonigon to+ imbes a pabiskegen to.
21 Ta inupot nen Ahaz so amin a walad abung nen Jehova tan ed abung* na ari+ tan ed kaabungan na saray prinsipe tan niregaloan toy ari na Asirya; balet ag-itan akatulong ed sikato.
22 Et diad sayan panaon na pakakagonigon nen Arin Ahaz, lalo to nin impatnag so ag-inkamatoor ed si Jehova.
23 Sikatoy ginmapon nambagat ed saray dirios na Damasco+ ya akatalod sikato,+ tan inkuan to: “Lapud saray arari na Sirya et tutulongan na saray dirios da, manbagat ak ed saraya pian tulongan da ak.”+ Balet nagmaliw iraya a sengegan na impakatumba to tan say interon Israel.
24 Ontan met, tinipon nen Ahaz iray kagawaan ed abung na tuan Dios; insan dinederal to iratan,+ insara to ray kapot na abung nen Jehova,+ tan nanggawa na saray altar to diad kada suyok na Jerusalem.
25 Tan diad amin a syudad na Juda et sikatoy nanggawa na saray atagey a pasen a pampaasewekan na bagat parad arum a dirios,+ tan sinakitan toy liknaan nen Jehova a Dios na inmuunan atateng to.
26 Tan saray arum nin agawa ed sikato, amin a ginawa to manlapud gapo ya anggad sampot, et akasulat ed Libro na Saray Arari na Juda tan Israel.+
27 Tan si Ahaz et nampainawa la a kaiba na saray inmuunan atateng to, tan sikatoy imponpon dad syudad, diad Jerusalem, ta agda inawit ed ponponan na saray arari na Israel.+ Tan si Hezekias ya anak to so nagmaliw ya ari a kasalat to.
Paimanod leksab
^ Literal, “abung.”
^ Odino “walad kaliberliber.”
^ Odino “Tiglat-pileser.”
^ Odino “palasyo.”
