Komaduan Awaran 33:1-25
33 Si Manases+ et mantaon na 12 sanen nagmaliw ya ari, tan 55 taon a nanuley ed Jerusalem.+
2 Ginawa to so mauges ed pakanengneng nen Jehova, ya inalig to ray makapadimlan kagagawa na saray nasyon a pinataynan nen Jehova diad arapan na saray totoo na Israel.+
3 Impaalagey to lamet iray atagey a pasen ya inggegeba nen Hezekias+ ya ama to, angipaalagey na saray altar parad si Baal tan nanggawa na saray sagradon poste,* tan sikatoy dinmakmomo ed amin a bengatla ed tawen tan nanlingkor ed saratan.+
4 Nanggawa met na saray altar diad abung nen Jehova,+ a nipaakar ed saya et inkuan nen Jehova: “Diad Jerusalem mansiansia so ngaran ko ya anggad angga.”+
5 Tan sikatoy nanggawa na saray altar parad amin a bengatla ed tawen diad duaran sular na abung nen Jehova.+
6 Tan imparalan tod apoy iray dilin ananak to+ diad Lawak na Anak nen Hinom;+ sikatoy akibiang ed panagmahiko,+ panagparles, tan panagsalamangka, tan anuro na saray espiritista tan managparles.+ Alablabas so ginawa ton kaugsan diad pakanengneng nen Jehova, a sinakitan toy liknaan To.
7 Samay inukit ya imahen a ginawa to et inyan tod abung na tuan Dios,+ a nipaakar ed saya et inkuan na Dios ed si David tan si Solomon ya anak to: “Diad sayan abung tan diad Jerusalem, say pinilik manlapud amin a tribu na Israel, et pansiansiaen ko a permanente so ngaran ko.+
8 Tan agko lan balot pataynanen so Israel ed dalin ya inter kod inmuunan atateng da, daput no alwaran dan unoren so amin ya ingganggan kod sikara, say interon Ganggan, saray totontonen tan saray panangukom ya inter ko diad panamegley nen Moises.”
9 Intultuloy ya imbalang nen Manases so Juda tan saray manaayam ed Jerusalem, ya inlagyat to ran manggawa na mas mauges nen saray nasyon a dineral nen Jehova diad arapan na saray Israelita.+
10 Et naynay a mitotongtong si Jehova ed si Manases tan ed saray totoo to, balet agda inimano.+
11 Kanian pinakiwas nen Jehova iray pangulo na armada na ari na Asirya a milaban ed sikara, tan inerel day Manases diad panamegley na saray panagdeyeng,* tan binalor da na duaran gansan gulonggulong tan inawit dad Babilonia.
12 Sanen sikatoy nagogonigon, kinmerew na panangasi ed si Jehova a Dios to* tan nampaabeban maong ed arapan na Dios na inmuunan atateng to.
13 Et nantultuloy a nampikasi ed Sikato, kanian atenyeg ed pikakasi to tan dinengel To so ikekerew toy panangasi, tan impawil To ed Jerusalem bilang ari.+ Et naamtaan nen Manases a si Jehova so tuan Dios.+
14 Kayari na saya, sikatoy angipaalagey na bandad paway a padir na Syudad nen David+ ed sagur na Gihon+ diad lawak,* ya anggad Puerta na Sira,+ tan intuloy ton impaliber itan anggad Ofel,+ tan ginawa ton atagtagey. Ontan met, sikatoy anuro na saray pangulo na armada diad amin ya apadiran a syudad ed Juda.
15 Insan inekal tod abung nen Jehova iray sananey a dirios tan samay inukit ya imahen+ tan amin ya altar a ginawa to diad palandey a kawalaan na abung nen Jehova+ tan diad Jerusalem, insan impaibantak to iratan diad paway na syudad.
16 Inapiger to met so altar nen Jehova+ tan ginapoan toy mangiyapay ditan na saray bagat a pandurungoan+ tan saray bagat parad pisasalamat,+ tan imbaga tod Juda a manlingkor ira ed si Jehova a Dios na Israel.
17 Balet, saray totoo et manbabagat nin siansia diad saray atagey a pasen, ingen ta para labat ed si Jehova a Dios da.
18 Tan saray arum nin agawa ed si Manases, say pikakasi tod Dios to, tan saray imbaga na saray makakanengneng na pasingawey a mitotongtong ed sikato diad ngaran nen Jehova a Dios na Israel, et nilaktip ed rekord na saray agawa ed arari na Israel.
19 Tan say pikakasi to+ tan no panon ya inebatan so kerew to, say amin a kasalanan to tan say agto impanmatoor,+ saray angipaalageyan to na saray atagey a pasen tan angiletnegan to na saray sagradon poste*+ tan saray imahen antis a nampaabeba, et nilaktip ed saray insulat na saramay mangipapasabid sikato na pasingawey.
20 Tan si Manases et nampainawa la a kaiba na saray inmuunan atateng to, tan sikatoy imponpon da diad abay na abung to; tan si Amon ya anak to so nagmaliw ya ari a kasalat to.+
21 Si Amon+ et mantaon na 22 sanen nagmaliw ya ari, tan duay taon a nanuley ed Jerusalem.+
22 Sikatoy nantultuloy a nanggaway mauges ed pakanengneng nen Jehova, a singa ginawa nen Manases ya ama to;+ tan sikatoy nambagat ed amin ya imahen a ginawa nen Manases ya ama to,+ tan nanlingkor ed saratan.
23 Balet si Amon et agnampaabeba ed arapan nen Jehova+ a singa ed impanpaabeba nen Manases ya ama to;+ imbes, pinarakel a maong nen Amon iray kasalanan to.
24 Diad saginonor, saray lingkor to et nankokomplot sumpad sikato+ tan pinatey da diad mismon abung to.
25 Balet pinatey na saray totood dalin da so amin a nankokomplot sumpad si Arin Amon,+ tan si Josias ya anak to+ so ginawa ran ari a kasalat to.
Paimanod leksab
^ Odino posiblin, “diad saray abot.”
^ Odino “pinalemek toy lupa nen Jehova a Dios to.”
^ Odino “kulos.”
