Komaduan Awaran 4:1-22
4 Insan nanggaway Solomon na gansan altar,+ a 20 kasiko so karukey to, 20 kasiko so kalapar to, tan 10 kasiko so katagey to.
2 Sikatoy nanggawa na Dayat*+ a minoldin metal. Malimpek itan, a 10 kasiko so sukat na sangab to tan 5 kasiko so katagey to, tan makaliber ed satan so lubir a panagsukat a 30 kasiko so karukey to.+
3 Tan diad leksab to et wala ray akapaliber a tabyayong* a dekorasyon,+ a samplora ed kada kasiko diad paliber na Dayat. Saray tabyayong a dekorasyon et duaran dasig tan ginawan katekep na Dayat.
4 Impatoon itan ed 12 baka,+ 3 so akaarap ed amianen, 3 so akaarap ed sagur, 3 so akaarap ed abalaten, tan 3 so akaarap ed bukig; tan akatapew ed sikara so Dayat, tan walad bandad pegley na satan iray ebet a parte na laman da.
5 Tan say kakapal na Dayat et sakey dakulap;* tan say sangab to et ginawan singa sangab na kopa, a singa rosas a lirio. Say nakarga to et 3,000 sukat a bat.*
6 Ontan met, sikatoy nanggawa na samploran palanggana a panurasan tan inyan toy limara ed kawanan tan limara ed kawigi.+ Ditan so panurasan da ed saray bengatlan uusaren parad apay a popoolan.+ Balet say Dayat et parad panuras na saray saserdote.+
7 Insan sikatoy nanggawa na samploran kandelero a balitok,+ unong ed espisipikon imbagad sikato,+ tan inyan to iratan ed templo, limara ed kawanan tan limara ed kawigi.+
8 Sikatoy nanggawa met na samploran lamisaan tan inyan to iratan ed templo, limara ed kawanan tan limara ed kawigi;+ tan sikatoy nanggawa na 100 a balitok a yaong.
9 Insan nanggaway sular+ na saray saserdote+ tan say baleg a sular+ tan saray puerta na satan, tan binalkot to na gansa iray puerta na saratan.
10 Tan say Dayat et inyan tod nikawanan, diad bandad abalaten-bukig.+
11 Nanggawa met si Hiram na saray latan kargaan na dapol, saray pala, tan saray yaong.+
Kanian asumpal nen Hiram so kimey a ginawa to parad si Arin Solomon diad abung na tuan Dios:+
12 say duaran lusek+ tan saray kurti-yaong ya ulo na saratan; say duaran iket a dekorasyon+ a pansakbong ed duaran kurti-yaong ya ulo na saray lusek;
13 say 400 a granada+ parad duaran iket a dekorasyon, salanti, duaran dasig iran granada parad kada iket a dekorasyon a pansakbong ed duaran kurti-yaong ya ulo na duaran lusek;+
14 say samploran kariton* tan samploran palanggana a walad tapew na saray kariton;+
15 say Dayat tan say 12 baka ya angipatoonan ed satan;+
16 tan saray latan kargaan na dapol, saray pala, saray tinidor,+ tan amin a kagawaan da ya inusaran na masileng a gansa a ginawa nen Hiram-abiv+ parad si Arin Solomon pian usaren ed abung nen Jehova.
17 Minoldi iratan na ari ed makapal a pitek diad distrito na Jordan a walad ketegan na Sucot+ tan Zereda.
18 Amin irayan kagawaan a ginawa nen Solomon et agaylay karakel; ag-amta so simbang na gansa.+
19 Ginawa nen Solomon so amin a kagawaan+ parad abung na tuan Dios: say balitok ya altar;+ saray lamisaan+ a tapewan na saray apay a tinapay;+
20 saray kandelero tan saray lamparaan a gawad puron balitok,+ a seselselan diad arap na sankadaleman a kuarto unong ed saray kakaukolanen;
21 tan saray rosas, lamparaan, tan panagsipit, a saraya et gawad balitok, salanti, sankapuroan a balitok;
22 saray gawad puron balitok a panag-erep, yaong, kopa, tan kargaan na ngalab; tan saray gawad balitok a puerta na abung, saray kapot na Sankasantosan,+ a saratan et walad loob, tan saray kapot na Masanto.*+
Paimanod leksab
^ Odino “depositoan na danum.”
^ Odino “aksiw.”
^ Manga 7.4 sentimetro (2.9 pulgada). Nengnengen so Apendise B14.
^ Say sakey a bat et 22 litro. Nengnengen so Apendise B14.
^ Odino “kariton a panagkargaay danum.”
^ Literal, “templo,” a mapatnag ya ontutukoy ed Masanto.
