Komaduan Awaran 5:1-14
5 Kanian asumpal nen Solomon so amin a kimey a kaukolan ton gawaen parad abung nen Jehova.+ Insan inloob nen Solomon so amin a bengatlan pinasanto nen David ya ama to,+ tan saray pilak, balitok, tan say amin a kagawaan et inyan tod saray pasen a pangiinay kayamanan ed abung na tuan Dios.+
2 Diad saman et tinipon nen Solomon iray mamatatken na Israel, amin ya ulo na saray tribu tan saray pangulo na saray pamilya na kaamaan ed Israel. Linma rad Jerusalem pian itatdang so kaban na sipanan nen Jehova manlapud Syudad nen David,+ say Sion.+
3 Et nantitipon so amin a lalaki na Israel diad arapan na ari legan na piesta* a seselebraan ed komapiton bulan.+
4 Kanian sinmabi so amin a mamatatken na Israel, tan say Kaban et sinakbat na saray Levita.+
5 Intatdang day Kaban, say tolda a pantitiponan,+ tan amin a masanton kagawaan a walad tolda. Saray saserdote tan saray Levita* so angitatdang ed saratan.
6 Si Arin Solomon tan amin ya Israelitan impatawag to a mitipon ed sikato et wala rad arapan na Kaban. Amayamay so imbagat a karnero tan baka,+ ya agnabilang ed karakel.
7 Insan inyakar na saray saserdote so kaban na sipanan nen Jehova diad pasen to, diad loob na sankadaleman a kuarto na abung, say Sankasantosan, diad silong na saray payak na saray kerubin.+
8 Saray payak na saray kerubin et akabuskag ed kawalaan na Kaban, kanian nasasaniban na saray kerubin so Kaban tan saray panagsakbatan+ na satan.
9 Andukdukey iray panagsakbatan kanian say nguro na saratan et sankanengneng diman ed Masanto diad arap na sankadaleman a kuarto, balet ag-iratan nanengneng ed paway. Tan wadman iratan ya anggad sayan agew.
10 Anggapoy arum a walad Kaban noag samay duaran tapyas na bato ya inyan ditan nen Moises diad Horeb,+ sanen akisipanan si Jehova+ ed saray totoo na Israel nen pinmaway irad Ehipto.+
11 Sanen pinmaway iray saserdote ed masanton pasen (ta amin a wadman a saserdote et pinasantos day inkasikara,+ antokaman so grupo ra),+
12 amin a Levitan managkansion+ a walad grupo di Asaf,+ Heman,+ tan Jedutun,+ tan saray ananak tan agagi ra et akakawes na maabig a klase na tela, a wala ray sankabembenan dan piangpiang, nandeles iran instrumento, tan saray arpa; akaalagey ira diad bukig na altar, tan kaiba da ray 120 saserdote a mamapaknol na trumpeta.+
13 Diad saman sanen saray managtrumpeta tan saray managkansion et nankakasakey a mangirarayew tan misasalamat ed si Jehova, tan sanen nadngel so tanol na saray trumpeta, saray piangpiang, tan arum nin instrumento legan dan idadayew si Jehova, “ta sikatoy maomaong; say matoor a panangaro to et mansiansia ya anggad angga,”+ say abung, say mismon abung nen Jehova, et apano na lurem.+
14 Agla nituloy na saray saserdote so panlilingkor da lapud samay lurem, ta say abung na tuan Dios et apano na gloria nen Jehova.+
