Komaduan Awaran 9:1-31
9 Nadngelan na reyna na Sheba+ so nipaakar ed kinen Solomon, kanian sikatoy linmad Jerusalem pian suboken si Solomon diad panamegley na mairap iran tepet.* Walay angulop ed sikaton makapadinayew a grupo tan wala ray kamelyon de-awit na larak a balsamo, dakdakel a balitok,+ tan saray mablin bato. Sikatoy linmad si Solomon tan imbaga ton amin so walad puso to.+
2 Et inebatan nen Solomon so amin a tepet to. Anggapon balot so nanirapan nen* Solomon ya ipaliwawa ed sikato.
3 Sanen anengneng na reyna na Sheba so karunongan nen Solomon,+ say abung ya impaalagey to,+
4 saray naakan diad lamisaan to,+ say akayurongan na saray opisyal to, say panagserbi ed lamisaan na saray serbidor tan say sulong da, saray managserbi na iinumen to tan say sulong da, tan saray bagat a popoolan a regular ton iyaapay diad abung nen Jehova,+ agaylay impandinayew to.*
5 Kanian inkuan tod ari: “Tua may nadngelan kon balita sanen wala ak ed dilin bansak nipaakar ed saray agawaan mo* tan karunongan mo.
6 Balet ta agko anisiaan iray balita anggad sanen linma ak dia tan anengneng kon mismo.+ Et samay imbaga rad siak et anggapo ni kapaldua na abalbaleg a karunongan mo.+ Apalumbasan mo ni so abalitaan ko.+
7 Maliket iray totoom, tan maliket iray lingkor mo a naynay a walad arapan mo, ya ondedengel ed karunongan mo!
8 Narayew komon si Jehova a Dios mo, samay naliliketan ed sika diad impamayurong tod sika ed trono to bilang ari parad si Jehova a Dios mo. Lapud inar-aro na Dios mo so Israel,+ a labay ton pansiansiaen itan ya anggad angga, tinuro to ka bilang ari pian mangipaakseb na hustisya tan inkatunong.”
9 Insan inikdan to so ari na 120 talento* a balitok,+ dakdakel a larak a balsamo, tan saray mablin bato. Anggapo lan balot so naawat a makapipara ed larak a balsamo ya inter na reyna na Sheba ed si Arin Solomon.+
10 Ontan met, saray lingkor nen Hiram tan saray lingkor nen Solomon ya angawit na saray balitok manlapud Ofir+ et angawit met na saray troso na kiew ya algum tan saray mablin bato.+
11 Saray troso na kiew ya algum et inusar na ari diad impanggawa tod saray takayan parad abung nen Jehova+ tan parad abung* na ari,+ tan ed saray arpa tan saray nandeles ya instrumento na saray managkansion.+ Anggapo nin balot so anengneng ed dalin na Juda a makapipara ed saratan.
12 Inter met nen Arin Solomon so antokaman a pinirawat tan kinerew na reyna na Sheba, a mas ni nen* saramay inawit tod ari. Insan sikatoy sinmempet ed dilin bansa to a kaiba iray lingkor to.+
13 Tan say belat na balitok a nanaawat nen Solomon kada taon et 666 a talenton balitok,+
14 nilikud ed saray aawiten na saray managlako tan saray negosyante tan amin ya arari na saray Arabo tan saray gobernador diad dalin a mangaawit na saray balitok tan pilak ed si Solomon.+
15 Si Arin Solomon et nanggawa na 200 ya angkakabaleg a panagsamper ya inusaran toy nilaokan a balitok+ (600 a siklon* nilaokan a balitok so inusar ed kada panagsamper)+
16 tan 300 a panagsamben* ya inusaran toy nilaokan a balitok (taloran mina* a balitok so inusar ed kada panagsamben). Insan inyan iraya na ari diad Abung na Kakiewan na Lebanon.+
17 Nanggawa met so ari na marakdakep a tronon garing* tan binalkot to itan na puron balitok.+
18 Walay anemiran balitang a paonlad trono, tan walay toonan na sali a gawad balitok ya akakabit ed trono, tan wala ray tapewan na lima ed balang diking na yurongan, tan walay duaran estatua na leon+ diad abay na saray tapewan na lima.
19 Tan walay 12 estatua na leon+ diad anemiran balitang, sakey ed kada sampot na anemiran balitang. Anggapoy arum a panarian ya akapanggawa na singa satan.
20 Amin a panagkargaay iinumen nen Arin Solomon et gawad balitok, tan amin a kagawaan ed Abung na Kakiewan na Lebanon et gawad puron balitok. Anggapo so gawad pilak, ta say pilak et ipapasen ya anggapoy kablian diad panaon nen Solomon.+
21 Ta saray barko na ari et oonlad Tarsis+ a kaiba iray lingkor nen Hiram.+ Maminsan ed kada taloy taon et onsasabi iray barko na Tarsis a nankarga na saray balitok tan pilak, saray garing,*+ bakes, tan paboreal.*
22 Kanian si Arin Solomon so sankayamanan tan sankarunongan ed amin ya arari na dalin.+
23 Tan saray arari na dalin et labalabay day makapiarap ed si Solomon pian ondengel ed karunongan to ya inyan na tuan Dios ed puso to.+
24 Saramay ombibisitad sikato et mangaawit na regalo—saray kagawaan a pilak, kagawaan a balitok, kawes,+ armas, larak a balsamo, kabayo, tan mula*—tan tinaon iyan nagagawa.
25 Tan si Solomon et awalaan na 4,000 kuwadra parad saray kabayo tan karwahe to tan 12,000 kabayo,*+ tan inyan to iratan diad saray syudad na saray karwahe tan diad asingger ed kawalaan na ari ed Jerusalem.+
26 Tan sikatoy nanuley ed amin ya arari manlapud Ilog* ya anggad dalin na saray Filisteo tan anggad ketegan na Ehipto.+
27 Say pilak diad Jerusalem et ginawa na ari a singa karakel na saray bato, tan saray kiew a sedro a singa karakel na saray kiew a sikomoro a walad Sefela.+
28 Tan mangaawit ira ed si Solomon na saray kabayo a manlalapud Ehipto+ tan ed arum a dalin.
29 Tan saray arum nin agawa ed si Solomon,+ manlapud gapo ya anggad sampot, et nilaktip ed saray insulat nen Natan+ a propeta, diad propesiya nen Ahias+ a Silonita, tan diad rekord na saray pasingawey nen Ido+ a makakanengneng na pasingawey nipaakar ed si Jeroboam+ ya anak nen Nebat.
30 Si Solomon et 40 taon a nanuley ed interon Israel legan a walad Jerusalem.
31 Insan si Solomon et nampainawa la a kaiba na saray inmuunan atateng to. Et sikatoy imponpon da diad Syudad nen David ya ama to;+ tan si Rehoboam ya anak to so nagmaliw ya ari a kasalat to.+
Paimanod leksab
^ Odino “na saray pabitla.”
^ Literal, “Anggapoy niyamot ed.”
^ Literal, “anggapo lay espiritu ed sikato.”
^ Odino “saray salitam.”
^ Say sakey a talento et 34.2 kilo. Nengnengen so Apendise B14.
^ Odino “palasyo.”
^ Odino posiblin, “nilikud nid saray regalo a miparad bili na.”
^ Say sakey a siklo et 11.4 gramo. Nengnengen so Apendise B14.
^ Melag a panagsamper a kaslakan ya aawiten na saray managpana.
^ Diad Hebreon Kasulatan, say sakey a mina et 570 gramo. Nengnengen so Apendise B14.
^ Diad Ingles et ivory. Sakey a klase na mablin materyales a manlalapud saray amputin pasingil na saray elepante tan arum ni ran ayayep.
^ Diad Ingles et ivory. Sakey a klase na mablin materyales a manlalapud saray amputin pasingil na saray elepante tan arum ni ran ayayep.
^ Sakey a masansanting tan makolor ya ayep a singa kabaleg na pabo. Diad Ingles et peacock.
^ Say Hebreon salita et manutukoy ed nanlaok a poli na asno tan kabayo.
^ Odino “lalakin de-kabayoan.”
^ Salanti, say Eufrates.
