Komaduan Samuel 1:1-27
1 Kayari impatey nen Saul, sanen akapawil lay David ed impanalo* tod saray Amalekita, nansiansiay David diad Ziklag+ ed loob na duay agew.
2 Diad komatlon agew et walay sinmabin laki a nanlapud kampo nen Saul, ya apilat iray kawes to tan kadadabok so ulo to. Sanen naasinggeran toy David, sikatoy tinmalimukor tan dinmakmomo ed dalin.
3 Sikatoy tinepetan nen David: “Nanlapuan mo?” Inyebat to: “Tinmakas ak ed kampo na Israel.”
4 Intepet ed sikato nen David: “Antoy agawa? Ipangasim, ibagam ed siak.” Inyebat to: “Inmatras ed panlalaban iray sundalo na Israel tan amayamay so atumba tan inatey. Anggan si Saul tan Jonatan ya anak to et inatey met.”+
5 Insan tinepetan nen David so kalangweran a laki ya angibalita ed sikato: “Panon mon amta ya inatey lay Saul tan si Jonatan ya anak to?”
6 Inmebat so kalangweran a laki: “Nibanbana a wadman ak ed Palandey Gilboa,+ tan wadman si Saul ya akapapeg ed gayang to, tan sikatoy nabotan na saray akakarwahe tan de-kabayoan a sundalo.+
7 Sanen linmingaw tan anengneng to ak, tinawag to ak, tan inkuan ko, ‘Anto man?’
8 Tinepetan to ak, ‘Siopa ka?’ tan inmebat ak, ‘Sakey ak ya Amalekita.’+
9 Insan inkuan to, ‘Ipangasim, singger kad siak tan patey mo ak, ta pinasya lay paniirap ko, balet mabilay ak ni.’*
10 Kanian inasinggeran ko tan pinatey ko,+ ta amtak ya agla manbilay sanen sikatoy atumba tan asugatan. Insan inalak so korona ed ulo to tan purselas ed lima to, tan inyakar ko dia ed sika, katawan ko.”
11 Diad saman et inegnaan nen David iray kawes to tan pinilat to, tan ontan met so ginawa na amin a lalakin kaiba to.
12 Tan manak-akis ira tan nanayunal ira+ anggad labi lapud si Saul, si Jonatan ya anak to, saray totoo nen Jehova, tan say sankaabungan na Israel,+ ta inaatey ira ed espada.
13 Tinepetan nen David imay kalangweran a laki ya angibalita ed sikato: “Taga iner ka?” Inkuan to: “Anak ak na sakey a dayo, sakey ya Amalekita.”
14 Insan inkuan nen David ed sikato: “Akin et agka tinmakot a mangitagey na limam pian pateyen so nilanaan nen Jehova?”+
15 Diad saman et tinawag nen David so sakey ed saray kalangweran a lalaki tan inkuan to: “Singger ka dia tan sikatoy patey mo.” Kanian sikatoy pinatey to.+
16 Inkuan nen David ed sikato: “Ebatan mon mismo* so dalam, ta say mismon sangim so nantasi sumpad sika diad impangikuan mon, ‘Siak a mismo so amatey ed nilanaan nen Jehova.’”+
17 Insan inkansion nen David iyan tagleey* lapud si Saul tan si Jonatan ya anak to+
18 tan imbaga ton nepeg ya ibangat ed saray totoo na Juda so kansion a tagleey a tinawag a “Say Pana,” a nisulat ed libro nen Jasar:+
19 “Say karakpan mo, O Israel, et pinatey ed atagey iran pasen mo.+
Atumba iray mabibiskeg!
20 Agyo itan ibabaga ed Gat;+Agyo itan iyaabawag ed saray karsada na Askelon,Ta ompan manliket iray bibiin ananak na saray Filisteo,Ta ompan manggayaga iray bibiin ananak na saray ag-asegat a lalaki.
21 Sikayo ran kapalandeyan na Gilboa,+Agkomon niwala ed sikayo so linaew odino uran,Odino kaumaan a mamapawalay masanton kontribusyon,+Ta adutakan ditan so panagsamper na saray mabibiskeg,Say panagsamper nen Saul et agla alanaan na larak.
22 Agsinmener so pana nen Jonatan+Ed dala na saray pinatey, ed taba na saray mabibiskeg,Tan say espada nen Saul et agpinmawil ya agmatalona.+
23 Si Saul tan si Jonatan,+ inad-aro tan pinabpabli* legan na impanbilay da,Tan anggan diad ipapatey et ag-ira nansian.+
Sikaray mas maples nen saray agila,+Mas mabiskeg nen saray leon.+
24 O bibiin ananak na Israel, akisan yoy Saul,Ya angawes ed sikayo na ambalbalangan abel tan ankabli iran dekorasyon,Ya angiyan na saray balitok a parakep ed saray kawes yo.
25 Atumba iray mabibiskeg legan na panlalaban!
Apatey si Jonatan diad atagey iran pasen mo!+
26 Agaylay ermen ko lapud sika, agik a Jonatan;Pinabpabli ta ka.+
Mas makapadinayew so panangarom ed siak nen say panangaro na saray bibii.+
27 Atumba iray mabibiskegTan naandi iray armas a parad guerra!”
Paimanod leksab
^ Odino “impamatey.”
^ Odino “lapud wala nid siak so interon kamarerwak.”
^ Literal, “Niiyan ed mismon ulom.”
^ Odino “kansion parad paneermen.”
^ Odino “makapaliket.”
