Isaias 14:1-32
14 Ta kasian nen Jehova so Jacob,+ tan pilien to lamet so Israel.+ Panayamen to ra ed dalin da,+ tan mila ed sikara iray dayo tan miulop ira ed sankaabungan nen Jacob.+
2 Tan awiten ira na saray totoo tan iyakar da ra ed dilin pasen da, tan kayarianen ira na sankaabungan na Israel bilang lingkor a lalaki tan bibii+ diad dalin nen Jehova; tan aripenen da iramay angaripen ed sikara, tan uleyan da iramay datin mamapairap ed sikara a mantrabaho.*
3 Diad satan ya agew sano iter nen Jehova ed sikayo so pakainawaan ed panotot tan ermen tan irap lapud impangaripen dad sikayo,+
4 ibalikas yo iyan proverbio* ed ari na Babilonia:
“Inatey la imay mamapairap ed arum a mantrabaho!*
Angangga la so panamairap!+
5 Pinuter la nen Jehova so lewet na saray mauges,Say baston na saray manuley,+
6 Samay manngilet tan ag-ontutundan mamepekpek ed saray totoo,+Samay masanok a manasakop tan ag-ontutundan mamapairap ed saray nasyon.+
7 Akainawa la so interon dalin, anggapo lay gulo ditan.
Maneyag ed liket iray totoo.+
8 Anggan saray kiew ya enebro et manliket met lapud sika,Pati saray kiew a sedro ed Lebanon.
Ibabaga ra, ‘Manlapu lad inkaplag mo,Anggapo lay oonla ed sikami a managbatang na kiew.’
9 Anggan say Lubok* ed dalem na dalin et atenyeg lapud sikaTa pian abeten to ka ed isabim.
Lapud sika, binangon to iramay naugip ed patey,Amin a maruksan lider* ed dalin.
Pinaalagey to iray arari na nasyon manlapud trono ra.
10 Amin da et mansalita tan ikuan dad sika,‘Kasin kinmapuy ka met la a singa sikami?
Kasin nagmaliw ka lan kaparpara mi?
11 Naplag ed Lubok* so inkamapaatagey mo,Say tanol na saray nandeles ya instrumentom.+
Saray bigis et akabilkag a singa dukolan mo,Tan akakubot iratan ed sika.’
12 Naplag ka manlapud tawen,O sika a maliwawan bitewen, anak na palbangon!
Apaktak ka lad dalin,Sika ya anaeg ed saray nasyon!+
13 Inkuan mod pusom, ‘Onsegep ak ed tawen.+
Iyan koy tronok ed tagey na saray bitewen na Dios,+Tan onyurong ak ed palandey a pantitiponan,Diad sankaarawian iran pasen ed amianen.+
14 Labsanan ko iray sankatageyan a lurem;Gawaen koy sarilik a mipara ed Sankatagyan.’
15 Balet napelag kad Lubok,*Diad sankaaraleman iran pasen na abot.
16 Saramay makakanengneng ed sika et linggisen da ka;Usisaen da kan maong, ya ikuan da,‘Agta saya imay toon manyayakayak ed dalin,A yeyegyegen to iray panarian,+
17 A ginawa ton kalawakan so panaayaman a dalinTan dinederal to iray syudad ditan,+Ya agto labay ya ibulos iray priso to?’+
18 Saray arum ya arari na saray nasyon,On, amin da et mapagalang a niponpon,Kada sakey ed dilin lubok* to.
19 Balet nibantak ka ya anggapoy pangiponponan ed sika,Singa sakey ya aglabalabay a simit,*Ya atabonan na saray bangkay na totoon dinuduyok na espada,A saraya et ipelag ed mabaton abot,Singa inatey ya ayep a ginatin-gatinan.
20 Agmo ra nakaiba ed lubok,Lapud dineral moy mismon nasyon mo,Pinatey mo iray mismon totoom.
Aglan balot nasalambit so ngaran na saray ilalak na saray managgaway mauges.
21 Mangiparaan kayoy pasen a pamateyan ed ananak toLapud kasalanan na inmuunan atateng da,Pian ag-ira onataki tan sakopen da so dalinTan panoen da na saray syudad da iyan dalin.”
22 “Onsumpa ak ed sikara,”+ so imbaga nen Jehova na saray armada.
“Tan paandien kod Babilonia so ngaran tan saray akera tan ilalak tan poli,”+ so imbaga nen Jehova.
23 “Tan sikatoy gawaen kon kayarian na porcupino* tan maranum a pasen, tan sikatoy panisen ko na kadederal,”+ so imbaga nen Jehova na saray armada.
24 Oniay insamba nen Jehova na saray armada:
“No antoy gagalak et seguradon nagawa,Tan no antoy ginetmak et ontua.
25 Buyaken ko so Asiryano ed dalin ko,Tan sikatoy gatin-gatinan ko ed saray kapalandeyan ko;+
Naekal so pako to ed saray totook,Tan naekal ed takeb da so ipapasakbat to.”+
26 Saya so niganan nagawa* ed interon dalin,Tan saya so lima a niyunat* ed amin a nasyon.
27 Ta ginetma la itan nen Jehova na saray armada,Kanian siopay makaamper ed satan?+
Akaunat la so lima to,Kanian siopay makasarag a mangipaliis ed satan?+
28 Diad samay taon ya inatey si Arin Ahaz,+ oniay inyabawag a mensahe:
29 “Agka manliliket, Filistia, anggan siopa ed sikayo,Anggano aputer la so baston na samay mamapasakit ed sikayo.
Ta diad lamot na say serpiente+ et ompaway so sakey a maditan uleg,+Tan say ilalak to et singa apoy ya uleg ya ontitikyab.*
30 Legan a mamangan iray panguloan na saray pakaskasiTan maligen ya ondudukol iray pobri,Pateyen kod eras so lamot mo,Tan napatey iramay natilak ed sika.+
31 Manugaog ka, O puerta! Akis ka, O syudad!
Onkapuy so linawa yon amin, O Filistia!
Lapud walay ompaway ya asewek manlapud amianen,Tan anggapoy matantan ed saray akalinyan sundalo to.”
32 Panoy iyebat da ed saray mensahero na nasyon?
Ta si Jehova so angiletneg ed pundasyon na Sion,+Tan ditan so pasen a salimbengan na saray napapairap a totoo to.
Paimanod leksab
^ Odino “iramay managganggan ed sikara.”
^ Odino “kantiaw.”
^ Odino “imay managganggan.”
^ Literal, “a kalakian a kanding.”
^ Literal, “abung.”
^ Odino “sanga.”
^ Sakey a baleg ya utot a makaturok iray bago to. Diad Ingles et porcupine.
^ Literal, “so simbawa a nisimbawa.”
^ Odino “ya akaparaan a maneral.”
^ Odino “maditan uleg a maples a mangetket.”
