Isaias 65:1-25
65 “Inabuloyan kon anapen ak na saramay agnantepet nipaakar ed siak;Inabuloyan kon naromog ak na saramay agnananap ed siak.+
Inkuan ko, ‘Wadia ak, wadia ak!’ ed sakey a nasyon ya ag-ontatawag ed ngaran ko.+
2 Sanagew kon iyuunat iray limak ed totoon benger,+Saramay manaakar ed dalan a mauges,+Ya ontutumbok ed dilin kanonotan da;+
3 Totoon naynay a mangiinsulto ed siak ya arap-arapan,+A manbabagat ira ed saray hardin+ tan papaaseweken da iray bagat da diad tapew na saray laryo.
4 Onyuyurong ira ed saray lubok,+Tan mamapalabas ira na labi diad saray maamot a pasen,*Mamangan ira na karne na baboy,+Tan walad saray pananginan da so digo na makapadimla* iran bengatla.+
5 Ibabaga ran, ‘Ditan ka labat; agka onaasingger ed siak,Ta mas masanto ak nen say sika.’*
Singa iraya asewek ed eleng ko, singa apoy a mandarlang a sanagew.
6 Nisulat iya ed arapan ko;Agak manpareen,Noagta ombales ak ed sikara,+Idapok ed sikara so panangibales diad sukat a manepeg ed sikara*
7 Lapud saray kasalanan da tan saray kasalanan na inmuunan atateng da,”+ so inkuan nen Jehova.
“Ta pinaasewek da iray bagat da ed saray palandeyTan pinabanday da ak ed saray pukdol,+Sukaten ko nin unona so bayar a manepeg ed sikara.”*
8 Oniay inkuan nen Jehova:
“No panon a say balon alak et naromog ed saray monil na ubas,Tan walay mangibagan, ‘Agyo itan dederalen, ta walay maabig* a naala ed satan,’
Ontan met so gawaen ko nisengeg ed saray lingkor ko;Agko ra deralen ya amin.+
9 Papawayen ko ed Jacob so sakey ya ilalak*Tan papawayen ko ed Juda imay manawir ed saray palandey ko;+Tan kayarianen itan na saray pinilik,Tan manayam ditan iray lingkor ko.+
10 Say Saron+ et magmaliw a panagpastolan na saray karneroTan say Lawak* na Acor+ et magmaliw a panagpainawaan na saray baka,Parad saray totook a manaanap ed siak.
11 Balet sakey kayo ed saray mangibebeneg ed si Jehova,+Saray mangililingwan ed masanton palandey ko,+Saray mangipaparaan na lamisaan parad dios na Suerte,Tan saray papanoen da na tinimplaan ya alak iray kopa parad dios na Kapalaran.
12 Kanian iyawat ta kayod espada,+Tan ondakmomo kayon amin sano pateyen da kayo,+Ta tinmawag ak, balet agkayo inmebat,Nansalita ak, balet agkayo dinmengel;+Nantultuloy kayon nanggaway mauges ed pakanengneng ko,Tan pinili yo no antoy agko panliketan.”+
13 Kanian oniay inkuan na Soberanon Katawan a Jehova:
“Mangan iray lingkor ko, balet naerasan kayo.+
Oninum iray lingkor ko,+ balet napaet kayo.
Manliket iray lingkor ko,+ balet nabaingan kayo.+
14 Oneyag ed liket iray lingkor ko lapud maabig a kipapasen na puso,Balet onakis kayo lapud inkasakitan na pusoTan manugaog kayo lapud nagogonigon ya espiritu.
15 Mangitilak kayoy sakey a ngaran ya usaren na saray pinilik ed pangisamba,Tan balang sakey ed sikayo et pateyen na Soberanon Katawan a Jehova,Balet tawagen tod sananey a ngaran iray lingkor to;+
16 Pian siopaman ya onkekerew na bendisyon diad dalinEt bendisyonan na Dios na katuaan,*Tan siopaman a mansasamba diad dalinEt mansamba ed panamegley na Dios na katuaan.*+
Ta nalingwanan la iray pakakagonigonan* da nensaman;Niyamot la iratan ed pakanengneng ko.+
17 Ta manggawa ak na balon tawen tan balon dalin;+Tan agla nanonotan iray apalabas a bengatla,Tan agla iratan mansiansia ed puso.+
18 Kanian manggayaga kayo tan manliket kayo ed andi-anggaan lapud saray gawaen ko.
Ta gawaen kon say Jerusalem et sengegay panliketTan saray totoo to et sengegay panggayaga.+
19 Manliket ak ed Jerusalem tan manggayaga ak ed totook;+Anggapo lay narengel ed sikato a tanol na pannangis odino panakis lapud gonigon.”+
20 “Anggapo lay kapangiyanak ed satan a pasen a manbilay labat na pigaran agew,Odino sakey a matatken ya agto nakompleto iray agew to.
Ta siopaman ya ompatey a mantaoy sanlasus et ipasen ya ugaw ni,Tan naayew imay makasalanan, anggaman mantaon la na sanlasus.*
21 Mangipaalagey ira na kaabungan tan manayam ira ditan,+Tan mantanem ira na kaubasan tan kanen day bunga to.+
22 Ag-ira mangipaalagey tan sananey so manayam,Ag-ira mantanem tan sananey so mangan.
Ta say bilay na totook et singa karukey na bilay na sakey a kiew,+Tan sigpot a panliketan na saray pinilik so kimey na saray lima ra.
23 Ag-ira mansagpot ed andi-kakanaan,+Tan ag-ira mangiyanak na ugugaw a managmak na gonigon,Lapud sikara so ilalak* a benendisyonan nen Jehova,+Tan kaiba da ray kapolian da.+
24 Ebatan ko la ra antis iran ontawag;Dengelen ko ra legan a mansasalita ni ra.
25 Saniba lan mangan so lobo tan say kordero,Say leon et mangan lay dayami a singa say baka,+Tan dabok la so kanen na uleg.
Ag-ira mamasakit odino manggaway antokaman a makaderal diad interon masanton palandey ko,”+ so inkuan nen Jehova.
Paimanod leksab
^ Odino posiblin, “saray alolong a panagbantayan.”
^ Odino “marutak.”
^ Odino posiblin, “Ta naalisan ta kay inkasantok.”
^ Literal, “diad pagew da.”
^ Literal, “diad pagew da.”
^ Literal, “bendisyon.”
^ Literal, “bini.”
^ Odino “Abeban Patar.”
^ Odino “katooran.” Literal, “Amen.”
^ Odino “katooran.” Literal, “Amen.”
^ Odino “kairapan.”
^ Odino posiblin, “Tan samay agto nasabi so sanlasus et ipasen a naayew.”
^ Literal, “bini.”
