Job 26:1-14
26 Et inmebat si Job, a kuan to:
2 “Talagan akatulong ka ed sakey ya andiay pakayari!
Talagan inliktar mo so taklay ya andiay biskeg!+
3 Agaylay abig na simbawam ed sakey ya andiay karunongan!+
Talagan mabulbulos mon impaamta so makanan karunongan* mo!
4 Siopay kakatongtongen mo,Tan siopay amakiwas ed sikan mangibaga ed saratan a bengatla?*
5 Saramay inaatey ya andiay pakayari et manggiwgiw;Mas abeba ni ra ingen nen saray dayat tan saramay manaayam ditan.
6 Say Lubok* et lakseb ed arapan na Dios,*+Tan say pasen na kadederal* et anggapoy sakbong to.
7 Ibubuskag toy amianen a tawen* diad liwang,+Ibibitin toy dalin ed anggapo;
8 Babalkoten to ray danum ed saray lurem to,+Kanian say makapal a lurem et ag-ombubutnak anggano ambelat;
9 Sasaniban toy arap na trono to,A sasakbongan to itan na lurem to.+
10 Sikatoy mangigugulis na ketegan* diad tapew na saray danum;+
Sikatoy manggagawa na panganggaan na liwawa tan bilunget.
11 Saray lusek na tawen et manggiwgiw;
Nabibigla ra diad panagbano to.
12 Guguloen toy dayat diad pakayari to,+
Tan diad pakatalos to et dederalen toy baleg ya ayep ed dayat.*+
13 Diad ingas* to et onliliwaway tawen;
Duduyoken na lima to so uleg ya agnaere-erel.*
14 Melag labat irayan kabiangan na saray kimey to;+
Makalkalna labat ya esaes so nadngel nipaakar ed sikato!
Kanian siopay makatalos ed maksil a karol to?”+
Paimanod leksab
^ Odino “sentido kumon.”
^ Literal, “Tan siopay akan-ingas (akan-espiritu) ed samay pinmaway ed sika?”
^ Literal, “to.”
^ Odino “Tan say Abaddon.”
^ Literal, “amianen.”
^ Literal, “malimpek.”
^ Literal, “Rahab.”
^ Odino “dagem.”
^ Odino “ilas-ilas.”
