Numeros 11:1-35
-
Dinmapoy apoy a nanlapud Dios lapud panagreklamo (1-3)
-
Inmakis tan kinmerew na karne iray totoo (4-9)
-
Liknaan nen Moises ya agto pakasarag (10-15)
-
Inikdan nen Jehova na espiritu so 70 mamatatken (16-25)
-
Si Eldad tan Medad; angimon si Josue parad si Moises (26-30)
-
Impangiter ed saray pugo; adusa iray totoo lapud inkaagum (31-35)
11 Natan et manrereklamon maong iray totoo ed arapan nen Jehova. Sanen nadngel itan nen Jehova, sikatoy sinmanok, tan linmiob ed sikara so apoy a nanlapud si Jehova tan apoolan so arum a walad sampot na kampo.
2 Sanen inmakis iray totoo ed si Moises, sikatoy akikasi ed si Jehova,+ insan narep so apoy.
3 Kanian satan a pasen et ningaran a Tabera,* ta dinmalang ed sikara so apoy a nanlapud si Jehova.+
4 Insan impatnag na ulop na nanduruman totoo*+ so sinisiblet a pilalek,+ tan pati saray Israelita et inmakis lamet tan inkuan da: “Siopay mangiter ed sikami na karne a kanen mi?+
5 Sankanonot mi ray sira ed Ehipto a kakanen min anggapoy bayar, pati saray pipino, pakwan, sibuyas, tan bawang!+
6 Balet natan et makapkapuy kami la.* Anggapo lay arum a nanenengneng mi noag sayan mana.”+
7 Say mana+ et singa bukel na kulantro,+ tan kaparpara na bedelio.*
8 Mantatayak iray totoo tan dodokdoken da itan tan gigilingen da odino babayoen da. Insan ilalambong da itan ed saray banga odino gagawaen dan malimpek iran tinapay,+ tan say taway to et singa masamit a bibingka a nilarakan.
9 Sano onleksab so linaew ed kampo no labi, ompelag met ditan so mana.+
10 Nadngel nen Moises so panak-akis na totoo, kada pamilya, kada too ed puerta na tolda to. Tan sinmanok a maong si Jehova,+ tan agmet aliketan si Moises.
11 Insan inkuan nen Moises ed si Jehova: “Akin et pinairap moy aripen mo? Akin et agko agamoran so panangabobon mo, ya impasakbat mod siak so awit na sarayan amin a totoo?+
12 Siak ta so angilukon ed sarayan amin a totoo? Siak ta so angiyanak ed sikara, kanian ibagam ed siak ya, ‘Ebam ira, a singa pangeeba na sakey a lingkor* ed mansususon ugaw,’ ya iyakar ira ed dalin ya insipan mon iter ed saray inmuunan atateng da?+
13 Iner so pangalaan koy karne ya iter ed sarayan amin a totoo? Ta naynay iran onaakis ed arapan ko, ya ibabaga ran, ‘Ikdan mo kami na karne a kanen mi!’
14 Agko nayarian ya awiten a bukor irayan amin a totoo; ambelat iyan maong ed siak.+
15 No onia so pideneng mod siak, ipangasim a patey mo ak la.+ No agamoran koy panangabobon mo, agmo la ipapanengneng ed siak so antokaman a kadederal.”
16 Inmebat si Jehova ed si Moises: “Mamili kay 70 lalaki ed saray mamatatken ed Israel, a bibidbiren mon* mamatatken tan opisyal na saray totoo,+ tan iyakar mo rad tolda a pantitiponan, tan paalagey mo ra ditan a kaibam.
17 Onleksab ak+ tan mitongtong ak ed sika ditan,+ tan alaen ko so arum ya espiritun+ walad sika tan iyan kod sikara, tan tulongan da kan manakbat ed awit na sarayan totoo pian agmo bukbukor so manakbat ed satan.+
18 Ibagam ed saray totoo, ‘Pasantos yoy inkasikayo parad nabuas,+ ta seguradon mangan kayoy karne, lapud inmakis kayod si Jehova+ tan inkuan yon: “Siopay mangiter ed sikami na karne a kanen mi? Mas maong ni kipapasen mid Ehipto.”+ Ikdan kayo nen Jehova na karne, tan mangan kayo.+
19 Mangan kayo, aliwa labat lan sanagew odino 2 agew odino 5 agew odino 10 agew odino 20 agew,
20 noagta diad loob na sakey bulan, anggad ompaway la itan ed saray abot na eleng yo tan magmaliw lan makapadimla itan ed sikayo,+ ta impulisay yoy Jehova, a walad pegley yo, tan inmakis kayod sikato, ya inkuan yon: “Akin et pinmaway kami ni ed Ehipto?”’”+
21 Insan inkuan nen Moises: “Say totoon kalimog ko et manbilang na 600,000 lalakin+ manaakar, balet ta imbagam ya, ‘Ikdan ko ray karne, tan mangan ira na magenap ed loob na sakey bulan’!
22 No pakgeran so amin a karnero tan baka, magenap kasi itan ed sikara? Odino no naerel so amin a sira ed dayat, magenap kasi itan ed sikara?
23 Insan inkuan nen Jehova ed si Moises: “Antiktikey ta so lima nen Jehova?+ Natan et nanengneng mo no kasin nagawa ed sika odino andi so imbagak.”
24 Kanian pinmaway si Moises tan imbaga tod saray totoo iray imbaga nen Jehova. Tan sikatoy amili na 70 lalaki manlapud saray mamatatken ed saray totoo tan pinaalagey to rad liber na tolda.+
25 Insan linmeksab si Jehova ed panamegley na sakey a lurem+ tan akitongtong ed sikato+ tan inala toy arum ya espiritun+ walad sikato tan inyan tod kada sakey ed 70 mamatatken. Tan sanen dinmapo ed sikara so espiritu, kinmiwas iran singa propeta,*+ balet agda la itan naulit.
26 Walay duaran lalaki a nansiansia ed kampo. Say kangaranan da et Eldad tan Medad. Tan dinmapo ed sikara so espiritu, ta kabiangan ira ed saramay nisulat so kangaranan da, balet ag-ira linmad tolda. Kanian kinmiwas iran singa propeta diad kampo.
27 Tan sakey a kalangweran a laki so binmatik tan imbaga tod si Moises: “Onkikiwas a singa propeta si Eldad tan Medad diad kampo!”
28 Diad saman et inmebat si Josue+ ya anak nen Nun, say lingkor nen Moises manlapu lad inkaugaw to, ya inkuan to: “Katawan kon Moises, patundam ira!”+
29 Balet inkuan nen Moises ed sikato: “Mangiimon ka ta parad siak? Aleg, labay ko ingen ya amin a totoo nen Jehova et magmaliw a propeta, tan iyan nen Jehova so espiritu tod sikara!”
30 Agnambayag et pinmawil si Moises ed kampo a kaiba iray mamatatken na Israel.
31 Insan sinmiplog so dagem a nanlapud si Jehova tan intikyab na satan iray pugo manlapud dayat tan nitaytayak iratan ed kampo+ a say alaknaban da et ngalngali sanagew a biahien ed sakey a pagpag tan ngalngali sanagew a biahien ed sananey a pagpag, diad interon kampo, tan ngalngali duaran kasiko* so kakapal na saratan diad dalin.
32 Kanian sanagew tan sanlabin agnaugip iray totoo tan diad tinmumbok lamet a sanagew pian mantipon na pugo. Anggapoy akala na mas daiset nen say samploran homer,* tan impapaagew da iratan ed interon kampo.
33 Balet legan a wala nid sangi ra so karne, antis dan nagatgat itan, dinmalang so sanok nen Jehova ed saray totoo, tan dakdakel ed sikara so pinatey nen Jehova.+
34 Kanian satan a pasen et inngaran day Kibrot-hataava,*+ ta ditan da imponpon iray totoo ya angipatnag na sinisiblet a pilalek.+
35 Manlapud Kibrot-hataava et binmuat iray totoo a paarap ed Hazerot, tan nansiansia ra ed Hazerot.+
Paimanod leksab
^ Kabaliksan toy “Napopoolan,” salanti, sakey a pool; dalang.
^ Mapatnag a manutukoy ed saray aliwan Israelita a walad limog da.
^ Odino “lay kamarerwa mi.”
^ Say bedelio et ambalingit a yaket a nanlapud pigaran kiew.
^ Odino “lakin managkomis.”
^ Odino “ya amtam a; a kabkabat mon.”
^ Odino “nampropesiya ra.”
^ Say sakey a kasiko et 44.5 sentimetro (17.5 pulgada). Nengnengen so Apendise B14.
^ Say sakey a homer et 220 litro. Nengnengen so Apendise B14.
^ Kabaliksan toy “Saray Ponponan ed Pampilalek.”
