Proverbio 22:1-29
22 Say maabig a ngaran* et nepeg a pilien nen say dakel a kayamanan;+Say pakagamor na respeto* et mas maong ni nen say pilak tan balitok.
2 Saya so pamparehoan na* mayaman tan mairap-bilay:
Si Jehova so nanggawad sikara.+
3 Say marunong et ompapaliis no nanenengneng toy peligro,Balet say andiay kakabatan et ondidiretso tan aanien to ray pansumpalan.*
4 Say resulta na inkamapaabeba tan say takot ed si JehovaEt kayamanan tan kagalangan tan bilay.+
5 Saray sabit tan patit et walad basbas na managpalikdo,Balet siopaman a papablien toy bilay* to et onaarawid saratan.+
6 Ipasal moy ugaw* ed dalan a nepeg ton laen;+Anggan sano ontatken la et ag-onsian ditan.+
7 Say mayaman so manuuley ed mairap-bilay,Tan say akautang et aripen na samay amautang.+
8 Siopaman a mantatanem na ag-inkatunong et manani na desyang,+Tan say lewet na sanok to et naandi.+
9 Say mabunlok a too* et nabendisyonan,Ta say kakanen to et inanabang tod mairap-bilay.+
10 Pataynan mo so mabalaw,Et naandi so kolkolan;Ontunda iray sangsangan* tan panag-insulto.
11 Samay mangaaro ed malinis a puso tan samay maabig so panagsalita toEt magmaliw a kaaro na ari.+
12 Saray mata nen Jehova so manbabantay ed kakabatan,Balet dederalen To ray salita na managpalikdo.+
13 Ibabaga na mangiras: “Walay leon ed paway!
Pateyen to ak ed pegley na plaza!”+
14 Say sangi na mabanday* a bibii et aralem ya abot.+
Samay kokondenaen nen Jehova et napelag ditan.
15 Say inkamakulangkulang et nisinger ed puso na ugaw,*+Balet say lewet na disiplina so makapangekal ed satan ed sikato.+
16 Samay manasaol ed mairap-bilay pian naarumay kayamanan to+Tan samay mangiiter na saray regalo ed mayamanEt mansumpal ed kairapan.
17 Ikiling moy layag mo tan dengel mo ray salita na marunong,+Pian nipapusom so kakabatan ko,+
18 Ta maabig no pansiansiaen mo iratan ed loob mo,+Pian amin iratan et naynay a walad bibil mo.+
19 Pian si Jehova so panmatalkan mo,Ikdan ta ka natan na kakabatan.
20 Agta dakdakel lay insulat kod sika,Ya angiter ak na simbawa tan kakabatan,
21 Pian nabangatan ka na tua tan napanmatalkan iran salita,Diad ontan et makapawil ka a sustoy ibagam ed samay angibaki ed sika?
22 Agmo tatakewan so mairap-bilay lapud sikatoy mairap-bilay,+Tan agmo lalamesen imay pakaskasi diad puerta na syudad,+
23 Ta si Jehova a mismo so mangidepensa ed kaso ra+Tan pateyen to iramay manasaol ed sikara.
24 Agka miuulop ed samay mipepetang so ulo toTan agka mimilmila ed toon misasanok,
25 Pian agmon balot naalig so kagagawa toTan napatitan ka.*+
26 Agka magmamaliw a sakey ed saramay mipapasamano pian mangisipan,A mangiiter na garantiya parad utang na arum.+
27 No anggapoy ibayar mo,Alaen so mismon katri a dudukolan mo!
28 Agmo iyaalis so abaybayag lan muhon*Ya inyan na saray inmuunan atateng mo.+
29 Wala ta lay anengneng mon marundunong a mankimey?Sikatoy onalagey diad arap na arari;+Sikatoy ag-onalagey diad arap na ordinaryon totoo.
Paimanod leksab
^ Literal, “Say pabor.”
^ Odino “Say maabig a reputasyon.” Literal, “Say ngaran.”
^ Literal, “Manbana so.”
^ Odino “dusa.”
^ Odino “kamarerwa.”
^ Odino “kalangweran.”
^ Literal, “Samay maong so mata to.”
^ Odino “pandedemandaan.”
^ Odino “kalangweran.”
^ Odino “so kamarerwam.”
^ Odino “tanda na ketegan.”
