Ed Saray Taga Roma 2:1-29
2 Kanian anggapoy nibaraan mo, O too, anggan siopa ka,+ no manguukom ka; ta sano manguukom ka ed arum, kokondenaen moy sarilim, lapud sikan mismo a manguukom et gagawaen mo met iratan.+
2 Natan, amta tayo a say panangukom na Dios, ya unong ed katuaan, et sumpad saramay manggagawad ontan iran bengatla.
3 Balet kasin iisipen mo, O too, a legan mon uukomen iramay manggagawad ontan iran bengatla anta gagawaen mo met iratan et napaliisan moy panangukom na Dios?
4 Odino kasin leleglemewen mo so ontan lan kaabigan+ tan panagtepel+ tan panag-anos+ na Dios, lapud agmo amta a diad kaabigan to et labay to kan pakiwasen a magbabawi?+
5 Balet lapud inkabenger mo tan agmagbabawin pusom, mantitipon ka na sanok na Dios parad sarilim. Ipanengneng to yan sanok diad agew na matunong a panangukom to.+
6 Tan ibales tod kada sakey so unong ed gagawaen to:+
7 bilay ya andi-anggaan ed saramay manaanap na gloria tan galang tan agpakaderal+ diad pantutultuloy dan manggawa na maong;
8 balet diad saramay makolkol tan agmanguunor ed katuaan ingen ta manguunor ed ag-inkatunong, ipatnag tod sikara so sanok tan pasnok to.+
9 Onsabi kairapan tan gonigon ed balang too* a manggagawa na makapasakit, unona saray Judio insan saray Griego;
10 balet say gloria tan galang tan kareenan et parad balang sakey a manggagaway maong, unona et saray Judio+ insan saray Griego.+
11 Ta say Dios et anggapoy lalabien to.+
12 Ta amin iramay nankasalanan ya andian na ganggan et ompatey anggano andian ira na ganggan;+ balet amin iramay nankasalanan a sakop na ganggan et ukomen unong ed ganggan.+
13 Ta saray ondedengel ed ganggan et aliwan sikaray matunong ed arap na Dios, noagta saray manusumpal ed ganggan so niyabawag a matunong.+
14 Ta sano saray totoo na saray nasyon ya andian na ganggan+ et sipor a manggagawa na saray bengatlan walad ganggan, diad sikara et walaan ira na ganggan, anggano andian ira na ganggan.
15 Sikaran mismo so mangipapatnag a nisulat ed kapusoan da so nipaakar ed ganggan, legan a say konsiensia ra so mantatasi a kaiba ra, tan diad* kanonotan da et balanglan sikaray nankasalanan odino agnankasalanan.
16 Nagawa iya diad agew a say Dios, diad panamegley nen Kristo Jesus, et mangukom ed saray sekreton gagawaen na katooan,+ unong ed maong a balita ya iyaabawag ko.
17 Natan, no tatawagen kan sakey a Judio+ tan manmamatalek ka ed ganggan tan ipapasirayew moy Dios,
18 tan amtam so linawa to tan aabobonan mo ray bengatlan alay abig lapud imbangat ka ed Ganggan,+
19 tan manisia ka a sakey kan manangiwanwan na bulag, sakey a liwawa ed saramay walad kabilungetan,
20 manangipetek ed saray agmakatunongan, managbangat ed ugugaw, tan makatalos ed saray manunan kabiangan na kakabatan tan katuaan a walad Ganggan—
21 balet, kasin sika a mangibabangat ed arum et agmo ibabangat so sarilim?+ Sika a mangipupulong na “Agka mantatakew,”+ kasin mantatakew ka?
22 Sika a mangibabagan, “Agka mikakalugoran,”+ kasin mikakalugoran ka? Sika a mamubusol ed saray idolo, kasin tatakewan mo ray templo?
23 Sika a mangipapasirayew ed ganggan, kasin papabandayen moy Dios diad panusumlang mo ed Ganggan?
24 Ta “say ngaran na Dios et papaugesen ed limog na saray nasyon lapud sikayo,” unong a nisulat.+
25 Diad tua, say panagsegat+ et makagunggona labat no uunoren moy ganggan;+ balet no susumlangen moy ganggan, magmaliw kan singa ag-asegat anggano asegat ka.
26 Sirin, no saray matunong a kakaukolanen na Ganggan et uunoren na toon ag-asegat,+ agta sikatoy ipasen ya asegat anggano ag-asegat?+
27 Tan say toon ag-asegat ed laman, a manusumpal ed Ganggan, so mangukom ed sika a manusumlang ed ganggan anggano walaan kay nisulat a totontonen tan asegat ka.
28 Ta say pagmaliw a peteg a Judio et aliwan unong ed itsura,+ tan sikatoy asegat aliwan diad laman.+
29 Imbes, say pagmaliw a peteg a Judio et unong ed no antoy walad loob to,+ tan say asegat et say puso to+ diad panamegley na espiritu, tan aliwan diad panamegley na nisulat a totontonen.+ Say dayew to et agmanlalapud totoo, noagta manlalapud Dios.+
Paimanod leksab
^ Literal, “diad baetan na.”
