1. Akin et labay na Etiopen opisyal na palasyo so manpabautismo?

“WALA diay danum; antoy makasbel ed pakabautismoan ko?” Intepet itan na sakey ya Etiopen opisyal na palasyo nensaman. Impaliwawa ed sikato na sakey a Kristianon  man-ngaray Felipe ya si Jesus so impromisan Mesias. Asabi puso na sayan Etiope lapud naaralan tod Kasulatan, kanian kinmiwas. Labay toy manpabautismo!​—Gawa 8:26-36.

2. Akin et nepeg mon seryoson isipen so nipaakar ed bautismo?

² Dakel lay naaralan mon katuaan ed saray akaunan kapitulo na sayan libro diad tulong na sakey a Tasi nen Jehova, kanian ompan nitepet mo, ‘Antoy makasbel ed siak ya manpabautismo?’ Naaralan mo lay impromisa na Biblia nipaakar ed tuloytuloy ya bilay diad Paraiso. (Lucas 23:43; Apocalipsis 21:3, 4) Naaralan mo met la no antoy tua nipaakar ed saray inaatey tan say ilalo ya kioli. (Eclesiastes 9:5; Juan 5:28, 29) Nayarin miuulop ka met lad Saray Tasi nen Jehova diad saray aral dad kongregasyon tan anengneng mo la no panon dan tutumboken so tuan relihyon. (Juan 13:35) Nagkalalo la, seguradon inmelet lay relasyon mod si Jehova a Dios.

3. (a) Antoy ingganggan nen Jesus ed saray patumbok to? (b) Panon a gagawaen so bautismo ed danum?

³ Panon mon nipanengneng ya labay mon panlingkoran so Dios? Imbaga nen Jesus ed saray patumbok to: “Onla kayo . . . tan ibangat yo iray totoo ed amin a nasyon pian magmaliw iran disipulok, a bautismoan yo ra.” (Mateo 28:19) Impanengneng a mismo nen Jesus no panon so pampabautismo ed danum. Sikatoy agwinalsikan na danum, tan aglabat kinalboan na danum so ulo to. (Mateo 3:16) Say salitan “bautismo” et nanlapud Griegon salita ya say labay ton ibaga et “ipalseb ed danum.” Kanian say bautismo na Kristiano et sigpot ya pangipalseb ed danum.

4. Antoy ipapanengneng na pampabautismo ed danum?

⁴ Kaukolan ya bautismoan ed danum so amin ya labay day nawalaan na relasyon ed si Jehova a Dios. Say bautismo diad publiko so pakanengnengan ya labalabay moy manlingkor ed Dios. Ipapanengneng na satan ya panliketan mon gawaen so panlabayan nen Jehova. (Salmo 40:7, 8) Balet, pian magmaliw kan kualipikado parad bautismo, wala ray nepeg mon gawaen.

5. (a) Antoy unonan kaukolan ya gawaen pian magmaliw ya kualipikado parad bautismo? (b) Akin et importante iray pantitipon ed kongregasyon?

⁵ Agapoan mo la may unonan kaukolan ya gawaen. Panon? Panamegley na sistematikon panaaral moy Biblia et kakabaten mo lay Jehova a Dios tan si Jesu-Kristo. (Basaen so Juan 17:3.) Balet dakel ni kaukolan mon aralen. Saray Kristiano et labay dan ‘napano ira na suston kakabatan nipaakar ed linawa na Dios.’ (Colosas 1:9) Diad saya et makatulong a maong iray pantitipon ed kongregasyon na Saray Tasi nen Jehova. Importantin atendian iratan. (Hebreo 10:24, 25) Makatulong so regular ya pipiaral mo pian mas nakabat moy Dios.

6. Kasin kaukolan ya antam so amin ya ibabaga na Biblia pian onkualipika kad bautismo? Ipaliwawa.

⁶ Siempre, agmo kaukolan ya amtaen nin amin so ibabaga na Biblia pian magmaliw kan kualipikado ed bautismo. Samay Etiopen opisyal na palasyo et wala met lay amta to, balet kaukolan to ni tulong pian natalosan toy arum nin parte na Kasulatan. (Gawa 8:30, 31) Mipadpara, dakel ni kaukolan mon aralen. Diad tua, tuloytuloy so panaaral tayo nipaakar ed Dios. (Eclesiastes 3:11) Antis kan nabautismoan balet, kaukolan mon amtaen tan awaten iray manunan bangat na Biblia. (Hebreo 5:12) Kaibad saratan ya bangat no antoy tua nipaakar ed inaatey tan no akin ya importantin naamtaan tan awaten so ngaran na Dios tan say Panarian to.

7. Antoy nepeg ya epekto ed sika na panaaral moy Biblia?

⁷ Balet, aliwa labat lan basta kakabatan so kaukolan ta “no anggapoy pananisia et imposiblin napaliket so Dios.” (Hebreo 11:6) Ibabaga ed sikatayo na Biblia ya nen nadngel na saray totoo ed syudad na Corinto nensaman so mensahen impulong na saray Kristiano, “anisia tan abautismoan” ira. (Gawa 18:8) Mipadpara, kaukolan ya say panaaral mod Biblia et  ontulong ed sikan manisia ya impuyan itan ya Salita na Dios. Nepeg ya ontulong ed sika so panaaral mod Biblia pian nawalaan kay pananisia ed saray promisa na Dios tan ed pakayari na bagat nen Jesus ya mangisalba ed sika.​—Josue 23:14; Gawa 4:12; 2 Timoteo 3:16, 17.

8. Antoy mamakiwas ed sikan ibagad arum so nanaaralan mo?

⁸ Legan ya ombibiskeg so pananisiam, seguradon agmo napokpokay sarilim ya ibagad arum so nanaaralan mo. (Jeremias 20:9) Napakiwas kan ipaamtad arum so nipaakar ed Dios tan ed saray gagala to.​—Basaen so 2 Corinto 4:13.

9, 10. (a) Siopa ray nayarin pangibagaan mo na katuaan ya walad Biblia? (b) Antoy gawaen mo no labay mo lay milan manpulong kaiba iray Tasi nen Jehova?

⁹ Nayarin ibagam so katuaan ya walad Biblia diad mataktikan paraan ed kapamilyam, kakaarom, katrabahom, tan kakaabay mo. Onsabi panaon, seguradon labay mo met lay milan manpulong kaiba iray Tasi nen Jehova. No labay mo la, ibagam labat itan ed Tasi ya mangiyaaral ed sika na Biblia. No kualipikado ka lan manpulong, walay duaran mamatatken odino elder ed kongregasyon ya mitongtong ed sika tan say mangiyaaral ed sika.

¹⁰ Ontulong itan pian mas nakabat moy arum ya Kristianon elder, ya mamapastol ed pulok na Dios. (Gawa 20:28; 1 Pedro 5:2, 3) No nanengneng na sarayan elder ya natatalosan tan papanisiaan mo ray manunan bangat na Biblia, iyaaplikam ed bilay mo iray prinsipyo na Dios, tan talagan labay mo lay magmaliw ya Tasi nen Jehova, ipaamta rad sika ya kualipikado ka lan milan mangipulong ed maong a balita bilang agbautismadon manangipalapag.

11. Anto ray kaukolan nin umanen na sakey pian onkualipika ya manpulong?

¹¹ Balet panon to no agka ni kualipikadon manpulong? Ompan wala ni ray kaukolan mon umanen ed kabibilay  mo tan ugalim. Nayarin kaibad satan so pangitundad saray isesekretom ya gagawaen. Kanian, no labay mo lay magmaliw ya agbautismadon manangipalapag, kaukolan ya agka la manggagawa na saray seryoson kasalanan, a singa say seksual ya imoralidad, panagbuanges, tan panagdruga.​—Basaen so 1 Corinto 6:9, 10; Galacia 5:19-21.

12. Akin et kaukolan so pagbabawi?

¹² Nia ni arum ya kaukolan mon gawaen pian onkualipika ed bautismo. Imbaga nen apostol Pedro: “Magbabawi kayo . . . tan manguman kayo pian naperdona iray kasalanan yo.” (Gawa 3:19) Say pagbabawi et panermen tan pamidbir ed saray aliwan ginawam. Say pagbabawi et kaukolan ya gawaen na toon datin imoral so kabibilay to, balet kaukolan met itan ya gawaen na anggan say toon aliwan imoral so kabibilay to. Akin ey? Ta amin a totoo et mankakasalanan tan kaukolan day panamerdona na Dios. (Roma 3:23; 5:12) Nen agka ni manaaral na Biblia, agmo ni amta no antoy panlabayan na Dios. Kanian agmo ni nagagawaan so panlabayan to. Kaukolan sirin so pagbabawi.

13. Anto so pakakomberte?

¹³ Aliwa labat ya pagbabawi so nepeg mon gawaen, kaukolan so pakakomberte, odino ‘panguman.’ Kanian kaukolan ya itundam lay datin kabibilay mo tan manlapu lad natan, pansagpotan mon gawaey duga. Say pagbabawi tan pakakomberte et kaukolan antis kan nabautismoan.

14. Antoy sakey nin importantin gawaen mo antis kan nabautismoan?

¹⁴ Say sakey nin importantin gawaen mo antis kan nabautismoan et nepeg mon idedika so sarilim ed si Jehova a Dios.

15, 16. Antoy labay ya ibaga na idedikam so sarilim ed Dios, tan akin et gawaen mo itan?

 ¹⁵ No idedikam so sarilim ed si Jehova a Dios panamegley na impapuson pikakasi, isisipan mod sikato ya sikato labat so dayewen mo ya anggad angga. (Deuteronomio 6:15) Balet, akin et gawaen mo itan? Isip mo pay sakey a balolaki ya onkakaraw ed sakey a marikit. No nakabat ton maong may marikit tan nanengneng to ray maong ya ugali to, lalo ton naaro. Onsabi panaon, natural labat ya ibaga na balolaki ya labay ton pakasalan so marikit. Tua, say pangasawa et kaaruman ya responsabilidad. Balet lapud panangaro to, gawaen to itan ya importantin desisyon.

¹⁶ No nakabat tan naarom si Jehova, napakiwas kan manlingkor ed sikato ya agnapipilitan. Tan siopaman a malabay ya ontumbok ed Anak na Dios, si Jesu-Kristo, et kaukolan ya “iburi toy sarili to.” (Marcos 8:34) Labay ton ibaga, agtayo iyuunay sarili tayon panlabayan tan plano pian anggapoy makaabala ed interon puson pangunor tayo ed Dios. Antis kan nabautismoan sirin, nepeg ya say panggawad panlabayan nen Jehova a Dios so magmaliw ya manuna ed bilay mo.​—Basaen so 1 Pedro 4:2.

17. Akin et wala ray agda ni labay ya idedika so sarili da ed Dios?

¹⁷ Wala ray arum ya agda ni labay ya idedika so sarili da ed si Jehova ta singa natatakot iran gawaen itan ya seryoson desisyon. Nayarin tatakotan day responsabilidad ed Dios bilang Kristiano ya dedikado ed sikato. Lapud natatakot ira ya ompan nalingo ra tan napaermen day Jehova, iisipen dan mas maong lan agda idedika so sarili da.

18. Antoy mamakiwas ed sika ya idedikay sarilim ed si Jehova?

¹⁸ Legan mon nanaaralan ya aroen si Jehova, napakiwas kan idedikay sarilim ed sikato tan gawaen so anggaay nayarian mon tooren itan. (Eclesiastes 5:4) Kayarim ya indedika so  sarilim, seguradon labay mo lay ‘manbilay a manepeg ed si Jehova pian sikatoy napaliket mon maong.’ (Colosas 1:10) Lapud inarom so Dios, agmo isipen ya mairap a gawaen so panlabayan to. Seguradon manisia kad insulat nen apostol Juan: “Saya so kabaliksan na panangaro ed Dios, ya unoren tayo ray ganggan to; tan saray ganggan to et aliwan makapabelat.”​—1 Juan 5:3.

19. Akin et agmo kaukolan ya takotan so dedikasyon mod Dios?

¹⁹ Anggano aliwa kan perpekto, sarag mon idedikay sarilim ed si Jehova a Dios. Amta to ray limitasyon mo tan agton balot ilaloan ya gawaen moy agmo nayarian. (Salmo 103:14) Labay ton natoor moy dedikasyon mod sikato,  tan suportaan tan tulongan to ka. (Basaen so Isaias 41:10.) Segurado ya no mantiwala ka ed si Jehova diad interon pusom, “gawaen ton maptek iray basbas mo.”​—Proverbio 3:5, 6.

20. Akin et kaukolan ya naamtaan na publiko ya indedikam lay sarilim ed si Jehova?

²⁰ No isipen mo irayan inaral tayo natan, natulongan kan idedika so sarilim ed si Jehova panamegley na pikakasi. Amin  iramay talagan mangaaro ed Dios et nepeg dan ‘iyabawag itan ed publiko pian niliktar’ ira. (Roma 10:10) Panon?

21, 22. Panon mon ‘niyabawag ed publiko’ so pananisiam?

²¹ Ipaamtam ed coordinator na ulop na mamatatken ed kongregasyon yo ya labay mo lay manpabautismo. Insan to iyeskedyul iray pigaran mamatatken ya mangirepaso ed sika na pigaran tepet nipaakar ed manuna iran bangat na Biblia. No nandesisyon irayan mamatatken ya kualipikado ka la, ibaga rad sika ya sarag mo lay manpabautismo diad onsublay ya asemblea odino kombension. * Ditan et walay paliwawa nipaakar ed bautismo. Insan kerewen na espiker ed amin ya kandidato ed bautismo ya ebatan day duaran simplin tepet. Sakey iyan paraan pian ‘niyabawag dad publiko’ so pananisia ra.

²² Diad mismon pampabautismom et ipapaamtam ed publiko ya indedikam lay sarilim ed Dios tan sakey ka lan Tasi nen Jehova. Saray manpabautismo et sigpot ya ipalseb ed danum pian ipanengneng dad publiko ya indedika day sarili da ed si Jehova.

23. Antoy labay ya ibaga na pampabautismo ed “ngaran na Ama tan ed ngaran na Anak tan ed ngaran na masanton espiritu”?

²³ Imbaga nen Jesus ya saray disipulo to et bautismoan ed “ngaran na Ama tan ed ngaran na Anak tan ed ngaran na masanton espiritu.” (Mateo 28:19) Labay ton ibaga et bibidbiren na manpabautismo so autoridad nen Jehova a Dios tan si Jesu-Kristo. (Salmo 83:18; Mateo 28:18) Bibidbiren to met so betang tan gagawaen na masanton espiritu odino aktibon puersa na Dios.​—Galacia 5:22, 23; 2 Pedro 1:21.

24, 25. (a) Antoy isisimbolo na bautismo? (b) Anton tepet so kaukolan ya ebatan?

²⁴ Balet, say bautismo et aliwa labat ya basta pangipalseb ed  danum. Walay importantin isisimbolo na satan. Say pangipalseb ed danum et isisimbolo ton inatey ka lad datin kabibilay mo. Say iyimwas mod danum et mangipapanengneng ya mabilay ka la natan pian gawaen so panlabayan na Dios. Tandaan met ya si Jehova a Dios mismo so angidedikaan moy bilay mo, aliwan diad sakey a kimey, arum a totoo, odino sakey ya organisasyon. Say dedikasyon tan bautismom so gapoan na pikakaarom odino malet ya relasyon mod Dios.​—Salmo 25:14.

²⁵ Say bautismo et aliwan garantiya na kilalaban odino kililiktar. Insulat nen apostol Pablo: “Itultuloy yon pansagpotan so pakaliktar yo tekep na takot tan giwgiw.” (Filipos 2:12) Say bautismo et gapoan ni labat. Say tepet et, Panon kan mansiansia ed panangaro na Dios? Naebatan itan ed sampot ya kapitulo.