Inmalis si Jesus ed Jerusalem diad ngarem na Lunes, tan pinmawil ed Betania diad bandad bukig na Palandey na Saray Olibo. Nayarin nansanlabi ed abung na kakaaro ton si Lazaro, Maria, tan Marta.

Natan et kabuasan la na Nisan 11. Manaakar lamet si Jesus tan saray disipulo to papawil ed Jerusalem tan sampot la itan ya iyakar tod templo. Sampot met lan pampulong tod publiko antis ton selebraan so Paskua, igapoy Memoryal na ipatey to, insan la bistaen tan pateyen.

Manlapud Betania, nen manaakar irad Palandey na Saray Olibo paarap ed Jerusalem, naimano nen Pedro imay kiew ya insamba nen Jesus. “Rabbi, nengneng mo!” so kuan to, “amagaan imay kiew ya igos ya insambam.”​—Marcos 11:21.

Akin balet et pinalenes nen Jesus so kiew? Impaamta toy rason diad sayan inyebat to: “Ibagak ed sikayoy tua, no walay pananisia yo tan agkayo manduaruwa, aliwa labat a say ginawak ed sayan kiew ya igos so nagawaan yo, noagta no ibaga yod sayan palandey, ‘Ekal ka dia tan pelag kad dayat,’ nagawa itan. Tan amin a kerewen yo ed pikakasi et naawat yo no walay pananisia yo.” (Mateo 21:21, 22) Inulit to imay punto ya dati to lan imbaga nipaakar ed pananisian sarag ton iyalis so palandey.​—Mateo 17:20.

Kanian diad samay ginawa tod kiew, angusar si Jesus na alimbawa pian ibangat ya kaukolan so pananisia ed Dios. Inkuan to: “Amin a bengatlan ipipikasi tan kekerewen yo, manisia kayo a singano inawat yo la, tan nagamoran yo iratan.” (Marcos 11:24) Talagan importante itan a leksion parad amin ya papatumbok nen Jesus! Kakkaukolan itan na saray apostol ed saray subok ya magano da lan arapen. Balet wala ni arum ya pikonektaan na inkalenes na kiew ya igos ed say pananisia.

Singa sayan kiew ya igos, makapeke met so itsura na bansan Israel. Saray totoo ed sayan bansa et akisipan ya nawalaay espisyal ya relasyon ed Dios. Balet ta bilang bansa et impanengneng dan anggapoy pananisia da tan ag-ira mamapawalay maong a bunga. Agda ni ingen inawat so mismon Anak na Dios! Kanian nen pinalenes nen Jesus so agmanbubungan kiew ya igos, impanengneng toy nagawa ed sayan agmanbubunga tan anggapoy pananisian bansa.

Kayari na satan, linmoob si Jesus tan saray disipulo to ed Jerusalem. Singa ed apasalan to, linmad templo tan nambangat. Nayarin say sankanonot na saray manunan saserdote tan mamatatken et samay ginawa nen Jesus ed saray managsalat na kuarta, kanian tinepetan da: “Antoy autoridad mon manggawa ed sarayan bengatla? Odino siopay angiter ed sika na sayan autoridad pian gawaen mo iraya?”​—Marcos 11:28.

Inmebat si Jesus: “Walay tepeten kod sikayo. No ebatan yo ak, ibagak met ed sikayo no antoy autoridad kon manggawa ed sarayan bengatla. Kasin say autoridad nen Juan a manbautismo et nanlapud tawen odino nanlapud totoo? Ebatan yo ak.” Kanian saramay mamubusol ed sikato natan so atepetan. Nantotongtong iray saserdote tan mamatatken no antoy iyebat da: “No ibaga tayon, ‘Nanlapud tawen,’ ibaga ton, ‘Akin balet et agkayo anisia ed sikato?’ Balet sarag tayo kasin ibagan, ‘Nanlapud totoo’?” Ontan so imbaga da lapud natatakot irad totoo, “ta ipapasen na amin a si Juan et peteg a propeta.”​—Marcos 11:29-32.

Agmakanonot iray onkokontrad si Jesus na iyebat dad sikato. Kanian inkuan da: “Agmi amta.” Onia met so inkuan nen Jesus: “Agko met sirin ibaga ed sikayo no antoy autoridad kon manggawa ed saraya.”​—Marcos 11:33.