LEKSION 9
Panon ya Magmaliw a Maliket so Pamilyam?
1. Akin ya importante so pankasal pian magmaliw ya maliket so pamilya?
Say maong a balita et nanlapud si Jehova, say maliket a Dios, tan labay ton magmaliw a maliket iray pamilya. (1 Timoteo 1:11) Sikato so angigapo ed panangasawa. Importante so legal a pankasal pian walay seguridad na ananak. Kaukolan ya unoren na saray Kristiano so ganggan o batas ed lugar da ed pamparehistro na kasal.—Basaen so Lucas 2:1, 4, 5.
Antoy pangipapasen na Dios ed panangasawa? Labay to ya permanente so paniba na laki tan bii. Labay na Dios ya manmatoor o tapat ed sakey tan sakey so sanasawa. (Hebreo 13:4) Kabusol toy pansian o pandiborsyo. (Malaquias 2:16) Pero, papayagan ton midiborsyo tan mangasawa o miasawa lamet so sakey a Kristiano no akikalugoran odino akirelasyon ed arum so asawa to.—Basaen so Mateo 19:3-6, 9.
2. Panon so dugan pantrato na sanasawa ed sakey tan sakey?
Ginawa nen Jehova so laki tan bii pian mantulongan. (Genesis 2:18) Bilang ulo na pamilya, say asawan laki so manunan mananap na pambilay na pamilya to tan manbangat ed sikara tungkol ed Dios. Kaukolan ya masakripisyo tan maaro ed asawa to. Importante met ya manaroan so sanasawa tan respetoen day sakey tan sakey. Lapud aliwan perpekto so amin ya sanasawa, kaukolan dan aralen so mamerdona pian magmaliw iran maliket.—Basaen so Efeso 4:31, 32; 5:22-25, 33; 1 Pedro 3:7.
3. Kasin isian o misian kad asawam no agkayo la maliket?
No walay problema yon sanasawa, gawa yon dua so anggaay nayarian yo pian nipanengneng so aro ed sakey tan sakey. (1 Corinto 13:4, 5) Ag-irerekomenda na Salitay Dios so pansian bilang solusyon ed simpli labat iran problema na sanasawa.—Basaen so 1 Corinto 7:10-13.
4. Ananak, antoy labay na Dios parad sikayo?
Labay nen Jehova ya magmaliw kayon maliket. Iiter toy sankamaongan ya bilin pian na-enjoy yoy bilay yo bilang kabataan. Labay ton makaaral kayo ed karunongan tan eksperiensya na atateng yo. (Colosas 3:20) Labay met nen Jehova ya magmaliw kayon maliket ed panggawa na labay to tan ed labay na Anak to.—Basaen so Eclesiastes 11:9–12:1; Mateo 19:13-15; 21:15, 16.
5. Atateng, antoy gawaen yo pian magmaliw ya maliket iray anak yo?
Kaukolan ya makuli kayo pian niiter yoy naakan, ayaman, tan kawes na ananak yo. (1 Timoteo 5:8) Balet pian magmaliw iran maliket, kaukolan yo met iran ibangat ya aralen tan aroen so Dios. (Efeso 6:4) No nanenengneng da ed mismon alimbawa yo ya inaro yoy Dios, aligen da kayo. No base ed Biblia iray bilin yo, maabig so epekto to ed anak yo.—Basaen so Deuteronomio 6:4-7; Proverbio 22:6.
Pisalamatan yo ira pian nalikna dan walay maong ya nagagawaan da. Kaukolan yo met iran ipetek tan disiplinaen. Makatulong itan pian ag-ira makagawa na panermenan da lanlamang. (Proverbio 22:15) Balet, nepeg ya aliwan sobra odino maruksa so pandisiplina ed sikara.—Basaen so Colosas 3:21.
Wala ray libron in-publish na Saray Tasi nen Jehova ya parad saray atateng tan ananak. Nibase iratan ed Biblia.—Basaen so Salmo 19:7, 11.
Ompan Nagustoan Mo Met
PANON A MAGMALIW YA MALIKET SO PAMILYAM?
Patulongan ed Dios Pian Maliket so Panangasawa Yo
Makatulong so duaran tepet pian ondakep so panangasawa yo.
PANON A MAGMALIW YA MALIKET SO PAMILYAM?
No Panon ya Solusyonan Iray Problema
Makatulong so dugan paraan pian magmaliw ya mareen tan maliket so panangasawa imbes ya magulo tan maermen.
