LEKSION 11
Antoy Gawaen Mo Pian Natulongan Ka na Biblia?
Kasin walay labay mon igapo ya baleg ya proyekto o kimey balet pakaliknam et mair-irap? Pian nainomayan ka, ompan apag-apagen mo imay kimey. Ontan met so balibalin gawaen ed panagbasa na Biblia. Ompan itepet mo balet, ‘Iner ak onggapo ey?’ Diad sayan leksion, pantongtongan ta iray simplin paraan no panon mon na-enjoy so pambasa tan panaral na Biblia.
1. Akin et regular tayon basaen so Biblia?
No regular mon basaen so Biblia, odino “say ganggan nen Jehova,” magmaliw kan maliket tan maong so pansumpalan mo. (Basaen so Salmo 1:1-3.) Pian nigapom, salim so manbasa na pigaran minuto kada agew. No mas ondadakel so antam ed Salita na Dios, mas na-enjoy mon basaen itan.
2. Antoy gawaen mo pian makatulong ed sika so pambabasam na Biblia?
Pian makatulong ed sika so pambabasam na Biblia, tunda kan magano tan isip mo no anto may babasaen mo. Agmo labat basta basaen itan, dapat “dalepdepen” mo. (Josue 1:8, paimanod leksab) Legan mon babasaen, itepet mod sarilim: ‘Antoy naaralan kod saya tungkol ed si Jehova a Dios? Antoy naaralan kod saya ya makatulong ed siak? Panon kon nausar irayan teksto pian tulongan so arum?’
3. Kapigan mo babasaen so Biblia?
Kasin ngalngali anggapoy oras mo ya basaen so Biblia? Dakel ed sikatayo so busy. Kanian “usar [mod] sankaabigan so panaon” o oras mo. (Efeso 5:16) Nagawaan mo iya no kada agew et walay eskedyul mon basaen so Biblia. Saray arum et manbabasa na Biblia ya masaksakbay ed kabuasan. Saray arum balet et legan na panangugto. Tan wala ni ray arum ya manbabasa na Biblia diad labi antis iran onugip. Sika ey, antoy balibalin eskedyul mo?
DAKEL NI NAARALAN MO
Aralen no panon mon na-enjoy so pambabasam na Biblia. Amtaen no panon so pamparaan pian makatulong ed sika so panaaral mo na Biblia.
Singa balon putahe ya no tawayan mo et nagustoan mo lanlamang, naaralan mo met ya na-enjoy ya basaen so Biblia
4. No panon mon na-enjoy so panagbasam na Biblia
Ompan nairapan kan igapo ya basaen so Biblia. Balet, nayarin nawalaan itayo na “pampilalek” o panlabay ya gawaen itan, ya singa balon putahe ya no tawayan tayo et nagustoan tayo lanlamang. Basaen so 1 Pedro 2:2, insan ebatan iya:
-
Parad sika, no inagew-agew mon basaen so Biblia, nagustoan mo la kasi tan labalabay mo lan basaen?
I-play so VIDEO pian naamtaan mo no panon ya ginapoan na arum ya basaen so Biblia tan na-enjoy da. Insan ebatan iraya.
-
Diad video, anto ray makakasebel ed saray kabataan ya nabasa so Biblia?
-
Antoy akatulong ed sikara pian regular dan nabasa so Biblia?
-
Antoy ginawa da pian ag-ira naboring ed pambabasa day Biblia?
Nia ray tip ya makatulong pian nigapom:
-
Manpili na bersion na Biblia ya napantiwalaan tan mainomay ya talosan. Salim so Balon Mundo a Patalos.
-
Manpili ka nin unona na parte na Biblia ya labalabay mo. Pian nawalaan ka na ideya, nengnengen so tsart ya “Igapon Basaen so Biblia.”
-
Ilistam so asumpal mo lan binasa. Usaren so tsart ed sayan publikasyon ya, “Rekord na Pambabasam na Biblia.”
-
Usaren so JW Library®app. Diad sayan app, sarag mon basaen tan dengelen so Biblia diad smartphone odino arum ya gadyet mo anggan iner so kawalaan mo.
-
Usaren so apendise na Balon Mundo a Patalos. Wala rad tay mapa, tsart, tan glosaryo pian mas na-enjoy moy pambasam.
5. Manparaan ka parad panaral yo na Biblia
Basaen so Salmo 119:34, insan ebatan iya:
-
Akin et maabig ya manpikasi ka antis mon basaen so Biblia odino iparaan so panaral yo?
Antoy gawaen mo pian makatulong ed sika so kada sesyon na panaral yo? Legan kan manpaparaan na sakey ya leksion, salim iyan gawaen:
-
Basaen iray pigaran parapo ed gapo na leksion.
-
Basaen iray teksto tan talosan no panon ya mikonektaan itan ed aaralen mo.
-
Gulisan iray importantin salita ya ebat ed kada tepet. Makatulong itan no pantongtongan yo la so leksion kaiba so mangiyaaral ed sika.
Kasin antam?
Saray Tasi nen Jehova et angusar na nanduruman bersion na Biblia. Balet, agustoan mi so Balon Mundo a Patalos na Masanton Kasulatan lapud susto, malinew, tan inusar toy ngaran na Dios.—Nengnengen so Artikulo ed website ya, “Kasin Walay Sarilin Biblia na Saray Tasi nen Jehova?”
IBABAGA NA ARUM: “Mairap ya aralen so Biblia, anggapoy oras kod satan ta naksawan ak ya lanang.”
-
Antoy nibagam ey?
SUMARYO
Makatulong ed sika so Biblia no walay eskedyul mo ya basaen itan, manpikasi ka pian natalosan mo so basaen mo, tan iparaan mo so panaral yo na Biblia.
Rebyu
-
Antoy gawaen mo pian makatulong ed sika so pambabasam na Biblia?
-
Kapigan mo babasaen tan aaralen so Biblia?
-
Akin et sulit no iparaan mo so panaaral yo na Biblia?
DISKOBRIEN
Nengnengen iray suhestion a makatulong ed pambabasam na Biblia.
“Man-enjoy tan Minabang ed Pambabasam na Biblia” (Say Panag-bantayan No. 1 2017)
Aralen so taloran paraan no panon mon igapon basaen so Biblia.
“Panon Ak ya Natulongan na Biblia?—Part 1: Diskobrem so Bibliam” (Artikulo ed website)
Amtaen no panon mon na-enjoy so pambabasam na Biblia.
Makaala kay tip ed saray abayag lan manbabasa na Biblia.
Ompan Nagustoan Mo Met
MABETBET YA ITETEPET
Anto tay Panag-aral na Biblia ya Iyoopresi na Saray Tasi nen Jehova?
Diad sayan libren interactive ya paraan na panag-aral ya iyoopresi na Saray Tasi nen Jehova, sarag mon usaren so anggan anton patalos na Biblia. Imbitaan so interon pamilyam odino anggan siopan kaarom ya labay day milad sika.
