Si Anette et biglan impatumba na angabuso ed sikato tan anggapoy agawaan to. “Sinalik so onlaban,” so kuan to. “Labay koy oneyag pero sinmelek so boses ko. Intulak ko, dinepakan ko, binuntalan ko, tan ginuyames ko. Pero sinaksak to ak kanian agak la akagalaw.”

No nagawa itan ed sika, antoy gawaen mo?

Anggano lanang kan ready—lalo la no labi—posible nin siansia ya nabiktima ka. “Samay maples ya ombatik et agnaynay a manatalo ed lumba,” so kuan na Biblia, “tan saramay makabat et agnaynay ya ontatalona, ta say panaon tan saray ag-iilaloan a nagawa et onsasabid sikaran amin.”—Eclesiastes 9:11.

Singa si Anette, wala ray kabataan ya biniktima na agda kabat. Pero wala met iray inabuso na kabat da odino kapamilya da ni ingen. Nen 10 ni labat so taon nen Natalie, sikatoy inabuso na kabataan ya kaabay da. “Natatakot ak ya maong tan nababaingan ak kanian nen unaan et agko labay ya ibaga ed arum,” so kuan to.

Nakokonsiensia si Anette ed samay agawad sikato. “Lanang kon sankanonot so agawad saman ya labi,” so kuan to. “Agak dapat sinmuko nen milalaban ak. Pero diad tua, nen asaksak ak la, agaylay takot ko. Anggapo lay nagawaan ko, pero dapat agak komon sinmuko.”

Ontan met so nalilikna nen Natalie. “Agak komon masyadon nantiwala ed arum,” so kuan to. “Imbaga na atateng mi ya dapat saniba kamin lanang nen agik no manggalaw kamid paway pero agak dinmengel. Kanian singa inikdan ko may kaabay mi na pagkakataon ya abusoen ak. Asakitan ya maong so pamilyak ed saman ya agawa, tan iisipen ko ya siak so akankasalanan. Aman so talagan agko natanggap.”

No say naliliknam et singa ed nalilikna nen Annette tan Natalie, tandaan mo ya agmo nilabay so agawad sika. Wala ray mangibabaga ya no say sakey et na-rape, agkasalanan na saray lalaki ta atan so natural ed sikara odino ompan labay met na biktima so agawa. Pero diad tua, ag-itan dapat nagawa ed anggan siopa. Kanian no biktima ka na onian krimen, agmo kasalanan!

Siempre, mainomay so pangibaga na “agmo kasalanan.” Pero ompan mairap mon kombinsien so sarilim ya anggapoy kasalanan mo. Say arum balet et isesekreto day agawa kanian nakokonsiensia ira tan negatiboy iisipen dad sarili da. Pero no agmo ibaga, siopay analo—sika o amay nambiktima ed sika? Kanian dapat ipaglaban moy sarilim. Manggawa kay paraan.

Ibabaga na Biblia ya nen grabe so problema nen Job, imbaga to: ‘Mansalita ak lapud pinasyan pakakaaburidok!’ (Job 10:1) Balibali no ontan met so gawaen mo. No ibagam so agawa ed pantitiwalaan mon kaaro, natulongan kan nasarag so problema tan nalemewan so liknaan mo.

Ginawa itan nen Annette. Imbaga to: “Akitongtong ak ed malet ya kaarok, tan imbaga tod siak ya ibagak itan ed saray elder ed kongregasyon. Maong labat ta ontan so ginawak. Aminpiga da ak ya kinatongtong tan talagan impalinew da ya agko kasalanan imay agawa. Aliwan siak so natetel.”

Imbaga nen Natalie ed atateng to imay impan-abuso ed sikato. “Sinuportaan da ak,” so kuan to. “Imbaga da ya agak dapat nababaingan ya mangistorya ed sikara, tan akatulong itan pian agak la tanton maermen tan nasyodotan ed sarilik.”

Baleg met so epekto na pikakasi ed si Natalie. “Akatulong ed siak so pitongtong ed Dios,” so kuan to, “lalo la no singa agko nibagad arum so naliliknak. No manpipikasi ak, nibabagak so amin ya labay kon ibaga. Kanian kayari to et mareen tan kalmadoy liknaan ko.”

Onsabi lanlamang so ‘panaon ya onabig’ ka. (Eclesiastes 3:3) Agmo papaulyanay laman mo tan agka manpapatalo ed negatibon liknaan. Manpainawa kan maong. Tan manuna ed amin, mantiwala ka ed Dios ya mangiiter na ligliwa, si Jehova.—2 Corinto 1:3, 4.

No piliten ka na boyfriend mo ya manggaway mauges, dapat desidido kan mangibagay “Agmo ‘tan gagawaen!” odino “Agmo ak didiwiten!” Agka natatakot ya ompan i-break ka na boyfriend mo. No i-break to ka lapud satan, agka alugi! Mas deserve moy tuan laki, amay rerespetoen toy laman mo tan prinsipyom ed bilay.

“Nen highschool ak, guyoren na lalaki so strap na brak insan ira mangibagay bastos—singa bilang, ibaga dan man-enjoy ak kuno no mi-sex ak ed sikara.”—Coretta.

Parad sika, kasin say gagawaen na saraman ya lalaki et

1. Manjo-joke labat?

2. Panag-flirt?

3. Sexual harassment?

“Diad bus, walay lakin nansalitay bastos insan to ak binembenan. Pinekpek koy lima to tan imbagak ya onarawi. Ninengneng to ak ya singa ak abnormal.”—Candice.

Parad sika, antoy gagawaen na sayan laki ed si Candice?

1. Manjo-joke labat?

2. Panag-flirt?

3. Sexual harassment?

“Nen imbeneg a taon, walay lakin lanang ton ibabagad siak ya type to ak tan labay to ak ya i-date, anggano naynay kon ibabagad sikato ya agko labay. No maminsan, aplosen toy taklay ko. Binagaan ko ya tundaan to ak, pero ikakkaloor to. Insan nen isisinger koy sintas na sapatos ko, pinekpek toy ebet ko.”—Bethany.

Parad sika, kasin say gagawaen na sayan laki et:

1. Manjo-joke labat?

2. Panag-flirt?

3. Sexual harassment?

Say dugan ebat ed sayan talo et C.

Antoy pidumaan na sexual harrasment ed panag-flirt tan panag-joke?

No imbagan sexual harassment, amay manggagawa labat so naliliketan tan ikakkaloor to anggano ibabaga na biktima ya tundaan to.

Seryoso itan. Posiblin manresulta itan ed sexual abuse.