Kada agew, masulok ya 20 datin sundalo na United States so manbibikkel. Kada bulan, manga 950 ya beteranon aasikasoen na U.S. Department of Veterans Affairs so manasalin manbikkel.

“Ngalngali kapaldua ed saray bibiin mantratrabaho ya anggapo ni 30 años da so nalulukonan antis ya ikasal. Biglan dinmakel so agni kasal ya ina [ed China] no ikomparad imbeneg labat iran dekada,” so report na China Daily. “Mas aawaten la natan” ed China so “pan- live-in.”

Ondadakel lamet so kaso na malaria diad Greece. Nen 1974 et ngalngali anggapo la yan sakit ed sayan bansa. Say ibabaga dan rason kanian pinmawil iyan sakit et say problemad ekonomya tan lapud abawasan so badyet parad health-care.

Ipapanengneng na survey ya anggano onmomoderno lad India, 74 porsiento nin siansia so malabay ya ateng da so manpili na naasawa ra. Makapainteres ta 89 porsiento so angibagan mas labay day miamong ed saray kakanayon da nen say ombiig na ayaman so pamilya ra.

“Onkakapuy so [Katolikon] Simbaan diad mayaman iran bansa na Europa tan Amerika. Daan so kultura tayo, angkakabaleg so simbaan tayo, bakante la ray kombento tayo tan makapuy so administrasyon na Simbaan, saray seremonya tan sutana tayo et magarbon maong. . . . 200 taon lan atilak so Simbaan.”—Imbaga na Katolikon kardinal ya si Carlo Maria Martini, im-publish na dyaryon Corriere della Sera nen inatey la.