papanisiaan na saray Hindu ya say sakey ya too et maniirap lapud saray gagawaen to natan odino lapud saray ginawa to ed akaunan bilay to. No nitunda to lay pannonot ed saray makamundo ya bengatla, nasabi to so moksha​—diad satan et sikatoy makalukpos ed paulit-ulit ya kiyanak lamet.

papanisiaan na saray Muslim ya say paniirap et dusa lapud kasalanan odino subok ed pananisia. Ibabaga nen Dr. Sayyid Syeed, presidente na Islamic Society of North America, ya ipapanonot na saray trahedya ya “kaukolan tayoy misalamat ed amin ya bendisyon na Dios tan nepeg tayon tulongan iray mankaukolan.”

papanisiaan na saray Judio ya maniirap so sakey ya too lapud saray gagawaen ton mismo. Wala ray Judio ya manisian walay kioli, tan diad satan et naikdan na hustisya iray nanirap ya anggapo met so kasalanan da. Ibabangat na Kabbalistic (mystical) Judaism so reinkarnasyon, ya diad satan et naikdan na paulit-ulit ya pankanawnawa so sakey ya too ya pagbabawian iray lingo to.

papanisiaan na saray Budista ya say sakey ya too et niyanak ya maminpigapiga. Ibabaga ran tuloytuloy ya manirap so sakey ya too anggad no itunda to la ray negatibon gagawaen, nalilikna, tan pipirawaten to. No marunong so sakey ya too, manggagaway maong, tan malinis so iisipen to, nasabi toy nirvana​—say kipapasen ya naandi lan amin so kairapan.

Ibabaga na saray Confucianista ya kaslakan ed saray kairapan et lapud “lingo na too,” so kuan na A Dictionary of Comparative Religion. Papanisiaan da ya anggaman nabawasan so paniirap no manggaway kamaongan so sakey ya too, kaslakan ya paniirap et manlalapud “saray espiritu, tan ag-itan nakontrol na too. Diad satan et kaukolan ton awaten no antoy inter na Kapalaran.”

papanisiaan na arum ya relihyon na saray tribu ed Africa ya say paniirap et lapud saray espiritu. Base ed sarayan pananisia, nayarin mangiter na suerte odino problema iray mangkukulam tan napigilan labat iray gagawaen da panamegley na nanduruman ritual. Kanian no mansakit so sakey ya too, papanisiaan dan nakontra so ginawa na saray mangkukulam diad tulong na saray ritual tan panagtambal na saray albularyo.

ibabaga na saray Kristiano ya ginmapo so paniirap lapud impankasalanan na unonan duaran too a singa adeskribe ed libro na Biblia ya Genesis. Balet, inyarum na dakel ya relihyon so sarilin ideya da ed satan ya bangat. Singa bilang, ibabaga na arum ya Katoliko ya say panirap na sakey ya too et nayari ton ‘iyapay ed Dios’ pian naebatan so kerew to ya natulongan so simbaan odino lapud satan ya panirap to et nisalba toy arum.