Agbasta-basta naekal so panangidumaduma odino diskriminasyon ya nalilikna na sakey. No panon ya kaukolay panaon tan sagpot pian onabig ed sakit, kaukolan met so panaon tan sagpot pian nalabanan so panangidumaduma odino diskriminasyon. Antoy gawaen mo pian naekal so ontan ya naliliknam?

“Isulong yo so aro, ta saya so perpekton bedber na pankakasakey.”​—COLOSAS 3:14.

Antoy labay ya ibaga na satan? No manggawa kay maong ed arum, niwala so maong ya ulopan. No diman mo ipapanengneng so panangaro ed arum, diman kalkalnan naandi so panangidumadumam. No diman mo nalilikna so panangaro, anggapoy lugar na pambusol ed pusom.

Manisip kay espisipikon paraan no panon mon ipanengneng so panangaro ed saray totoon negatibo so pakanengneng mo ed sikara. Nagawaan mo iya anggan diad simpli labat ya paraan. Salim ya gawaen so sakey odino pigara ed saraya:

• Manggawa kay kamaongan ed sikara. Nayarin ilukasan mo iray puerta odino nayarin ipalugar moy yurongan mo no wala kad publikon luluganan.

• Salim so mitongtong ed sikara anggano magano labat, anggano agda tanton natalosan so lenguahem.

• Anosan mo ra no singa walay gagawaen dan agmo natatalosan.

• Dengel mo ran maong no ibabaga day problema ra.