NO ANTOY IBABAGA NA ARUM

Saray Israelita et nandayew ed brutal ya dios ya labalabay toy guerra tan panagpatey.

NO ANTOY IBABAGA NA BIBLIA

Saray bansa ya tinalo na saray Israelita et grabe so kaugsan da tan mabanday iray kagagawa ra​—singa say pisekso ed ayep, pisekso ed kanayon, tan pangibagat na ugugaw. Pigan lasus ya taon ya inikdan ira na Dios na tsansan manguman, pero ag-ira anguman kanian imbaga na Dios ed saray Israelita: “Saray nasyon a pataynanen ko ed arapan yo et dinutakan day inkasikara lapud sarayan amin.”​—Levitico 18:21-25; Jeremias 7:31.

“Mauges irayan nasyon kanian pataynanen ira nen Jehova a Dios mo ed arapan mo.”​—Deuteronomio 9:5.

NAYARIN NAIIMANOM

Diad dakel ya guerra, parehon ibabaga na saray lider na relihyon na mankalaban a grupo ya walad panig da so Dios. Imbaga na libron The Causes of War: “Walan walay pibabali na relihyon ed amin ya guerra.”

NO ANTOY IBABAGA NA BIBLIA

Saray Kristiano et agnayarin milaban ed saray mamubusol ed sikara. Oniay insulat nen apostol Pablo ed saray kapara ton Kristiano: “No posible, diad anggaay nayarian yo, mikareenan kayod amin a totoo. Agkayo ombabales parad inkasikayo.”​—Roma 12:18, 19.

Imbes ya ibaki nen Jesus iray papatumbok to ya miguerra, oniay imbaga to: “Itultuloy yon aroen iray mamubusol ed sikayo tan ipikasi iramay mamapasegsegang ed sikayo, pian napaneknekan yon sikayo ray ananak na Ama yon walad tawen.” (Mateo 5:44, 45) Anggano miguerra so bansa ya kawalaan na saray Kristiano, nepeg ya mansiansia ran neutral lapud ‘ag-ira kabiangay mundo.’ (Juan 15:19) Labay na Dios ya saray mandadayew ed sikato diad amin a bansa et aroen da ray mamubusol ed sikara tan mansiansia ran biig ed mundo, kanian anggapoy papanigan to ed saray grupo ya manlalaban natan.

“Say Panarian ko et agkabiangan na sayan mundo. No say Panarian ko et kabiangan na sayan mundo, akilaban la komon iray lingkor ko pian agak niyawat ed saray Judio. Balet say tua, say Panarian ko et agmanlapu dia.”​—Juan 18:36.

NO ANTOY IBABAGA NA ARUM

Agnaiwasan so guerra. “Walan walay nagawan guerra,” so kuan na libron War and Power in the 21st Century. “Agyo la iilaloan ya niwalay kareenan ed interon mundo diad sayan panaon.”

NO ANTOY IBABAGA NA BIBLIA

Naandi lay guerra no anggapo lay toon labay toy miguerra. Magano lan onaksion so Panarian o gobierno na Dios a walad tawen pian deralen so amin ya armas ed interon mundo tan bangatan iray totoo ya mikareenan. Ipapaseguro na Biblia ya say Dios et “ipetek to ray kaukolan ya ipetek parad saray mabiskeg a nasyon ed arawi. Pitpiten da ray espada ra pian gawaen a tarem na lukoy tan saray gayang da et gawaen dan palot. Anggapo lay nasyon a mangitagey na espada sumpad sananey a nasyon, agmet la ra manaral a miguerra.”​—Miqueas 4:3.

Ibabangat na Biblia ya diad uley na Panarian na Dios, anggapo la ray gobierno ed kada bansa ya mankokompetensia parad sarili dan ambisyon, anggapo la ray manprotesta lapud saray aliwan patas ya batas, tan anggapo lay panagbusol lapud lahi. Kanian naandi la so guerra. “Anggapo lay gawaen dan makapasakit,” so impromisa na Dios, “lapud say dalin et napano na kakabatan ed si Jehova a singa saray danum a mamapano ed dayat.”​—Isaias 11:9.

“Papatundaen to ray guerra diad interon dalin. Puputeren to ray pana tan dederalen to ray gayang; popoolan to ray kariton a parad guerra.”​—Salmo 46:9.