MANUNAN ARTIKULO | SAY BIBLIA—AKIN ET NIPRESERBA?
Nipreserba Anggano Midederal so Angisulatan
NO ANTOY PROBLEMA: Papiro tan pergamino so inusar na saray angisulat ed Biblia tan saray managkopya. * (2 Timoteo 4:13) Akin et aglawari nipreserba so Biblia lapud saratan ya angisulatan?
Say papiro et mipipilat, mainomay ya onkupas, tan lupok. Oniay imbaga na saray Egyptologist ya si Richard Parkinson tan Stephen Quirke: “Sayan klase na pansusulatan et nabulok ya anggad say nakera labat et mekmek tan ulat na satan. No akasinop so lukot, nayarin nabuotan odino nabulok tan nayarin kibkiben na saray insekto, lalo la ray tabuney no akakotkot.” Wala ray papiro ya kayarin adiskobre et maples ya aderal lapud sobran liwawa odino salimuot.
Mas matibay so pergamino nen say papiro, balet nabulok met itan no agnaalwaran odino no sobray petang, salimuot, odino liwawa. * Labalabay met na saray insekto so pergamino. Kanian mair-irap ya ipreserba iray datdaan lan sulsulat. No midederal so angisulatan ed Biblia, panon balet ya akasabid sikatayo so mensahe na satan?
NO PANON YA NIPRESERBA SO BIBLIA: Ingganggan iray Judio ya kada ari et “nepeg ton kopyaen ed sakey a libro iyan Ganggan,” say unonan limaran libro na Biblia. (Deuteronomio 17:18) Sakey ni, dakel ya manuskrito so apawala na saray eksperton managkopya kanian nen unonan siglo C.E., wala lay kopya na saray sinagoga diad interon Israel ya anggad arawin lugar na Macedonia! (Lucas 4:16, 17; Gawa 17:11) Panon balet ya nipreserba anggad natan iray datdaan ya manuskrito?
Saray manuskrito ya tatawagen ya Dead Sea Scrolls et nilasus taon ya nipreserba ed saray buyog diad saray kuweba ya amagamaga so klima
“Apasalan na saray Judio ya ikargad saray buyog iray lukot na Kasulatan pian nipreserba iratan,” so kuan nen Philip W. Comfort, sakey ya eksperto ed New Testament. Ontan met so ginawa na saray Kristiano. Kanian wala ray daan ya manuskrito na Biblia ya adiskobrin akakargad buyog, pati diad saray ambilunget ya kuarto, diad saray kuweba, tan diad saray amagamagan pasen.
SAY RESULTA: Wala ni anggad natan so nilibon piraso na saray manuskrito na Biblia, ya say arum et masulok lan 2,000 taon so kabayag to. Anggapo lay arum a daan ya sulsulat ya ontan kadaan tan ontan karakel so kopya to.
^ par. 3 Say papiro et tanaman ed danum tan say pergamino et gawad katat na ayep ya parehon uusaren ya pansulatan.
^ par. 5 Singa bilang, samay orihinal ya kopya na Declaration of Independence na America et insulat ed pergamino. Natan, anggapo ni 250 ya taon et kinmupas la itan tan ngalngali agla nabasa.
Ompan Nagustoan Mo Met
SAY PANAG-BANTAYAN
Kayamanan Diad Basuraan!
Say piraso na papyrus na Ebanghelyo nen Juan diad John Rylands Library so sankadaanan ya aromog a manuskrito ed Kristianon Griegon Kasulatan.
