SAY PANAG-BANTAYAN—PANARALAN YA EDISYON Enero 2018

Walad sayan isyu iray aaralen ya artikulo parad Pebrero 26 anggad Abril 1, 2018.

MABULBULOS DAN INYAPAY SO INKASIKARA

Mabulbulos Dan Inyapay so Inkasikara—Diad Madagascar

Kabaten tayoy arum ed saray nampalaknab na ministeryo da pian ontulong ed pangipulong na mensahe na Panarian diad maawang ya teritorya na Madagascar.

“Iikdan Toy Pakayari Iray Naksawan”

Legan ya manasingger so anggaan, ilaloan tayon ondakel iray subok ed bilay ya dadalanen tayo. Ipapanonot na teksto tayo ed taon 2018 ya manilalo tayod si Jehova ya pabiskegen to tayo.

Makapaliket a Pankakasakey tan say Memoryal

Panon a say Memoryal et makakatulong pian onelet so pankakasakey na totoo na Dios? Kapigan so sampot ya pannodnonot ed Memoryal?

Akin ya Mangiiter Tayo ed Samay Wala Lad Sikaton Amin?

Say sakey a paraan pian nipanengneng tayoy panangaro ed Dios et diad pangiiter tayo ed sikato. Panon itayon nagugunggonaan diad panguusar tayoy mablin kaykayarian tayo pian igalang si Jehova?

Anton Klase na Aro so Panlapuan na Tuan Liket?

Antoy pandumaan na panangaro ed Dios tan say panangaro ya adeskribe ed 2 Timoteo 3:2-4? Saray ebat et makatulong ed sikatayon nalikna so tuan liket tan inkapnek.