Manmatalek Kayo ed si Jehova Tekep na Interon Puso Yo

“Saray mikabat na ngaran mo, ‘yan da so panmatalek da ed sika.”​—SALMO 9:10.

1, 2. Anto so pigaran bengatla a maapan panmamatalkan parad kaligenan?

 NATAN et normal labat so pananap ed sakey a too odino sakey a bengatla a makapangitarya na seguridad, lapud dakel a bengatla so manesesga ed pankaabigan tayo. Iisipen na arum a say pakawalaan na dakel a kuarta so mangiter ed sikara na seguridad ed arapen, balet diad tua et say kuarta so agnapanmatalkan a salimbengan. Ibabaga na Biblia: “Say manmatalek ed saray kayamanan to napelag.” (Uliran 11:28) Walaray maniilalo ed saray lider a totoo, balet anggan saray sankaabigan ed sikara et nalilingo. Tan diad saginonor et ompatey met ira. Oniay makabat ya ibabaga na Biblia: “Agyo iyan so panmatalek yo ed saray priprinsipe, nisay dia ed anak na too, a dia ed sikato anggapo so tulong.” (Salmo 146:3) Papasakbayan itayo met na saratan ya apuyanan a salita ya agtayo manmamatalek ed saray dilin sagpot tayo. Sikatayo so ‘anak met lambengat na too.’

² Sinita nen propeta Isaias iray lider na nasyon na Israel diad panaon to lapud nanmatalek ira ed “salimbeng na saray tila.” (Isaias 28:15-17) Diad panaanap da na kaligenan, akialyansa ira ed politika diad saray kabangibang a nasyon. Agnapanpiyaan iratan a piaalyansa​—sakey a tila. Ontan met, babayuboan na dakel a relihyoson lider natan so pisisiglaotan da ed mapolitika iran lider. Saratan a  piaalyansa so napaneknekan met a “tila.” (Apocalipsis 17:16, 17) Ag-iratan mangitarok na magnayon a kaligenan.

Saray Maong ya Ehemplo nen Josue tan Caleb

3, 4. Anton mandumaan a report so intarok di Josue tan Caleb tan say samplora nin espiya manlapud Insipan a Dalin?

³ Iner sirin so nepeg tayon pananapan na kaligenan? Dia met ed akaromogan di Josue tan Caleb diad panaon nen Moises. Kayarin tuloy na inkibulos na Israel manlapud Ehipto, akaparaan la so nasyon ya onloob ed Canaan, say Insipan a Dalin. Nibaki so labinduan lalaki a man-espiya ed dalin, tan diad pansampot na 40 ya agew, pinmawil ira pian manreport. Duara lambengat ya espiya, si Josue tan Caleb, so walaan na paborablin report nipaakar ed saray pankanawnawa na Israel ya ontalona diad Canaan. Inmabobon so arum a say dalin so makaroyroyo balet ta inkuanda: “Saray totoo a manaayam ed dalin mabiskeg ira, et saray syudad aliber na bakor tan angkakabaleg ira a maong: . . . Agtayo nayarian so onsumpa ed saray totoo; ta lapu ed mabibiskeg ira nen sikatayo.”​—Numeros 13:27, 28, 31.

⁴ Dinengel na saray Israelita so samploran espiya tan tinmakot ira, ya angga ed nanmeremere la ra sumpad si Moises. Diad kaunoran, onia so inkuan nen Josue tan Caleb tekep na pirmin liknaan: “Say dalin a binatak mi a sinimasim sikato so sakey a dalin ya agaylay abig. No si Jehova et karoyroyo to itayo, yakar to itayo ed sayan dalin, tan iter to ed sikatayo; sakey a dalin a manag-agus so gatas tan dilo. Dapu’t ingen no agkayo onsusumpa ed kinen Jehova, odino agkayo antakot ed saray totoo ed satan a dalin.” (Numeros 14:6-9) Anggaman ontan, agdinmengel iray Israelita tan, bilang resulta et ag-ira akaloob ed Insipan a Dalin diad saman a panaon.

5. Akin a paborabli so inreport di Josue tan Caleb?

⁵ Akin a maabig so inreport di Josue tan Caleb, bangta makapuy so inreport na samploran espiya? Amin dan 12 so akanengneng ed mabibiskeg a syudad tan akaletneg la iran nasyones. Tan susto so imbaga na samploran espiya ya agtanton mapuersa so Israel a manakop ed dalin. Amta met itan nen Josue tan Caleb. Balet, say impanmoria na samploran espiya ed saray bengatla et unong ed punto de bista na too. Diad biek a dapag, si Josue tan Caleb so nanmatalek ed si Jehova. Naimatonan da so makapakelaw iran ginawa to ed Ehipto, diad Ambalangan Dayat, tan diad Palandey Sinai. On, kayari na pigaran dekada et apakiwas si Rahab na Jerico diad impakadngel to labat ed saratan a report kanian inrisga to so bilay to parad totoo nen Jehova! (Josue 2:1-24; 6:22-25) Si Josue tan Caleb, ya akaimaton ed saray ginawa nen Jehova, so walaan na sigpot a kompiyansa ya itultuloy na Dios so mibakal parad totoo to. Kayari na apataplon taon, niyalangon so panagmatalek da sanen say balon kailalakan na saray Israelita, ya indauloan nen Josue, so amaarap ed Canaan tan tinalo ra so bansa.

No Akin a Nepeg Itayon Manmatalek a Maong ed si Jehova

6. Akin a nadedesdes iray Kristiano natan, tan iner so nepeg a pangipapegan day panagmatalek da?

⁶ Diad sarayan ‘maatap a panaon a mairap a pidenengan,’ sikatayo so nipapaarap ed saray kabusol a mas mabiskeg nen say sikatayo, a singa met ed saray Israelita. (2 Timoteo 3:1) Sikatayo so nadedesdes ed moral, espiritual, tan diad arum a kipapasen et diad pisikal ni ingen a paraan. No sikatayon dili lambengat, agtayo naresistian iratan a pananesdes, ta nanlapu iratan ed mas mabiskeg nen say too, si Satanas a Diablo. (Efeso 6:12; 1 Juan 5:19) Iner sirin so nakerewan tayo na tulong? Diad impanpikasi to ed si Jehova, oniay kuan na sakey a matoor a too nensaman: “Saray mikabat na ngaran mo, ‘yan da so panmatalek da ed sika.” (Salmo 9:10) No talagan kabat tayo si Jehova tan natalosan tayo so kabaliksan na ngaran to, manmatalek itayo ed sikato a singa impanmatalek met di Josue tan Caleb.​—Juan 17:3.

7, 8. (a) Panon a say palsa so mangiter ed sikatayo na saray rason pian manmatalek ed si Jehova? (b) Antoran rason so iiter na Biblia nipaakar ed panmatalek ed si Jehova?

⁷ Akin a nepeg itayon manmatalek ed si Jehova? Ontan so ginawa nen Josue tan Caleb lapud naimatonan da iray ebidensya na pakayari to. Ontan met ed sikatayo. Alimbawa, konsideraen pa iray pinalsa nen Jehova, pati say uniberso a walaan na binilyon iran galaksi. Say malaklaknab a pisikal a puersa a kokontrolen nen Jehova so mangipatnag a sikato so talagan Makapanyarin-amin.  Legan tayon momolimolien so makapakelaw iran pinalsa, kaukolan a miabobon itayo ed si Job, ya angikuan ed si Jehova: “Siopa so makabaat ed sikato? Siopa so mangikuan ed sikato, Anto so gawaen mo?” (Job 9:12) Diad tua, no sasalimbengan itayo nen Jehova, agtayo nepeg a takotan so anggan siopa diad interon uniberso.​—Roma 8:31.

⁸ Konsideraen met so Salita nen Jehova, say Biblia. Sayan tuloytuloy a lapuan na madibinon kakabatan so mabiskeg ya ontutulong ed sikatayo pian natalonaan iray makapuy ya agamil tan nitunos tayo so kabibilay tayo ed linawa nen Jehova. (Hebreos 4:12) Diad panamegley na Biblia et akabat tayo so ngaran nen Jehova tan atalosan tayo iray kabaliksan na ngaran to. (Exodo 3:14) Amoria tayo a nayarian nen Jehova a pagmaliwen so inkasikato ed labay ton pagmaliwan​—sakey a maaron Ama, matunong ya Ukom, mananalon Mibabakal​—ta pian nasumpal to iray gagala to. Tan naiimatonan tayo no panon a lawas nagagawa so sinalita to. Diad panaaral tayo ed Salitay Dios, napakiwas itayon mangibaga, a singa met ed inkuan na salmista: ‘Nanmatalek ak ed salitam.’​—Salmo 119:42; Isaias 40:8.

9. Panon a pabiskegen na dondon tan inkioli nen Jesus so panagmatalek tayo ed si Jehova?

⁹ Say dondon so sakey nin rason pian manmatalek ed si Jehova. (Mateo 20:28) Agaylan makapakelaw so impangibaki na Dios ed mismon Anak to pian ompatey bilang panondon ed sikatayo! Tan petepeteg ya epektibo so dondon. Sasakbongan na satan iray kasalanan na amin a katooan a magbabawi tan onasingger ed si Jehova tekep na matuan puso. (Juan 3:16; Hebreos 6:10; 1 Juan 4:16, 19) Sakey lan aspekto pian nibayar so dondon et say kioli nen Jesus. Satan a milagro, a pinaneknekan na nilasus iran akanengneng, so kaaruman a rason pian manmatalek ed si Jehova. Garantiya itan a saray ilalo tayo so nasumpal.​—Gawa 17:31; Roma 5:5; 1 Corinto 15:3-8.

10. Antoray personal a rason tayo pian manmatalek ed si Jehova?

¹⁰ Pigara lambengat iratan a rason no akin a nayarian tayo tan nepeg itayon sigpot a manmatalek ed si Jehova. Dakel niray rason, ya arum ed saratan et personal. Alimbawa, panapanaon et nipapaarap itayo ed mairap iran sirkumstansya ed bilay tayo. No paigiya itayo ed si Jehova pian napidenengan iratan, nanengneng tayo no panon ka-praktikal itan a panangigiya. (Santiago 1:5-8) No lalo itayon manmatalek ed si Jehova diad inagew-agew a bilay tayo tan naeksperiensya tayo so maabig iran resulta na satan, lalon ombiskeg so panagmatalek tayo ed sikato.

Si David so Nanmatalek ed si Jehova

11. Anggaman ed antoran sirkumstansya a nanmatalek si David ed si Jehova?

¹¹ Si David na kadaanan ya Israel so nanmatalek ed si Jehova. Inarap nen David so panangigagaem nen Arin Saul, a malabay a mamatey ed sikato, tan say makapanyarin armada na saray Filisteo, a manasalin mangonkesta ed Israel. Siansia, sikato so akaliktar tan nambiktorya. Akin? Oniay insalaysay a mismo nen David: “Si Jehova sikato so silew ko tan kilabanan ko; Siopa so takotan ko naani? Si Jehova sikato so biskeg na bilay ko; Siopa ni  antakot ko naani?” (Salmo 27:1) Ontalona itayo met sano manmatalek itayo ed si Jehova.

12, 13. Panon ya impatnag nen David a nepeg itayon manmatalek ed si Jehova anggan sano usaren na saray kabusol so dila ra bilang ayura sumpad sikatayo?

¹² Diad sananey nin inkagawa et oniay impikasi nen David: “Dengel mo so boses ko ed pandalem ko, O Dios: yapiger mo a yarawi bilay ko ed takot ed kabusol. Isanib moak a yarawi ed maamot a singbatan na saray managgaway mauges, yarawi ed yaalsa na saray managgawa na kasulitan; a sikara inyubol da so dila ra a singa sakey a kampilan, tan binalok da so bekang da a pangipalsot da na panapana ra, sara’lanti ampait ira a salsalita, Ta pian napalsot da ed maamot so nagnap a too.” (Salmo 64:1-4) Agtayo naseguro no anto so amakiwas ed si David a mangisulat ed sarayan salita. Balet amta tayo a natan, ‘iyuubol [met na saray onsusumpa] so dila ra,’ a manguusar ed panagsalita bilang ayura ed bakal. ‘Papalsoten’ da iray andiay-matik a Kristiano, a mangibabalikas odino mangisusulat na saray salita a singa “pana” na panagpauges. No sigpot itayon manmatalek ed si Jehova, anto so resulta?

¹³ Oniay intuloy ya imbaga nen David: “Say Dios bekasan to ra na sakey a pana, bigla ra a nasugat. Kanian napatiror ira naani, say dila ra so onsumpa ed sikaran dili. . . . Dia ed Jehova so panliketan na matunong tan manilalo ed sikato.” (Salmo 64:7-10) On, anggaman uubolen na kakabusol so dila ra sumpad sikatayo, diad kaunoran et say ‘dila ra so onsumpa ed sikaran dili.’ Diad kaunoran et pagmaliwen nen Jehova a positibo iray pansumpalan, ta pian saramay manmamatalek ed sikato so manliket ed sikato.

Makanakana so Impanmatalek nen Hezekias

14. (a) Anggaman ed anton mapeligron kipapasen a nanmatalek si Hezekias ed si Jehova? (b) Panon ya impatnag nen Hezekias ya agto anisiaan iray katilaan na Asiryano?

¹⁴ Apaneknekan met a makanakana so impanmatalek nen Arin Hezekias ed si Jehova. Legan na uley nen Hezekias, say Jerusalem so pinagyaw na mabiskeg ya armada na Asirya. Satan ya armada so anaeg la ed dakel niran nasyon. Tinalo met na satan iray syudad na Juda nilikud labat ed Jerusalem, tan inlastog nen Senakerib a taloen to met itan a syudad. Panamegley nen Rabsaces, susto so imbaga to a kaapaan lambengat so panmatalek ed tulong na Ehipto. Balet, onia met so inkuan to: “Agto ka komon palingoen na Dios mo a sikato so panmatalkan mo, a mankuan, Say Jerusalem agnaani niiter ed lima na ari ed Asirya.” (Isaias 37:10) Anggaman ontan, amta nen Hezekias a sikatoy agpalikdoen nen Jehova. Kanian oniay impikasi to: “O Jehova a Dios mi, ilaban mo kami ed lima [na saray taga-Asirya], pian amin so saray nanarian ed mundo amtaen da komon a sika si Jehova, sika lambengat.” (Isaias 37:20) Tinalineng nen Jehova so pikakasi nen Hezekias. Diad sakey a labi et tinigway na sakey ya anghel so 185,000 ya Asiryanon sundalo. Aliktar so Jerusalem, tan si Senakerib so aglan balot pinmawil ed Juda. Amin na saramay akadngel ed sayan ebento so akaaral ed inkatalonggaring nen Jehova.

15. Anto lambengat so makatulong ed sikatayo parad antokaman a mairap a kipapasen a nayarin kidungetan tayo ed sayan agmaligen a mundo?

 ¹⁵ Singa met ed si Hezekias, mibabakal itayo met natan. Diad kipapasen tayo, say pibabakal tayo et maespiritual. Balet, bilang maespiritual a mibabakal et nakaukolan tayon bayuboan iray dunong pian mansiansian mabilay ed espiritual. Nakaukolan tayon talaranan so iyaataki tan iparaan tayoy inkasikatayo pian nadaeg tayo iratan. (Efeso 6:11, 12, 17) Diad sayan agmaligen a mundo, nayarin biglan manguman iray kipapasen. Say gulo ed bansa so nayarin ag-ilaloan ya onlesa. Saray bansan kabkabat a maabuloy ed totoon nanduruma so relihyon da et nayarin magmaliw a mapeget. Singa si Hezekias, makapanparaan tayo labat ed antokaman a nagawa no bayuboan tayo so agnagiing a panagmatalek ed si Jehova.

Anto so Kabaliksan na Panmatalek ed si Jehova?

16, 17. Panon tayon nipatnag a manmamatalek itayo ed si Jehova?

¹⁶ Say panagmatalek ed si Jehova et aliwa lambengat a diad salita. Lalanoren na satan so puso tayo tan ipatnag itan ed saray kiwas tayo. No manmatalek itayo ed si Jehova, sigpot itayon manmatalek ed Salita to, say Biblia. Inagew-agew tayo itan a basaen, dalepdepen, tan paigiya ed satan diad kabibilay tayo. (Salmo 119:105) Say panmatalek ed si Jehova so mangilalanor met ed panmatalek ed pakayari na masanton espiritu. Diad tulong na masanton espiritu, nabayuboan tayo so bunga a makapaliket ed si Jehova tan niwaklit tayo so nigalet iran mauges ya ugali. (1 Corinto 6:11; Galacia 5:22-24) Kanian, diad tulong na masanton espiritu et nitunda na dakel a totoo so panagsigarilyo odino panagdruga ra. Arum so angitalirak ed imoral ya estiloy-kabibilay. On, no manmatalek itayo ed si Jehova, onkiwas itayo tekep na biskeg a manlalapud sikato, aliwan ed dili tayo.​—Efeso 3:14-18.

¹⁷ Niarum ni, say panmatalek ed si Jehova so mankabaliksan na panmatalek ed saramay panmamatalekan to. Alimbawa, inyarunsa nen Jehova so “matoor tan makabat ya aripen” a mangasikaso ed intereses na Panarian diad dalin. (Mateo 24:45-47) Ag-tayo onkikiwas a dili, tan agtayo ibabaliwala itan ya impakaturo, lapud manmamatalek itayo ed uksoyan nen Jehova. Niarum ni, saray mamatatken a manlilingkor ed Kristianon kongregasyon so aturo panamegley na masanton espiritu, unong ed si apostol Pablo. (Gawa 20:28) No mikokoopera itayo ed uksoyan nipaakar ed saray mamatatken ed kongregasyon, ipapanengneng tayo met so panagmatalek ed si Jehova.​—Hebreos 13:17.

Tumboken so Ehemplo nen Pablo

18. Panon so panutumbok na saray Kristiano natan ed ehemplo nen Pablo, balet anto so agda panmamatalekan?

¹⁸ Nipaarap si apostol Pablo ed dakel a pananesdes diad ministeryo to, a singa sikatayo met. Diad panaon to, apauges so Inkakristiano ed imaton na saray walad pakauley, tan no maminsan et nanggunaetan ton peteken iratan a palson impresyon odino iletneg so panagpulong a kimey diad legal a paraan. (Gawa 28:19-22; Filipos 1:7) Natan et tutumboken na saray Kristiano so ehemplo to. Kapiganman a posibli, tulongan tayo so arum a nalinewan nipaakar ed kimey tayo, ya usaren so antokaman a walan paraan. Tan idepensa tayo so maong a balita tan iletneg tayo itan ed legal a paraan. Balet, agtayo panmamatalekan iratan a sagpot, lapud agtayo momoriaen a say itatalona odino isaew so akadepende ed panalo ed saray kaso ed korte odino pamawala na paborablin publisidad. Imbes, manmamatalek itayo ed si Jehova. Nodnonoten tayo so panamaseseg to ed kadaanan ya Israel: “Dia ed kareenan tan panmatalek so kawalaan naani na biskeg yo.”​—Isaias 30:15.

19. Sanen apasegsegang ira, panon ya apaneknekan a makanakana so impanmatalek na agagi tayo ed si Jehova?

¹⁹ Walaray panaon kaleganan na modernon awaran tayo ya asebelan odino apegetan so kimey tayo diad Mamabukig tan Mamasagur a Europa, diad saray parte na Asia tan Aprika, tan diad saray bansa ed Abalaten tan Amianen ya Amerika. Kabaliksan kasi na saya a kaapaan so panmamatalek tayo ed si Jehova? Andi. Anggaman iyaabuloy to no maminsan so ampait a panamasegsegang nisengeg ed maabig a gagala to, si Jehova so maaron mamapabiskeg ed saramay puntirya na satan a panamasegsegang. Anggaman napapasegsegang ira, dakel a Kristiano so akapawala na alay abig a rekord na pananisia tan panagmatalek ed Dios.

20. Anggaman nagugunggonaan itayo ed legal iran kawayangan, diad antoran pamaakaran ya agtayon balot mikompromiso?

²⁰ Diad biek a dapag, walaan itayo na legal a pakabidbiran ed maslak a bansa, tan no maminsan et makakaawat itayo na paborablin publisidad na media. Pisalamatan tayo itan tan bidbiren tayo ya onkana met itan ed gagala nen Jehova. Lapud pangiyaabuloy to, uusaren tayo so malalaknab a kawayangan tayo, aliwan pian paaligwasen so personal ya estiloy-kabibilay tayo, noagta pian mapubliko tan sigpot a makapanlingkor ed si Jehova. Balet, agtayon balot ikompromiso so neutralidad tayo nisay onletey itayo ed panaglingkor ed si Jehova lapu lambengat ed atagey a respeto ed sikatayo na autoridad. Sakop itayo na Mesianikon Panarian tan sikatayo so sigpot a walad dapag na inkasoberano nen Jehova. Aliwan ed sayan sistema na bengabengatla so panilaloan tayo noagta diad balon mundo, a say mangatatawen a Mesianikon Panarian so alenleneg a gobiernon manuley ed sayan dalin. Anggaporay bomba, missiles, odino anggan say iyaataki panamegley na nuklear so makaderal ed satan a gobierno odino mangipelag ed satan manlapud tawen. Ag-itan nadaeg tan sumpalen na satan so gagala nen Jehova.​—Daniel 2:44; Hebreos 12:28; Apocalipsis 6:2.

21. Anton kurang so determinado tayon tumboken?

²¹ Ibabaga nen Pablo: “Sikami aliwa kami ya iba na saray onsener pian pakabalangan; noag ingen iba na saray walaan na pananisia ed kilalaban na kamarerwa.” (Hebreos 10:39) Matoor tayo komon ya amin a manlingkor ed si Jehova anggad anggaan. Walaan itayo na amin a rason pian sikatayo so sigpot a manmatalek ed si Jehova natan tan diad andi-anggaan.​—Salmo 37:3; 125:1.

Anto so Naaralan Yo?

• Akin a paborabli so inreport di Josue tan Caleb?

• Anto so pigaran rason no akin a nepeg itayon sigpot a manmatalek ed si Jehova?

• Anto so kabaliksan na panmatalek ed si Jehova?

• Lapud panagmatalek ed si Jehova, determinado tayon agamilen so anton talindeg?

[Tepetepet Parad Panagaral]

[Litrato ed pahina 15]

Akin a paborabli so inreport di Josue tan Caleb?

[Saray litrato ed pahina 16]

Saray pinalsa so mangitatarya ed sikatayo na mabiskeg a rason pian manmatalek ed si Jehova

[Credit Line]

Say taloran litrato: Diad impangiyabuloy na Anglo-Australian Observatory, nilitrato nen David Malin

 [Litrato ed pahina 18]

Say panmatalek ed si Jehova et mankabaliksan na panmatalek ed saray panmamatalekan to