Naabrasa Kayo ed Sankaabigan a Dalan na Bilay!

“No manbibilay itayo tan no ompatey itayo, kien itayo nen Jehova.”​—ROMA 14:8, NW.

1. Anto so imbangat nen Jesus nipaakar ed sankaabigan a dalan na bilay?

LABAY nen Jehova a nawalaan itayo na sankaabigan a klase na bilay. Tua, sarag na totoo so manbilay ed nanduruman paraan a labay da, balet saksakey labat so sankaabigan a dalan na bilay. Anggapo lay mas maabig nen say pambilay tayo a mitunosan ed Salita na Dios tan manaral manlapud Anak to, si Jesu-Kristo. Imbangat nen Jesus iray patumbok to a dayewen so Dios ed espiritu tan katuaan, tan imbaki to ira a manggawa na babangatan. (Mat. 28:19, 20; Juan 4:24) No manbilay itayo unong ed saray bilin nen Jesus, napaliket tayo si Jehova tan napanggayagaan tayo ray bendisyon To.

2. Panoy inkiwas na dakel ed mensahe na Panarian nen inmunan siglo, tan antoy kabaliksan na pagmaliw a kabiangan na ‘Say Dalan’?

² Sano magmaliw a mananisia iray “walaan na dugan kipapasen na puso parad bilay ya andi-anggaan” tan manpabautismo ira, manepeg labat ya ibaga tayo ed sikaran, “Naabrasa kayo ed sankaabigan a dalan na bilay!” (Gawa 13:48) Nen inmunan siglo C.E., nilibon totoo manlapud nanduruman bansa so angawat na katuaan tan impanengneng da ed publiko so debosyon da ed Dios panamegley na impampabautismo ra. (Gawa 2:41) Sarayan inmuunan babangatan et kabiangan na ‘Say Dalan.’ (Gawa 9:2; 19:23) Matukoy iyan pananawag lapud insentro na sarayan nagmaliw a papatumbok nen Jesu-Kristo so paraan na kabibilay da ed pananisia’d sikato tan ed panangalig ed ehemplo to.​—1 Ped. 2:21.

3. Akin a manpapabautismo iray totoo nen Jehova, tan pigaray abautismoan diad apalabas a samploran taon?

³ Say panaggaway-babangatan a kimey et pinmeles diad sarayan kaunoran ya agew tan asabi lay masulok a 230 a bansa. Diad apalabas a samploran taon, masulok a 2,700,000 a totoo so nandesisyon a manlingkor ed si Jehova tan nampabautismo bilang simbolo na dedikasyon da ed sikato. Kanian, manga 5,000 a totoo sirin so nababautismoan kada simba! Nandesisyon iran nampabautismo  lapud panangaro ed Dios, impanaral ed Kasulatan, tan pananisia ed ibabangat da. Sankaimportantian ed bilay tayo so pampabautismo, ta satan so gapoan na maapit a relasyon ed si Jehova. Ipapatnag met na satan a manmamatalek itayo a tulongan to itayon matoor a makapanlingkor ed sikato, a singa impanulong to ed saray ariripen to nensaman pian ‘makapanakar ira ed dalan to.’​—Isa. 30:21.

Akin a Manpabautismo?

4, 5. Antoray arum ed saray bendisyon tan gunggona na pampabautismo?

⁴ Nayarin dakel lay kakabatan mo nipaakar ed Dios, nanggawa ka lay pananguman ed bilay mo, tan sakey ka la natan ya agbautismadon manangipalapag. Maabig itan ya agawaan mo. Balet, indedikam ta lay inkasika ed Dios panamegley na pikakasi, tan plaplanoen mo ta lay manpabautismo? Diad impanaral mo ed Biblia, seguradon amtam la natan a nepeg a prayuridad mo ed bilay so pangidayew ed si Jehova, aliwan say pamaliket ed inkasika odino say pampayaman. (Basaen so Salmo 148:11-13; Luc. 12:15) No ontan sirin, antoray arum ed saray bendisyon tan gunggona na pampabautismo?

⁵ Bilang sakey a dedikadon Kristiano, nawalaan na sankaabigan a gagala so bilay mo. Magmaliw kan maliket lapud gagawaen mo so linawa na Dios. (Roma 12:1, 2) Say masanton espiritu nen Jehova et mamawala ed sika na saray maridios a kualidad a singa say deen tan pananisia. (Gal. 5:22, 23) Ebatan na Dios iray pikakasim tan bendisyonan to ray pansasagpot mon manbilay a mitunosan ed Salita to. Say ministeryom et magmaliw a makapaliket, tan say pambilay ed dalan ya inabobonan na Dios et mamabiskeg na ilalom nipaakar ed bilay ya andi-anggaan. Sakey ni, say dedikasyon tan pampabautismo so mangipanengneng a labay mon talagay magmaliw a sakey ed saray Tasi nen Jehova.​—Isa. 43:10-12.

6. Antoy ipapaamta na bautismo tayo?

⁶ Diad pangidedika tayoy inkasikatayo ed Dios tan pampabautismo, ipapaamta tayo’d publiko a kien itayo nen Jehova. Oniay insulat nen apostol Pablo: “Diad tua, anggapo ed sikatayo so manbibilay a parad sikato labat, tan anggapo so ompatey a parad sikato labat; ta no manbibilay itayo, manbibilay itayo parad si Jehova, tan no ompatey itayo, ompatey itayo parad si Jehova. Sirin, no manbibilay itayo tan no ompatey itayo, kien itayo nen Jehova.” (Roma 14:7, 8, NW) Impatnag na Dios a papablien to itayo lapud inikdan to itayoy kawayangan a manpili. No desidido tayon pilien iyan klase na bilay lapud inaro tayoy Dios, napaliket tayoy puso to. (Uli. 27:11) Say bautismo tayo et simbolo na dedikasyon tayo ed si Jehova tan panangipaamta ed publiko a sikato so bibidbiren tayon Manuley. Ipapanengneng na satan ya ondadapag itayo ed sikato diad isyu nipaakar ed sankatalbaan ya inkasoberano. (Gawa 5:29, 32) Tan wala met ed dapag tayo si Jehova. (Basaen so Salmo 118:6.) Lapud bautismo, makaawat itayo met na dakel niran espiritual a bendisyon natan tan diad arapen.

 Abendisyonan na Maaron Agagi

7-9. (a) Anto so impaseguro nen Jesus ed saramay anaynan ed amin a bengatla tan tinmumbok ed sikato? (b) Panon a nasusumpal imay insipan nen Jesus a walad Marcos 10:29, 30?

⁷ Oniay inkuan nen apostol Pedro ed si Jesus: “Nia, sikami tinaynan mi ya amin, tan tinumbok mi ka; anto sirin so wala naani ed sikami?” (Mat. 19:27) Labay ya amtaen nen Pedro no wala kasi maabig ya arapen to tan saray arum nin disipulo nen Jesus. Baleg so insakripisyo ra pian sigpot dan nipulong so Panarian. (Mat. 4:18-22) Kanian, antoy impaseguro nen Jesus ed sikara?

⁸ Diad mipadparan salaysay nen Marcos, impaamta nen Jesus a saray disipulo to et magmaliw a kabiangan na agagi ed espiritual. Oniay imbaga to: “Anggapoy too ya anaynan na abung, ono agagin lalaki, ono agagin bibii, ono ina, ono saray anak, ono daldalin, nisengeg ed siak, tan nisengeg ed ebanghelyo. Ingen awaten to so maminlasus natan ed sayan panaon, abu-abung, tan agagin lalaki, tan agagin bibii tan saray ina, tan saray anak, tan daldalin, pati saray kapasegsegang; tan dia ed mundo ya onsabi say bilay a maando.” (Mar. 10:29, 30) Saray Kristiano nen inmunan siglo a singa di Lidia, Aquila, Priscila, tan Gayo, so pigara ed saray angitarya na “abu-abung” tan nagmaliw ya “agagin lalaki, tan agagin bibii tan saray ina” ed saray kapananisiaan da. Sirin et asumpal imay insipan nen Jesus.​—Gawa 16:14, 15; 18:2-4; 3 Juan 1, 5-8.

⁹ Diad sayan panaon, lalon nasusumpal itan a sipan nen Jesus. Say “daldalin” a tinaynan na saray patumbok to et saray anapan a mabulos ya insakripisyo na dakel, kaiba la ray misionaryo, Bethelite, international servant, tan arum nira pian nasuportaay kimkimey nipaakar ed Panarian diad nanduruman bansa. Tinaynan na dakel ya agagi so ayaman da pian napasimpli bilay da. Napapaseseg tayo sano narengelan tayoray eksperiensya ra a mangipapanengneng ed no panon so pangaasikaso nen Jehova ed sikara tan no panon a mamapaliket ed sikara so panaglingkor da ed sikato. (Gawa 20:35) Sakey ni, napanggayagaan na amin a bautismadon lingkor nen Jehova so bendisyon na ‘pananap nin unona ed panarian tan say inkatunong na Dios’ bilang kabiangan na sankamundoan a Kristianon sanaagi.​—Mat. 6:33.

 Maligen ed “Maamot a Pasen”

10, 11. Anto so “maamot a pasen na Sankatageyan,” tan panon itayon makaloob ditan?

¹⁰ Say dedikasyon tan bautismo et manresulta ed sananey nin alay abig a bendisyon, say pribilehyon panayam ed “maamot a pasen na Sankatageyan.” (Basaen so Salmo 91:1.) Irerepresenta na saya so maligen a pasen odino situasyon a pakasalimbengan ed espiritual a kapeligroan. Saya et “maamot a pasen” lapud ag-iya amta na totoon anggapoy pakatebek da ed espiritual tan agmanmamatalek ed Dios. No manbibilay itayo unong ed dedikasyon tayo tan ipapanengneng tayoy sigpot a panagmatalek ed si Jehova, singa oniay ibabaga tayo ed sikato: ‘Sika so salimbeng ko tan kiagelan ko; Dios ko, dia ed sika so panmatalkan ko.’ (Sal. 91:2) Si Jehova a Dios so magmaliw a maligen ya “ayaman” tayo. (Sal. 91:9) No ontan sirin, anto ni anapen tayo ey?

¹¹ Say pakaloob ed “maamot a pasen” nen Jehova et mankabaliksan met ya apribilehyoan itayon nabayuboay personal a relasyon ed sikato. Onggagapo iya diad dedikasyon tan bautismo. Insan, napaelet tayoy relasyon tayo ed Dios diad iyapit ed sikato panamegley na panaral na Biblia, masimoon a pikakasi, tan sigpot a katutulok. (Sant. 4:8) Anggapo lay arum a mas maapit ed si Jehova nen say si Jesus, a say panagmatalek to ed Manamalsa et agbalot anguman. (Juan 8:29) Kanian, komon ta agtayon balot panduaruwaan si Jehova odino say pilalek tan pakasarag ton ontulong ed sikatayo pian natoor tayoy dedikasyon tayo. (Ecl. 5:4) Saray espiritual a probisyon na Dios ed saray totoo to et mabiskeg a paneknek a talagan inaro to tayo tan labay to itayon ontalona ed panlilingkor ed sikato.

Pablien so Espiritual a Paraiso

12, 13. (a) Anto so espiritual a paraiso? (b) Panon tayon natulongan iray balo ni?

¹² Say dedikasyon tan bautismo so mangilukas met ed dalan pian makapanayam itayo ed marakdakep ya espiritual a paraiso. Nikadkaduma itan a kipapasen ed espiritual a panggagayagaan tayo tan saray kapananisiaan tayo, a walaay pikakareenan ed si Jehova a Dios tan ed balang sakey. (Sal. 29:11; Isa. 54:13) Anggapoy walad mundo a napangikomparaan ed espiritual a paraison kawalaan tayo. Sankapatnagan iya diad saray internasyonal a kombension a ditan et saray agagi tayon nanlalapud nanduruman nasyon, lenguahe, tan rasa et mantitipon a nankakasakey, walaan na aroan, tan kareenan.

¹³ Baleg so pidumaan na espiritual a paraison panggagayagaan tayo no ikompara ed pakaskasin kipapasen na mundo natan. (Basaen so Isaias 65:13, 14.) Diad pangiyaabawag tayoy mensahe na Panarian, pribilehyo tayon ipasabi ed arum so imbitasyon a pakaloob ed espiritual a paraiso. Sakey nin pribilehyo so panulong ed saramay agano nin mililimog ed kongregasyon, a nagunggonaan diad panangipasal ed ministeryo. Diad panangidirehi na mamatatken, nayarin napribilehyoan itayon ontulong ed saray balo ni, a singa ginawa di Aquila tan Priscila ya ‘angipaliwawa ed si Apolos nipaakar ed dalan na Dios ed mas suston paraan.’​—Gawa 18:24-26, NW.

Mantultuloy a Manaral ed si Jesus

14, 15. Antoray maabig a rason tayo pian mantultuloy a manaral ed si Jesus?

¹⁴ Walaray maabig a rason tayo pian mantultuloy a manaral ed si Jesus. Antis na inyakar to diad dalin, sikatoy kaiban komikimey na Ama to diad agnabilang a taotaon. (Uli. 8:22, 30) Amta ton say sankaabigan a klase na bilay et akasentro ed panlingkor ed Dios tan pantasi ed katuaan. (Juan 18:37) Kombinsido si Jesus a say arum nin paraan na panagbilay et sinisiblet tan anggapoy maabig a pansumpalan. Amta to a sikatoy nasubok na pinasya tan napapatey. (Mat. 20:18, 19; Heb. 4:15) Bilang Ehemplo tayo, imbangat to itayon magmaliw a matoor.

¹⁵ Ag-abayag kayari impampabautismo nen Jesus, sikatoy tinukso nen Satanas a mangikaindan ed sankaabigan a klase na bilay. Balet, agtinmalona si Satanas. (Mat. 4:1-11) Ibabangat ed sikatayo na saya ya antokaman so gawaen nen Satanas, sarag tayoy mansiansian matoor. Piimano to iramay manasingger lan manpabautismo ontan met ed saramay agano nin abautismoan. (1 Ped. 5:8) Nayarin sumpaen itayo na saray kapamilyaan tayo ta aliway nipapasabi ed sikaran impormasyon nipaakar ed saray Tasi nen Jehova tan abaloan da et naproprotektaan da itayo. Ingen ta saray ontan a subok et mangiter ed sikatayo na  pankanawnawan nipatnag iray maabig a kualidad na Kristiano, singa say panagrespeto tan inkataktika sano walaray ebatan tayon tepetepet tan no manpupulong tayo. (1 Ped. 3:15) Wala sirin so positibon epekto na saraya ed saramay ondedengel ed sikatayo.​—1 Tim. 4:16.

Mansiansia ed Sankaabigan a Klase na Bilay!

16, 17. (a) Antoray taloran manunan kakaukolanen parad bilay a nabasa ed Deuteronomio 30:19, 20? (b) Panon a pinekderan nen Jesus, Juan, tan Pablo so insulat nen Moises?

¹⁶ Manga 1,500 taon antis a linma diad dalin si Jesus, pinaseseg nen Moises iray Israelita a pilien da so sankaabigan a klase na bilay. Oniay inkuan to: “Tawagen ko so tawen tan say dalin a manasi sumpa ed sika ed saya ya agew, ya inyan ko ed arap mo so bilay tan say patey, say bendisyon tan say ayew, sikato so makasengeg a pilien mo so bilay tan pian manbilay ka, sika tan say kapolian mo, say panangaro ed Jehova a Dios mo, say pananumpal ed boses to tan say ipepeket ed sikato.” (Deu. 30:19, 20) Agnansiansian matoor ed Dios so Israel, balet say taloran kakaukolanen parad bilay a sinalambit nen Moises et ag-anguman. Inulit ni ingen iratan nen Jesus tan na saray arum ni.

¹⁷ Unona, ‘aroen tayo si Jehova a Dios tayo.’ Ipapanengneng tayon inaro tayoy Dios no onkiwas tayo unong ed matunong iran dalan to. (Mat. 22:37) Komadua, ‘sumpalen tayo so boses nen Jehova’ panamegley na panaral ed Salita to tan itulok ed saray ganggan to. (1 Juan 5:3) Labay ya ibaga na saya a kaukolan ya onatendi itayon regular ed saray Kristianon pantitipon, a diad saraya et aaralen so Biblia. (Heb. 10:23-25) Komatlo, ‘ompeket tayo ed si Jehova.’ Antokaman so nasagmak tayo, naynay tayo komon a manisia ed Dios tan tumboken so Anak to.​—2 Cor. 4:16-18.

18. (a) Nen 1914, antoy imbaga na The Watch Tower nipaakar ed katuaan? (b) Anto so nepeg a panmoria tayo ed liwawa na katuaan natan?

¹⁸ Agaylan bendisyon so pambilay unong ed katuaan na Biblia! Nen 1914, oniay makabkabaliksan ya imbaga na The Watch Tower: “Agta abendisyonan tan maliket itayon totoo? Agta matoor so Dios tayo? No walay amta na siopaman a mas maong nen say saya, agto la iikbanan itan. No bilang ta makaromog so siopaman ed sikayo na mas maabig, komon ta ibaga yo’d sikami itan. Ta anggapo lay amta min magmaong nen say aromog mi ed Salita na Dios, nisay nakapaldua to labat so karakpan na satan. . . . Anggapoy balikas odino sulsulat a makapangideskribe ed deen, liket tan bendisyon a walad puso tan bilay tayo lapud suston pikakabat ed tuan Dios. Sigpot a napepenek na Salaysay nipaakar ed Kakabatan, Inkahustisya, Pakayari tan Aro na Dios so nonot tan liknaan tayo. Kanian anggapo lay anapen tayo. Anggapo lay arum a labayen tayo noag say pakawalaay suston pakatalos ed sayan alay abig a Salaysay.” (The Watch Tower, Disyembre 15, 1914, pahina 377-378) Agmanguuman so apresasyon tayo ed espiritual a liwawa tan katuaan. On, nagkalalon walay rason tayo natan a manliket ta ‘manaakar itayo ed silew nen Jehova.’​—Isa. 2:5; Sal. 43:3; Uli. 4:18.

19. Akin a nepeg ya agla manpapaleen iramay kualipikado lan manpabautismo?

¹⁹ No labay moy ‘manakar ed silew nen Jehova’ balet ta agka ni dedikado tan bautismadon Kristiano, agka la manpapaleen. Gawam so antokaman a nakaukolan pian nadampot iray kakaukolanen a walad Biblia parad bautismo. Saya so nikadkaduman paraan a nipanengneng moy apresasyon ed ginawa na Dios tan si Kristo parad sikatayo. Iter mo’d si Jehova so sankablian a walad sika, salanti, say mismon bilay mo. Ipanengneng mon desidido kan manggawa ed linawa to panamegley na itumbok ed Anak to. (2 Cor. 5:14, 15) Seguradon satan so sankaabigan a klase na bilay!

Antoy Ebat Mo?

• Antoy isisimbolo na bautismo tayo?

• Say dedikasyon ed Dios tan pampabautismo so manresulta ed antoran bendisyon?

• Akin ya importantin maong so panaral ed si Jesus?

• Antoy ontulong ed sikatayo pian makapansiansia itayo ed sankaabigan a klase na bilay?

[Tepetepet Parad Panagaral]

[Litrato ed pahina 25]

Say bautismom so mangipanengneng a pinilim so sankaabigan a klase na bilay

[Saray litrato ed pahina 26]

Kasin maligen ka ed “maamot a pasen”?