DAKEL so atawir na saray totoo nen Jehova ya espiritual a kayamanan. Saratan a makapainteres ya rekord et aglabat naala ed saray daan ya publikasyon tayo noag pati diad saray litrato, sulat, personal ya eksperiensya, antigo iran kagawaan ya inusar ed panagdayew, panagpulong, tan arum ni ran mikonektaan ed awaran tayo. Balet, antoy gunggona na pangiyatol ed saratan tan pangusisa ed apalabas? Nensaman diad Israel, obligasyon na saray ulo na pamilya ya ipaamtad ananak da so ganggan tan makapadinayew iran gawa nen Jehova “pian nipasen da ed Dios so ilalo ra.”​—Sal. 78:1-7.

Manlapu la nensaman, baleg so nagagawaan na pananap ed saray daan a rekord pian nanengneng so pakasusumpal na gagala nen Jehova. Singa bilang, sanen sinalin patundaen na saray onsusumpa so kimey diad templo ed Jerusalem, impasukayan iray daan ya rekord tan walay nalmon sulat diad Ahmeta (odino Ecbatana, kabisera na Media) ya ingganggan nen Arin Ciro so pangipaalagey ed satan. (Esd. 6:1-4, 12) Kanian, nipaalagey lamet so templo unong ed linawa na Dios. Inusar met na nansulat ed Ebanghelyo a si Lucas iray daan ya rekord tan ‘maalwar ton inusisa iratan ya amin manlapud gapo.’​—Luc. 1:1-4.

Say Mananguley ya Ulop et interesadon maong ed awaran tayo. Oniay inkomento na sakey a membro  na Mananguley ya Ulop nipaakar ed kaimportantian na pangipreserba, pangirekord, tan pangipasa ed espiritual a kayamanan tayo: “Pian amta tayoy laen tayo, kaukolan ya amta tayoy nanlapuan tayo.” Lapud satan, pinorma so departamento ya Writing Archives diad headquarters ed Brooklyn, New York, tan sakop itan na Writing Committee.

SAY “ALBUM NA PAMILYA” TAYO TAN “SARAY TAWIR” TAYO

Lapud agti la nipawil so apalabas, nayarin mansinayang so dakel ed sikatayo no agti niyatol so kompleton album na pamilya tayo. Natan, pansasagpotan na Writing Archives department ya ipreserba tan irekord so marakep ya apalabas tayo a lalon onlalaknab. Saray litraton maalwar ya impilad koleksion et kabiangan na “album na pamilya” tayo. Kaiba met ed koleksion iray akadkaunan publikasyon, makapaseseg iran personal ya eksperiensya, tan pinabpablin memorabilia. Saratan ya “tawir” so mangipaamtad apalabas tayo tan makatulong iratan pian matalek tayon talaranan so arapen na espiritual ya pamilya tayo.

Imbitaan mi kan usisaen so Writing Archives panamegley na balon artikulon “Inalad Daan Iran Koleksion Mi.” Panapanaon ya ompaway iya diad panaralan ya edisyon na Say Panag-bantayan. Alimbawa, diad onsublay ya isyu et plano min i-publish so salaysay a wala ray litrato pian ebatan irayan tepet: Anto so tatawagen a Dawn Mobile? Siopay angusar ed satan? Kapigan itan inusar, tan parad anto itan?

Singa diad album na pamilya, diad koleksion na Writing Achives et dakel so naaralan nipaakar ed sikatayo tan ed saray inmuunan espiritual ya atateng tayo. Naaralan tayoy pananisia tan pakpel na saray agagi nensaman, say liket tan subsubok diad impanlingkor dad maaron Ama tayo, tan say panangigiya tan tuloytuloy a suporta na Dios ed saray totoo to. (Deu. 33:27) Seguradon bendisyonan nen Jehova so pansasagpot ya ipreserba so awaran na organisasyon tayo pian lalon mankakasakey tan napabiskeg ya gawaen so linawa to.

[Kahon/Litrato ed pahina 31]

Pangamtad Gagawaen Da

Sano ipaparaan iray literatura, DVD, tan arum ni ran based Biblian publikasyon tayo, saray writer, artist, researcher, tan arum ni ra et onkokonsulta ed saray koleksion na Writing Archives. Kanian, sayan departamento et maalwar a manggagaway praktikal iran paraan pian makala tan nipreserba iray nanduruman daan ya rekord a manlapud saray sangan opisina, departamento ed Bethel, kongregasyon, indibidual, tan arum iran institusyon. Imanoen tayo pay gagawaen na sayan departamento:

Pantipon tan Pangusisa: Tuloytuloy ya iyaarum ed koleksion iray importantin bengatla. Maslak ed saraya et inter odino impabayes na agagi a say pamilya ra et abayag lan matoor a manlilingkor ed si Jehova. Diad pangusisa tan pangikompara ed saraya, mas natalosan tayoy apalabas tayo tan saramay agagin nambilay ed saman.

Pan-catalog: Nilibo so koleksion na Writing Archives tan arum ed saratan et sanlasus taon lay kabayag to. Nandurumay kurti, kabaleg, tan klase na saratan, kanian kaukolan a maalwar ya organisaen pian nausar ed pan-research.

Pangapiger tan Panpreserba: Saray namimigmig lan libro tan antigon kagawaan et aapigeren tan iprepreserba na saray eksperto. Saray dokumento, litrato, balitan kinatli ed dyaryo, palabas, tan rekording et in-save ed kompyuter. Kanian, imbes ya alaen ni ray orihinal ya dokumento tan arum ni ran antigon kagawaan, nenengnengen la iratan diad kompyuter.

Pangiyatol tan Pananap: Saray koleksion na Writing Archives et mauksoy tan maalwar ya inyatol pian ag-iratan nabalang odino naderal na petang tan basa. Walay ginawan database pian mainomay ya na-research tan naanap iray impormasyon nipaakar ed saray mabli tan antigon kayamanan tayo.

[Saray litrato ed pahina 32]

1. Poster parad “Photo-Drama of Creation.” 2. Subscription register. 3. De-trumpan luluganan. 4. Apis na Abril 15, 1912, Watch Tower. 5. Abiso na pakapriso nen J. F. Rutherford. 6. WBBR microphone. 7. Phonograph. 8. Pananginan na liblibro. 9. Personal iran nota. 10. Telegrama parad si J. F. Rutherford.